ኦሮሜ 11:2-20 in Gamo

² ፆሲ ኮይሮፔ ባ ኤሪዳ ዴሬዛ ዬጊቤና። ኤላሲ ኢስራዔሌ ናይታ ቦላ ሞቶ ፆሳኮ ዎስቲ ሺሺዳኮኔ ጌሻ ማፃፋይ ኢዛ ጊሽ ኣይ ጊዛኮ ኢንቴ ኤሬኬቲ?

³ “ጎዶ! ኢስቲ ኔ ናቤታ ዎꬊዳ። ኔስ ያርሺዛሶታካ ላሊዳ። ቃሴ ታኒ ታርካ ኣታዲስ። ታናካ ዎꬋና ጌቴስ” ጊዴስ።

⁴ ፆሲ ኢዛስ “ባዓሌ ጌቴቲዛ ኤቃስ ጎይኖንታይታ ላፑን ሺ ኣስ ታኒ ታስ ኣሻዲስ” ጊ ዛሪዴስ

⁵ ሄሳ ማላካ ሃዒ ሃ ዎዴዛንካ ፆሳ ኪያቴꬃን ኢስራዔሌ ኣሳፔ ዶሬቲ ኣቲዳ ጉꬃቲ ዴቴስ።

⁶ ሂስቲን ሄሲ ፆሳ ኪያቴꬃን ጊዲኮ ኣሳ ኦሶን ጊዴና። ኣሳ ኦሶን ጊዲዳኮ ፆሳ ኪያቴꬂ ኪያቴꬅ ጊዴና።

⁷ ሂስቲን ኣይ ጋኔ? ኢስራዔሌ ናይቲ ሎዔꬂ ኮዪዳይሳ ዴሚቤቴና። ፆሳን ዶሬቲዳይቲ ጊዲኮ ዴሚዳ። ሃንኮ ኣቲዳይታ ዎዝናይ ሙሚዴስ።

⁸ ካሴ “ኢስታ ኣይፌይ ፄሎንታ ማላ፥ ኢስታ ሃይꬃይካ ሲዮንታ ማላ ፆሲ ሃኖ ጋካናስ ኢስታስ ዶጪሲዛ ኣያና ኢሚዴስ” ጌቴቲ ጌሻ ማፃፋን ፃፌቲዳ ማላ።

⁹ ዳዉቴይካ “ኢስታ ማዳይ ኢስታ ኦይኪዛ ናርፃኔ ያርዴ፤ ኢስታስ ꬉጲዛዚኔ ቂፃቴ ጊዶ።

¹⁰ ኢስታ ኣይፌይ ፄሎፎ፤ ጎዜቶ፤ ኢስታ ዞኮይ ሜርናስ ኩኖ” ጊዴስ።

¹¹ ኣኔ ቃሴ ታ ዛራ ኦይቻይስ፤ ኢስራዔሌ ኣሳይ ናምዓንꬆ ኩንዴꬃፌ ዴንዴኔ? ዴንዳና። ሃራፔካ ኢስራዔሌ ናይታ ቃናቲሳና ጊሽ ኢስታ ሞሮ ጋሶን ኣቶቴꬂ ኣይዛቤታስ ጋኪዴስ።

¹² ጊዶ ኣቲን ቃሴ ኢስታ ሞሮይ ኣይዛቤታስ ኣንጆ ጊዲዴስ። ኢስታ ኩንዴꬂካ ቃሴ ኣይዛቤታስ ኣንጆ ጊዲኮ ኢስቲ ሲሚ ኣቲዳኮ ኣይ ማላ ጊታ ኣንጆ ጊዳንዴሺን!

¹³ ኣይዛቤቶ! ታ ኢንቴስ ዮታይስ፥ ታ ኣይዛቤታስ ኪቴቲዳዴ ጊዲዳ ጊሽ ታ ኦሶዛ ሚናዳ ፖላና።

¹⁴ ሄሲካ ታ ባጋ ኣሳቲ ኣሞዛና ማላ ዴንꬄꬃዳ ኢስታፌ ጉꬃ ኣሳታ ኣሻናስ ኡፋይሳ ኦꬃይስ።

¹⁵ ፆሲ ኢስታ ኣጊዳ ኣይዛቤቲ ፆሳራ ጊጊኮ ፆሲ ኢስራዔሌ ናይታ ዛሪዲ ኤኪዛ ዎዴ ኢንቴስ ኣዚ ሃናና ሚሳቲዜ? ሄሳ ጉሲ “ሃይቆፔ ዴንዲዴስ” ጉሳ ማላ።

¹⁶ ኮይሮ ቡኬሶይ ሎዖ ጊዲኮ ሃንኮ ኢዛፔ ኦሴቲዛይስ ዉሪካ ሎዖ ጊዴስ። ሄሳꬆካ ኢሲ ሚꬃ ፃጶይ ሎዖ ጊዲኮ ሃንኮ ኢዛ ቦላ ዲዛ ሃጋቲካ ሎዖ ጊዴቴስ።

