Oel 2:4-29 in Tabo

⁴ Ba꞉ba tetelo Godokono Gobogobote ibi hiliyonomo da꞉tabuilamiya꞉, ebete ibi ba heluilame komo kapela tawakalubino hiya꞉hiya꞉ tabamo olamagimi ba꞉bo tupuimiya꞉.

⁵ Ba꞉bema꞉ buka ka꞉lamiholedawa, ama꞉ numa꞉, ba꞉be Pentekose Poko hegela peheno dopamo komo Yunapi ba꞉gala komo Yuha꞉pi Godoko dadikuminakui, ibi hiliyonomate ibino hiya꞉hiya꞉ muhulu hopone Yelusalema ko habamo pelameholiya꞉ ba꞉be poko kapimilo kopododima꞉.

⁶ Ba꞉bene Godote ebeno Gobogobo Ya꞉sukunu hibima꞉ midipa꞉tamo ko diyamago da꞉poemiya꞉, hiya꞉hiya꞉ hopone pokoma꞉ da꞉pelamiya꞉ komo ibi hiliyonomate ba꞉be diyamo uliti hibi komo kumima꞉ ba꞉bo pekapiyuya꞉. Ba꞉bema꞉ iba꞉te koamo hanohanohutiya꞉ mabu hibima꞉ midipa꞉te Yu tawakalubino tabamo kaga꞉lutiya꞉ha꞉ huiyatiya hiya꞉hiya꞉ tabamo ga꞉lutiya꞉, ba꞉ma ka꞉na ulihopi ipuwalo etate ebeno tabonomo ulinakui, etate atumu ebeno tabonomo akulinakui, ibi hiliyonomate ba꞉ba ka꞉na ewagelitiya꞉.

⁷ Ba꞉bene iba꞉te la꞉wa꞉hate ba hanohanoho na꞉ga꞉luya꞉, “Ba꞉moe tabo da꞉ga꞉luta, ba꞉moi tawakalubi aeno hoponapiha꞉, ibi ba꞉ Ga꞉lili hoponapila,

⁸ ba꞉bema꞉ keba ka꞉nala꞉ka꞉ iba꞉te aeno hiya꞉hiya꞉ tabonomamo da꞉ga꞉luta a nulihutama꞉?

⁹ A꞉iye, a hiliyonomate komo muhulu hopone pelameholima꞉! Iyo, a komo Patiyanapila, Midiyanapila, Ilamanapila, ba꞉gala Mesopotemiyanapila, ba꞉gala komo a Yudiyanapila, Ka꞉padosiyanapila, Pontasenapila, ba꞉gala A꞉isiyanapila.

¹⁰ Ba꞉gala a komo Piligiyanapila, Pa꞉mapiliyanapila, ba꞉gala Isipitinapila, hibila, komo a Sailiniya haboeno Libiya hopone pelamima꞉, ba꞉gala komo a Loma ko habane da꞉pelamima꞉ ba꞉bi tawakalubila.

¹¹ Numa꞉la꞉, a ipuwalo komo Yu tawakalubinomola, ba꞉gala a komo Yu tawakalubiha꞉ huiyatiya ale iba꞉godone hibi Godo adikumi komo belawiya꞉ma꞉, iyo, a komo Kulitinapila ba꞉gala komo Alebiyanapila, ba꞉bema꞉ ba꞉moi tawakaluba꞉te Godokono koko ododili komoma꞉ da꞉ga꞉luta, ale aeno hiya꞉hiya꞉ tabonomamo badama꞉ kulihutama꞉?”

¹² Ba꞉be mabuma꞉ ibi hiliyonomate hanohanoholo ukui bilibilima꞉ ba eda꞉ha, etate etatamo goenakui, etate etatamo goenakui, ba꞉ba ka꞉na ewagelitiya꞉, “A꞉iye! Ba꞉moe komoeno ipuwa keba ka꞉nala꞉ka꞉?”

¹³ Huiyatiya komopa꞉te Ya꞉sukunu oelamepi dubu ba walilatele na꞉ga꞉luya꞉, “Ba꞉moi dubate helo gao beya nihote da꞉wigulamehole, ba꞉bema꞉ daedaeholita!”

¹⁴ Ba꞉bene Pitate komo 11 oelamepi dubago mahigate ebeno tabo madodo hunamo ba adipate tawakalubi hiliyonomatamo ba꞉ma ka꞉na olamagiya꞉, “Naeno Yu mabuluba꞉la꞉, ba꞉gala komo la꞉ Yelusalemamo da꞉pelameholima la꞉ hiliyonomo atumu, nale ba꞉moe komoeno ipuwa la꞉tamo kohawakalimima꞉nemo, ba꞉bema꞉ wadiyala la꞉ naeno tabo hidamo nulia꞉la꞉.

