ኦሮሜ 12:1-19 in Gamo

¹ ሄሳ ጊሽ ታ ኢሻቶ! ኢንቴ ኣሳቴꬃ ጌሺኔ ፆሴ ኡፋይሲዛ ዴዖ ያርሾ ኦꬂዲ ኢንቴ ሺሻና ማላ ታ ኢንቴና ፆሳ ቃꬌታን ዎሳይስ። ሄሲካ ዎዝናማ ኣሳ ማላ ኢንቴ ፆሳስ ኦꬂዛ ኦሶ።

² ሎዖ፥ ኡፋይሲዛዚኔ ኩሜꬅ ጊዲዳ ፆሳ ሼኔይ ኣዛኮኔ ኢንቴ ፓጪ ኤራና ማላ ኢንቴ ቆፋን ኦራፂዲ ላሜቲቴ ኣቲን ሃይሳ ኣላሜ ኣሳ ሚሳቶፒቴ።

³ ኢንቴስ ፆሲ ኢሚዳ ኣማኖ ማላ ኢንቴርካ ኢንቴና ፓጪ ፄሊቴ ኣቲን ሃዒ ዲዛይሳፌ ቦላራ ኢንቴና ꬎቂሲ ፄሎንታ ማላ ታኒ ታስ ኢሜቲዳ ፆሳ ኪያቴꬃን ኢንቴና ኢሳ ኢሳ ዞራይስ።

