ኦሮሜ 16:7-22 in Gamo

⁷ ታናራ ኢሲፌ ቃሼቲዳ ኣንዲራቆኔኔ ዩኒያሴ ሳሮ ጊቴ። ሄይታንቲ ሃዋሬታ ጋርሳን ሎዖ ሱንꬃራ ዲዛይታኔ ኪርስቶሳ ታፔ ካሴ ኣማኒዳይታ።

⁸ ታኒ ጎዳ ባጋራ ዳሮ ሲቂዛ ጲልያፆኔ ሳሮ ጊቴ።

⁹ ኪርስቶሳ ኦሶ ታናራ ኢሲፌ ኦꬂዛ ኢሮባኖኔኔ ታ ሲቂዛ ሴንፃኬካ ሳሮ ጊቴ።

¹⁰ ኪርስቶሳን ኢዛ ኣማኖይ ፓጬቲዲ ጋላቴቲዳ ኤፄሴኔሴስ ታ ሳሮካ ጋꬂቴ። ኣርሲፃባሎሶ ኣሳስካ ታ ሳሮካ ጋꬂቴ።

¹¹ ታ ዳቦ ሄሮዲያና ሳሮ ጊቴ። ጎዳን ዲዛ ኒሪቃሶሶ ኣሳ ሳሮ ጊቴ።

¹² ጎዳን ጊዲዲ ሚኖቴꬃን ኦꬂዛ ማጫሳታ ቲሮፊሞኖኔ ፂሮፊሞኖ ሳሮ ጊቴ። ጎዳስ ኦሶን ዳሮ ዳቡሪዳሪስ ኪርስቶሳን ታኒ ኢዞ ሲቂዛ ፃርሲዲስ ታ ሳሮካ ጋꬂቴ።

¹³ ጎዳን ዶሬቲዳ ሩፎኔስ፥ ታሲኔ ኢዛስ ኣዮ ጊዲዳሪስ ታ ሳሮካ ዮቲቴ።

¹⁴ ኣስቄሮኔሲ፥ ኣፊላሶኔሲ፥ ሄሮሜኔሲ፥ ጳፂሮባኔሲ፥ ሄርማኔሲኔ ኢስታራ ዲዛ ኢሻታ ኡባታስ ታ ሳሮካ ጋꬂቴ።

¹⁵ ፊሌጎኔስ፥ ዩሊያስ፥ ኔሪያሲኔ ኢዛ ሚቼይስ ሄሳꬆካ ኣልፆኔስ፥ ኢስታራ ዲዛ ኣማኒዛይታስካ ታ ሳሮካ ጋꬂቴ።

¹⁶ ኢሶይ ኢሳ ዬሪ ዬር ኤኪዲ ሳሮኬቲቴ። ኪርስቶሳን ኣማኒዛ ዎሳ ኬꬃ ኣሳይ ዉሪካ ኢንቴና ሳሮ ጌስ።

¹⁷ ታ ኢሻቶ! ኣሳ ጋርሳን ሻኬቴꬂ ሜꬊዛይታፔኔ ኢንቴ ታማሪዳ ቲሚርታ ኤኮንታ ኢፆን ኢንቴስ ꬉጴ ጊዲዛ ኣሳታፔ ኢንቴ ናጌቲቴ።

¹⁸ ሄይታንታ ማላ ኣሳቲ ዬሱስ ኪርስቶሳስ ኦꬂዛይታ ጊዶንታ ባ ቃንꬃ ካꬃ ጊሽ ኦꬂዛይታ። ሹጎ ቃላራ ሃሳያኒኔ ዎዝና ኪያ ኣሳታ ባሌꬄቴስ።

¹⁹ ኢንቴ ሚሺራቾ ቃላስ ኣዛዜቲዛይታ ጊዲዳይሳ ኣሲ ዉሪ ሲይዴስ። ሄሲካ ታና ዳሮ ኡፋይሲዴስ። ጊዲኮካ ኢንቴ ሎዖ ሃኖስ ጪንጫታ ቃሴ ኢታ ኦሶስ ኤያታ ጊዳና ማላ ታ ኮያይስ።

²⁰ ሳሮቴꬃ ጎዳይ ፃላዔ ኤሶን ኢንቴ ቶሆ ጋርስ ኣꬂ ዲንጬሬꬃና። ጎዳ ዬሱስ ኪርስቶሳ ኪያቴꬂ ኢንቴናራ ጊዶ።

²¹ ታናራ ኢሲፌ ኦꬂዛ ፂምቶሲ ቃሴካ ታ ዳቦ ሉቂዮሲ፥ ኢያሶኔይኔ ሱሲጴፂሮሲ ኢንቴና ሳሮ ሳሮ ጌቴስ።

²² ሃይሳ ኪታ ፃፊዳይ ታኒ ፄሪፂዮሲ ኢንቴና ጎዳ ሱንꬃን ሳሮ ጋይስ።

⁷ Tanara issife qashetida Andiraqonenne Yuniyase saro giite. Heytanti Hawaareta garsan lo7o sunthara dizaytanne Kirstoosa taappe kase ammanidayta.

⁸ Tani Goda baggara daro siiqiza Philyaxone saro giite.

⁹ Kirstoosa ooso tanara issife ooththiza Irobanoonenne ta siiqiza Senxakekka saro giite.

¹⁰ Kirstoosan iza ammanoy paacetidi galattettida Exessenesses ta sarokka gaththite. Arsixabaloso asaska ta sarokka gaththite.

¹¹ Ta dabbo Herodiyaana saro giite. Godan diza Niriqaasoso asa saro giite.

¹² Godan gididi minotethan ooththiza macasata Tirofimoononne Xirofimoono saro giite. Godas ooson daro daaburidaris Kirstoosan tani izo siiqiza Xarsidis ta sarokka gaththite.

¹³ Godan doorettida Ruufoones, taassinne izas aayo gididaris ta sarokka yootite.

¹⁴ Asqeroonessi, Afilasoonessi, Heromeenessi, Phaxirobaanessi, Hermaanessinne istara diza ishata ubbatas ta sarokka gaththite.

¹⁵ Filegoones, Yuuliyaas, Neeriyassinne iza micheys hessathoka Alxoones, istara diza ammanizaytaska ta sarokka gaththite.

¹⁶ Issoy issa yeeri yeer ekkidi saroketite. Kirstoosan ammaniza Woosa Keeththa asay wurikka intena saro gees.

¹⁷ Ta ishato! Asa garsan shaaketethi medhizaytappenne inte tamarida timirta ekkonta ixon intes dhuphe gidiza asatappe inte naagetite.

¹⁸ Heytanta mala asati Yesus Kirstoosas ooththizayta gidonta ba qantha kaththa gish ooththizayta. Shugo qaalara haasayaninne wozna kiya asata baleththetes.

¹⁹ Inte mishiraachcho qaalas azazettizayta gididayssa asi wuri siydes. Hessika tana daro ufaysides. Gidikkoka inte lo7o hanos cincata qasse iita oosos eeyata gidana mala ta koyays.

²⁰ Sarotetha Goday Xala7e eeson inte toho gars aaththi dincereththana. Goda Yesus Kirstoosa kiyatethi intenara gido.

²¹ Tanara issife ooththiza Ximtoossi qasseka ta dabbo Luqiyoossi, Iyaasooneynne Susiphexiroossi intena saro saro geetes.

²² Hayssa kiita xaafiday tani Xerixiyoossi intena Goda sunthan saro gays.