ኦሮሜ 10:9-19 in Gamo

⁹ ኔኒ ኔ ዱናራ “ዬሱሲ ጎዳ” ጋዳ ማርካቲኮ ፆሲ ኢዛ ሃይቆፔ ዴንꬂዳይሳ ኔ ዎዝናን ኔ ኣማኒኮ ኣታና።

¹⁰ ኔኒ ፂላናይ ዎዝናን ኣማኒኮኔ ኣታናይ ኔ ዱናራ ማርካቲና።

¹¹ ጌሻ ማፃፋይ ጊዛ ማላ “ኢዛን ኣማኒዛይ ዉሪካ ዬላቴና።”

¹² ኣይሁዳታ ጊዶኒኔ ኣይዛቤታ ጊዶን ዱማቴꬂ ዴና፤ ኢሲ ጎዳይ ኡባስካ ጎዳ፤ ኢዛ ዎሲዛይታ ጉጂ ኣንጄስ።

¹³ “ጎዳ ሱንꬅ ፄይጊዛይቲ ዉሪካ ኣታና” ጌቴቲ ጌሻ ማፃፋን ፃፌቲዴስ።

¹⁴ ሂስቲን ኢዛ ኣማኖንታይቲ ኢዛ ዎዝጊ ፄይጋኔ? ቃሴ ኢዛ ጊሽ ሲዮንታ ዲሼ ዎስቲ ኣማናኔ? ሳባኬይ ባይንዳ ዲሺን ዎስቲ ሲያኔ?

¹⁵ ኪቴቶንታ ዎስቲ ሳባካንዴቶ? ሄሲካ “ሚሺራቾ ቃላ ኤኪ ዪዛይታ ዩሲ ኣይ ማላ ሎዖ” ጌቴቲ ጌሻ ማፃፋን ፃፌቲዳ ማላ ሃኒዴስ።

¹⁶ ጊዶ ኣቲን ሲዪዳይቲ ዉሪካ ሚሺራቾ ቃላ ኤኪቤቴና፤ ኢሳያሲ “ጎዶ ኑ ዮቲዳይሳ ኦኒ ኣማኒዴ?” ጊዳ ማላ ሃኒዴስ።

¹⁷ ሄሳ ጊሽ ኣማኖይ ቤቲዛይ ዮቲዛ ቃላ ሲዬꬃና። ዮቴቲዛ ቃላይካ ኪርስቶሳ ጊሽ ዮቲዛ ቃላፔ።

¹⁸ ጊዶ ኣቲን ኣሳይ ሲይቤኔሻ? ጋዳ ታ ኦይቻይስ፤ ቱማፔ ኣሳይ ሲይዴስ፤ ጌሻ ማፃፋን ፃፌቲዳ ማላ “ኢስታ ቃላይ ቢታ ኡባኒኔ ኣላሜ ጋፃ ጋካናስ ሲዬቲዴስ።”

¹⁹ ታ ቃሴካ ኦይቻይስ፤ ኢስራዔሌ ናይቲ ቃላ ኤሪቤቴኔሻ? ኮይሮ ሙሴይ ኢስታስ “ታ ዴሬ ጊዶንታይታን ታ ኢስታ ኣሞሲሳና፤ ዩሺ ቆፖንታ ዴሬታን ታ ኢስታ ዪሎቻና” ጊዴስ።

⁹ Neni ne duunara “Yesusi Goda” gaada markattikko Xoossi iza hayqoppe denthidayssa ne woznan ne ammanikko attana.

¹⁰ Neni xillanay woznan ammanikkonne attanay ne duunara markatiinna.

¹¹ Geeshsha Maxaafay giza mala “Izan ammanizay wurikka yeellatenna.”

¹² Ayhudata giddoninne Ayzaabeta giddon dummateththi deenna; issi Goday ubbaska Goda; iza woossizayta gujji anjees.

¹³ “Goda sunth xeygizayti wurikka attana” geetetti Geeshsha Maxaafan xaafetides.

¹⁴ Histin iza ammanontayti iza wozgi xeeyganee? Qasse iza gish siyonta dishe wosti ammananee? Saabakey baynda dishin wosti siyanee?

¹⁵ Kiitetonta wosti sabakandetoo? Hessika “Mishiraachcho qaala ekkii yizayta yuussi ay mala lo7o” geetetti Geeshsha Maxaafan xaafettida mala hanides.

¹⁶ Gido attin siyidayti wurikka Mishiraachcho qaala ekibettenna; Isayaassi “Godo nu yootidayssa ooni ammanidee?” gida mala hanides.

¹⁷ Hessa gish ammanoy beettizay yootiza qaala siyethanna. Yootetiza qaalaykka Kirstoosa gish yootiza qaalappe.

¹⁸ Gido attin asay siybeneshaa? gaada ta oychays; tumappe asay siydes; Geeshsha Maxaafan xaafettida mala “Ista qaalay biitta ubbaninne alame gaxa gakkanaas siyetides.”

¹⁹ Ta qasseka oychays; Isra7eele nayti qaala eribeteneshaa? Koyro Musey istas “Ta dere gidontaytan ta ista amosisana; yuushi qopponta deretan ta ista yiillochana” gides.