ኦሮሜ 15:5-16 in Gamo

⁵ ሚኖቴꬂኔ ዳንዳያ ኢሚዛ ፆሲ ኢንቴ ዬሱስ ኪርስቶሳ ካሊሺን ኢንቴስ ኢንቴ ጊዶን ኣያና ኢሲፌቴꬅ ኢሞ።

⁶ ሄሲካ ኢንቴ ኢሲ ዎዝናኒኔ ኢሲ ዱና ጊዲዲ ኑ ጎዳ ዬሱስ ኪርስቶሳ ኣዋ ፆሳ ቦንቻናሳ።

⁷ ሄሳ ጊሽ ፆሲ ኢንቴና ፆሳ ቦንቾን ሞኪ ኤኪዳ ማላ ኢንቴካ ኢሶይ ኢሳ ኡፋይሳን ሞኪ ኤኪቴ።

⁸ ካሴ ኣዋታስ ኢሜቲዳ ሂዶታ ቃላ ፖላናስ ፆሳ ቱማቴꬂ ኤሬታና ማላ ኪርስቶሲ ኣይሁዳታስ ኦꬂዛዴ ጊዲዳይሳ ታ ኢንቴስ ዮታይስ።

⁹ ሄሳꬆካ ኣይዛቤቲ ኢዛ ማሮቴꬃ ጊሽ ፆሴ ጋላታና ማላ፤ ሄሲካ “ታ ኔና ዴሬ ጊዶን ጋላታና፤ ኔ ሱንꬃስካ ጋላታ ዬꬅ ዬፃና” ጌቴቲ ጌሻ ማፃፋን ፃፌቲዳ ማላ።

¹⁰ ቃሴካ “ኣይዛቤቶ! ኢንቴካ ፆሳ ዴሬታራ ኡፋዬቲቴ” ጌቴቲ ጌሻ ማፃፋን ፃፌቲዴስ።

¹¹ ናምዓንꬆካ “ኣይዛቤቲ ኢንቴ ዉሪካ ጎዳ ጋላቲቴ፤ ዴሬይ ዉሪ ኢዛ ሳቢቴ” ጌቴቲ ጌሻ ማፃፋን ፃፌቲዴስ።

¹² ሄሳꬆ ኢሳያሳን “ባ ዴሬ ኣሳ ቦላ ካዎቲዛ ኢሴዬ ናይ ያና። ኣላሜ ኣሳ ኣይሲዛዴይ ዴንዳና፤ ኢስቲካ ኢዛን ኡፋዬታና” ጌስ።

¹³ ኢንቴ ኢዛን ኣማኒዛ ጊሽ ሂዶታ ፆሲ ኢንቴናን ኡፋይሲኔ ሳሮቴꬅ ኩንꬆ። ሄሲካ ፂሎ ኣያና ዎልቃ ሂዶታ ኢንቴስ ዳራናሳ።

¹⁴ ታ ኢሻቶ! ኢንቴ ሎዔቴꬃን፤ ኤራቴꬅ ኡባን ኩሚዳይታኔ ሃራታ ዞራናስ ኤራይ ዲዛይታ ጊዲዳይሳ ታ ኣዳፌ ሻካ ኤራዲስ።

¹⁵ ታ ፆሳፌ ኤኪዳ ኢሞቴꬃ ጊና ቃሴካ ኢንቴና ቆፊሳናስ ኢሲ ኢሲ ዮዖታ ፃላቴꬃን ኢንቴስ ፃፋዲስ።

¹⁶ ሄሳ ሄ ኪያቴꬃይ ኢሜቲዳይ ታኒ ፆሳ ሚሺራቾ ቃላ ሃንኮ ዴሬታስ ዮታና ማላ፤ ቃሴካ ቄሴ ማላ ጊዲዳ ዬሱስ ኪርስቶሳስ ኦꬃናሳ፤ ሄሳ ጊሽ ሃንኮ ዴሬ ኣሳይ ፂሎ ኣያናን ዱማቲዲ ፆሴ ኡፋይሲዛ ያርሾ ጊዲዲ ሺቃና ማላ ኦꬃይስ።

⁵ Minotethinne dandaya immiza Xoossi inte Yesus Kirstoosa kaallishin intes inte giddon Ayana issifeteth immo.

⁶ Hessika inte issi woznaninne issi duuna gididi nu Goda Yesus Kirstoosa Aawa Xoossa bonchanassa.

⁷ Hessa gish Xoossi intena Xoossa bonchon mokki ekkida mala inteka issoy issa ufayssan mokki ekkite.

⁸ Kase aawatas imettida hidota qaala polanas Xoossa tumatethi erettana mala Kirstoosi Ayhudatas ooththizade gididayssa ta intes yootays.

⁹ Hessathoka Ayzaabeti iza maarotetha gish Xoosse galatana mala; hessikka “Ta nena dere giddon galatana; ne sunthaska galata yeth yexana” geetetti Geeshsha Maxaafan xaafettida mala.

¹⁰ Qasseka “Ayzaabeto! Inteka Xoossa deretara ufayetite” geetetti Geeshsha Maxaafan xaafetides.

¹¹ Nam7anthokka “Ayzaabeti inte wurikka Goda galattite; derey wuri iza sabbite” geetetti Geeshsha Maxaafan xaafettides.

¹² Hessatho Isayaasan “Ba dere asa bolla kawotiza Iseeye nay yaana. Alame asa ayssizaddey dendana; istika izan ufayettana” gees.

¹³ Inte izan ammaniza gish hidota Xoossi intenan ufaysinne saroteth kuntho. Hessika Xillo Ayana wolqa hidota intes daranassa.

¹⁴ Ta ishato! Inte lo7etethan; erateth ubban kumidaytanne harata zoranas eray dizayta gididayssa ta addafe shaaka eradis.

¹⁵ Ta Xoossafe ekkida imotetha gina qasseka intena qofisanas issi issi yo7ota xalatethan intes xaafadis.

¹⁶ Hessa he kiyatethay imettiday tani Xoossa Mishiraachcho qaala hanko deretas yootana mala; qasseka Qeese mala gidida Yesus Kirstoosas ooththanassa; hessa gish hanko dere asay Xillo Ayanan dummatidi Xoosse ufaysiza yarsho gididi shiiqana mala ooththays.