⁴ ኑፔ ኢሲ ኢሲ ኣሳስ ኢሲ ኣሳቴꬃ ቦላ ዳሮ ቢሊቴቲ ዲዛ ማላ ሄይቲካ ሄ ቢሊቴቲ ኢሲ ማላ ኦሶ ኦꬆንታይሳꬆ፤

⁵ ሄሳꬆካ ኑኒ ዳሮታ ጊዲ ኡቲዲ ኪርስቶሳን ኢሲ ኣሾ፤ ኑኒ ኢሶይ ኢሳስ ኣሾ።

⁶ ኑስ ኢሜቲዳ ኢሞታ ማላ ዱማ ዱማ ኢሞቴꬂ ዴስ። ኢሳዴስ ቡሮፔ ሃናናዝ ዮቶ ጊዲኮ ኢዛዴስ ኢሜቲዳ ኣማኖ ማላ ዮቶ።

⁷ ኦꬂ ማዲዛዴይ ኦꬂ ማዶ፤ ታማርሲዛዴይካ ታማርሶ።

⁸ ዞሪዛዴይ ጊዲኮ ዞሮ፤ ባይንዳይታስ ኢሚዛዴይ ጉጂ ኢሞ። ኣይሲዛዴይ ሚኒ ኣይሶ። ማሪዛዴይካ ኡፋይሳን ማሮ።

⁹ ኢንቴ ሲቆቴꬂ ቆꬌፔ ቆሞን ጊዶፖ። ኢታ ጊዲዳይሳ ዉርሲካ ኢፂቴ። ሎዖ ጊዲዳይሳራ ኢሲፌ ኦይኬቲቴ።

¹⁰ ኢንቴ ኢንቴ ጋርሳን ኢሶይ ኢሳራ ኢሻታ ማላ ሎዔꬂ ሲቄቲቴ። ኢሶይ ኢሳ ባፔ ኣꬂ ቦንቺዛይታ ጊዲቴ።

¹¹ ጎዳስ ኦꬃና ኣያናን ፁጌቲዛይታ ጊዲቴ ኣቲን ሄሳ ሄ ሚኖቴꬃፌ ጉዬ ጎፒቴ።

¹² ሂዶታን ኡፋዬቲዛይታ ጊዲቴ፤ ሜቶ ዳንዳዪቴ፤ ዎሳን ሚኒቴ።

¹³ ኣማኒሼ ዋዬቲዛይታስ ኢንቴስ ዲዛይሳፌ ሻኪ ኢሚቴ። ኢማꬅ ሞኪቴ።

¹⁴ ኢንቴና ቃንጊዛይታ ኣንጂቴ ኣቲን ቃንጎፍቴ።

¹⁵ ኡፋዬቲዛይታራ ኡፋዬቲቴ፤ ሙዞቲዛይታራ ሙዞቲቴ።

¹⁶ ኢንቴ ኢንቴ ጋርሳን ዶሴቴꬃን ዲቴ። ማንቆታራ ኢሲፌቴꬃን ዳናስ ኮዪቴ ኣቲን ኦቶሬቶፊቴኔ ጬቄቶፍቴ።

¹⁷ ኦናስካ ኢታ ጊሽ ኢታ ዛሮፒቴ። ኣሳ ኡባ ኣቻን ሎዖ ሚሽ ኦꬃናስ ሚኒቴ።

¹⁸ ኢንቴስ ዳንዳዬቲኮ ኢንቴ ኢንቴ ባጋራ ኣሳ ኡባራ ሳሮን ዲቴ።

¹⁹ ታ ሲቆቶ! ኢንቴ ሃሎ ፆሲ ኬሶ ኣቲን ኢንቴርካ ሃሎ ኬሶፍቴ “ሃሎ ኬሳናይ ታና ጌስ ጎዳይ” ጌቴቲ ጌሻ ማፃፋን ፃፌቲዴስ።

¹ Hessa gish ta ishato! Inte asatetha geeshshinne Xoosse ufayssiza de7o yarsho ooththidi inte shiishana mala ta intena Xoossa qadhetan woossays. Hessika woznama asa mala inte Xoossas ooththiza ooso.

² Lo7o, ufaysizazinne kumeth gidida Xoossa sheney aazakkonne inte paaci erana mala inte qofan oraxidi laametite attin hayssa alame asa misatoppite.

³ Intes Xoossi immida ammano mala interka intena paaci xeellite attin ha7i dizayssafe bollara intena dhoqisi xeellonta mala tani taas imettida Xoossa kiyatethan intena issa issa zorays.

⁴ Nuuppe issi issi asas issi asatetha bolla daro billiteti diza mala heytikka he billiteti issi mala ooso ooththontayssatho;

⁵ hessathoka nuni darota gidi uttidi Kirstoosan issi asho; nuni issoy issas asho.

⁶ Nuus imettida imota mala dumma dumma imotethi dees. Issades buroppe hananaz yooto gidikko izaades imettida ammano mala yooto.

⁷ Ooththi maaddizadey ooththi maaddo; tamarsizadeykka tamarso.

⁸ Zorizadey gidikko zoro; bayndaytas immizadey gujji immo. Ayssizaddey minni aysso. Maarizadeykka ufayssan maaro.

⁹ Inte siiqotethi qoodheppe qommon gidoppo. Iita gididayssa wursikka ixite. Lo7o gididayssara issife oyketite.

¹⁰ Inte inte garsan issoy issara ishata mala lo7ethi siiqetite. Issoy issa bappe aaththi bonchizayta gidite.

¹¹ Godas ooththana Ayanan xuugetizayta gidite attin hessa he minotethafe guye gooppite.

¹² Hidotan ufayetizayta gidite; meto dandayite; woossan minnite.

¹³ Ammanishe waayetizaytas intes dizayssafe shaakki immite. Imath mokkite.

¹⁴ Intena qangizayta anjite attin qangofte.

¹⁵ Ufayetizaytara ufayetite; muuzotizaytara muuzotite.

¹⁶ Inte inte garsan doseteththan diite. Manqotara issifetethan daanas koyite attin otoretofitenne ceeqqettofte.

¹⁷ Oonaska iita gish iita zaaroppite. Asa ubba achchan lo7o miish ooththanas minnite.

¹⁸ Intes dandayettikko inte inte baggara asa ubbara saron diite.

¹⁹ Ta siiqoto! Inte halo Xoossi kesso attin interka halo kessofte “Halo kessanay tana gees Goday” geetetti Geeshsha Maxaafan xaafettides.