¹⁵ Ba꞉moi dubu la꞉le helo gao beya nihoma꞉ da꞉ga꞉lutama, ebe tabo hibiha꞉. Iba꞉te helo gao beya kanihakaha꞉, mabu hibila, dubate helo gao beya duiduiyalo a꞉kanihala꞉. Numa꞉la꞉, hegela ka꞉ma꞉ podoluta!

¹⁶ Huiyatiya ba꞉moe komo ba꞉ Godokono ukui hawakalimidawa Yowelate dopamo dolamagiya꞉, ba꞉be tabola.

¹⁷ Iyo, Godote Yowelako ipuwado tabo ba꞉ma ka꞉na goiya꞉, ‘Ba꞉moe hopoeno kuititi tetelo na Godote naeno Gobogobo hiliyonomo tawakalubi hunamo kohaminama꞉nemo. Ba꞉ba tetelo la꞉eno kuhi ba꞉gala bohelemele, iba꞉te naeno ukui hibilo kohawakalimima꞉na꞉, ba꞉gala la꞉eno uli ape dubuino baiditi hiya꞉ma꞉ eda꞉halamete koko komokomo kulameholema꞉na꞉, ba꞉gala la꞉eno kadelekadela꞉te atumu hiyolo naeno komokomo kiya꞉tawahama꞉na꞉.

¹⁸ Iyo, ba꞉ hibila, ba꞉be hegelalo naeno huiyaha꞉ okopi dubu ba꞉gala kamenakamena, nale ibi hunamo naeno Gobogobo da꞉haminamo, iba꞉te naeno ukui hibinomolo ba꞉bo kohawakalilamema꞉na꞉.

¹⁹ Ba꞉bene nale alomo hunulu koko hanohano komo kododilima꞉nemo, ba꞉gala hopo habalo nale atumu iwawi komokomo ba pododili, tawakaluba꞉te hawi ka꞉ka꞉la꞉ komo ba꞉gala koe ba꞉gala ahuta kulamema꞉na꞉.

²⁰ Ba꞉ba tetelo hegelate kuduma꞉ne, ba꞉gala manomete hawihawinomoma꞉ keda꞉ma꞉ne, ba꞉bene Kodawoeno Ko Hegelate ko alonomago kopuluhukuma꞉ne.

²¹ Ba꞉bema꞉ hibila, puya꞉te Kodawoeno mahilo da꞉ka꞉mimina꞉ Godote ibino ka꞉ka꞉ ba꞉bo komula꞉lelamema꞉ne.’”

²² Ba꞉bene Pitate tabo moga꞉melo gala na꞉kagoiya꞉, “La꞉ Isalaelanapi tawakaluba꞉la꞉, la꞉ ba꞉moe tabo nulia꞉la꞉. La꞉ iya꞉tawahanomola ba꞉moe Ya꞉suku Nasaletenapi Godote hopo habamo poemiya꞉, mabu Godote ebe ipuwado koko hanohano komo ba꞉gala iwawi komo la꞉godolo ba pododili ebeno helo a꞉pehawakalimi.

²³ Ba꞉ hibila, ba꞉moe hopo konomolo eta komote uluhukuhino Godote ba꞉be komo dopamo kiya꞉tawama꞉ne. Ba꞉bema꞉ ebeno mulu iya꞉tawa komodo ebete nopo ba꞉ma ka꞉na ihatiya꞉, ebete Ya꞉suku la꞉eno kokotamo ihatete, ba꞉bene kuba ododilipa꞉te la꞉ ba owalubili la꞉le ebe lawete keha pihigamo pihomotete ikoko ba꞉bo alukulimimata, iyo, la꞉le ebe ba꞉moe gabodo anakapumimata.

²⁴ Huiyatiya Godote Ya꞉sukunu hoe temeteme pahalamilimiti ebe hoe ipuwane ba꞉bo adipati, mabu hoete ebe lawema꞉ helo puliyala.

²⁵ Ba꞉be mabuma꞉ Da꞉ibiditi Godokono heloamo Ya꞉sukunu komoma꞉ tabo ba꞉ma ka꞉na miya꞉tiya꞉, ‘Na Kelisote naeno Kodawa Godoko na tamenomolo buminamo, iyo, ebete naeno tu hapulu ba꞉la꞉na nale waguwagukapoma꞉.