¹⁷ ኬꬃ ማታን ዲዛ ዎጋራ ሚꬃ ሃጋታ ማላቲ ኢንቴ ሜቂ ዎꬊን ሃንኮ ዎራን ዲዛ ዎጋራ ሚꬃታ ሚሳቲዛ ኣይዛቤቲ ኢንቴ ኪቾሳን ጊዲዲ ኢንቴ ሃሮኔ ኢንቴ ኣንጆ ሻኪ ኤኪዛዴንታ ጊዲኮ፤

¹⁸ ሄይታ ሄ ሜቂ ዎꬊዳ ሃጋታ ቦላ ኦቶሬቶፋ። ኢንቴ ኢስታ ቦላ ኦቶሬቲኮ ቃሴ ሃኖ ዎዝናን ዎꬂቴ። ሄ ሚꬃ ቶኪዳይ ኔና ጊዳካ። ሚꬃይ ኔና ቶኪዴስ ኣቲን።

¹⁹ ሂስቲኮ “ሄ ሃጋቲ ሜቂ ዎꬊዳይ ኑኒ ኢስቲ ኪቾሳን ጌላና ማላሳ” ጎንታ ኣጌኬታ።

²⁰ ቱሙ ጊዴታ ሺን ኢስቲ ሜቂዳይ ኣማኖ ፓጬፔ ዴንዲዳይሳና። ኢንቴ ቃስ ኣማኖን ኤቂዴታ። ባቢቴ ኣቲን ኦቶሬቶፍቴ።

² Xoossi koyroppe ba erida dereza yeggibenna. Elaassi Isra7eele nayta bolla mooto Xoossakko wosti shiishshidakkonne Geeshsha Maxaafay iza gish ay gizakko inte ereketii?

³ “Godo! Isti ne nabeta wodhida. Nees yarshizasotakka laallida. Qasse tani tarka attadis. Tanaka wodhana geetes” gides.

⁴ Xoossi izas “Ba7aale geetettiza Eeqas goynontayta laapun shi as tani taas ashshadis” gi zaarides

⁵ Hessa malaka ha7i ha wodezanka Xoossa kiyatethan Isra7eele asappe dooretti attida guuthati deettes.

⁶ Histin hessi Xoossa kiyatethan gidikko asa ooson gidenna. Asa ooson gididakko Xoossa kiyatethi kiyateth gidenna.

⁷ Histin ay gaanee? Isra7eele nayti lo7ethi koyidayssa demmibettenna. Xoossan doorettidayti gidikko demmida. Hanko attidayta woznay muumides.

⁸ Kase “Ista ayfey xeellonta mala, ista haythayka siyonta mala Xoossi hanno gakkanaas istas doccissiza Ayana immides” geetetti Geeshsha Maxaafan xaafettida mala.

⁹ Dawuteykka “Ista maadday ista oykiza narxanne yarde; istas dhuphizazinne qixaate gido.

¹⁰ Ista ayfey xeellofo; goozzetto; ista zokkoy mernas kuunno” gides.

¹¹ Ane qasse ta zaara oychays; Isra7eele asay nam7antho kundethafe dendennee? Dendana. Harappeka Isra7eele nayta qanatissana gish ista mooro gaason atotethi Ayzaabetas gakkides.

¹² Gido attin qasse ista mooroy Ayzaabetas anjo gidides. Ista kundethikka qasse Ayzaabetas anjo gidikko isti simmi attidakko ay mala gita anjo gidandeshin!

¹³ Ayzaabeto! Ta intes yootays, ta Ayzaabetas kiitettidade gidida gish ta oosoza minnada polana.

¹⁴ Hessika ta bagga asati amozana mala denthethada istafe guutha asata ashshanas ufayssa ooththays.

¹⁵ Xoossi ista aggida Ayzaabeti Xoossara giigikko Xoossi Isra7eele nayta zaaridi ekkiza wode intes aazi hanana misatizee? Hessa guussi “Hayqoppe dendides” guussa mala.

¹⁶ Koyro bukeesoy lo7o gidikko hanko izappe oosettizays wurikka lo7o gides. Hessathoka issi mitha xaphoy lo7o gidikko hanko iza bolla diza haggatikka lo7o gidettes.

¹⁷ Keeththa matan diza wogara mitha haggata malati inte meqqi wodhdhin hanko woran diza wogara mithata misatiza Ayzaabeti inte kichchosan gididi inte haaronne inte anjo shaakki ekkizadenta gidikko;

¹⁸ heyta he meqqi wodhdhida haggata bolla otoretofa. Inte ista bolla otoretikko qasse hanno woznan woththite. He mitha tookkiday nena gidakka. Mithay nena tookkides attin.

¹⁹ Histikko “He haggati meqqi wodhdhiday nuni isti kichchosan gelana malassa” goonta aggeketa.

²⁰ Tumu gideta shin isti meqiday ammano paceppe dendidayssanna. Inte qas ammanon eqideta. Babbite attin otoretofte.