²⁶ Ba꞉bema꞉ naeno tepo ipuwate ba moena, nale ko kalakalago olamaginakomo, iyo, nale Godoko hibima꞉ midi ipuwalo ba emedena, naeno apeno hoe komoma꞉ nale a꞉ka-ukuibilibila꞉mo.

²⁷ Mabu, Godo, ama꞉le naeno ape ha꞉lahapino habalo a꞉kamiya꞉pamena꞉ta, iyo, amia꞉no Talona Guduti da꞉hoemene, ama꞉le ebeno abale komo duhimiti ebe ka꞉ka꞉mo gala kakadipatema꞉na꞉ta.

²⁸ Ba꞉ hibila, ama꞉le na ka꞉ka꞉ gabo ya꞉lo iya꞉tunamiya꞉ta, ba꞉bene nale amia꞉no holoholo hapuamo da꞉puluhukumu, ama꞉le natamo ko kalakala kikanamema꞉na꞉ta.’”

²⁹ Ba꞉bene Pitate tabo moga꞉melo gala na꞉kagoiya꞉, “Ekaka꞉la꞉, na hilopoheno aeno iniwa Da꞉ibidikono komo hawakalimima꞉ la꞉tamo kolamagima꞉nemo. Ebete ba꞉moe tabo Godokono Bukamo da꞉miya꞉tiya꞉ ebeno komoma꞉ kamiya꞉tiya꞉ha꞉, mabu numa꞉la꞉, ebete da꞉hoiya꞉ iba꞉te ebe bobamo ihatiya꞉, ba꞉bene ka꞉lo ebeno bobo haba agodolo bitama꞉na.

⁴ Ebe tetelo Godokono Uliyanate ibi bilibilinomo detabokailamiya, ebete ibi elawokobi eba midililo kapela epo epetapino iyaiya tabamo kiyawao ebo wagilimiya.

⁵ Ebema꞉ buka ka꞉la꞉mioledawa, a꞉ma꞉ numa꞉, ebe Pentekose Soliyomu egela pea꞉no dopamo Yu epo epetapi ega꞉walo Yua꞉pi epo epetapi Godoko damamatenamiya, ibi bilibilinomate ibino iyaiya mulu opone Yelusalema kawo duliyomolamo pelamoliya ebe soliyomu kapimiya ka꞉posiyodiloma꞉.

⁶ Ebene Godote ebeno Uliyana Ya꞉sukono nanitabokobi midipiatamo kawo diyamago dapalibiya, iyaiya opone soliyomuma꞉ da꞉pelamiya ebe epo epetapi bilibilinomate ebe diyamo olowite ebe tanalo kuima꞉ ebo paladabutiya. Ebema꞉ iba꞉te kawonomamo anoanoutiya mabu nanitabokobi midipiate Yu epono tabamo kegelitiya꞉ wiyasiya iyaiya tabamo gelitiya, ma kunu olowiopino taneba magumulo idawate ebeno tabonomo olowinaki, idawate atumu ebeno tabonomo ako-olowinaki, ibi bilibilinomate eba kunu wagelitiya.

⁷ Ebene iba꞉te la꞉wa꞉ote eba anoanolo negeliya, “Me tabo degelita, me epo aimano opo epoa꞉, ibi Ga꞉lili opo epola,

⁸ ebema꞉ keba kunula꞉ka꞉ iba꞉te aimano iyaiya tabonomamo degelita a nolowiutama꞉?

⁹ Eiye, a bilibilinomate mulu opone pelamolima꞉! Iyo, a epetapi Patiya opo epola, epetapi Midiya opo epola, epetapi Ilama opo epola, ega꞉walo epetapi Mesopotemiya epola, ega꞉walo a epetapi Yudiya epola, epetapi Ka꞉padosiya epola, epetapi Pontase epola, ega꞉walo epetapi A꞉isiya epola.

¹⁰ Ega꞉walo a epetapi Piligiya epola, epetapi Pa꞉mapiliya epola, ega꞉walo epetapi Isipiti epola, nanitabola, a epetapi Sailiniya duliyomolono Libiya opone pelaima꞉, ega꞉walo a epetapi Loma kawo duliyomolone da꞉pelaima꞉ ebe epola.

¹¹ Numa꞉la꞉, a magumulo epetapi Yu eponomola, ega꞉walo a epetapi Yu epoa꞉ wiyasiya ale iba꞉godone nani Godo amamate tanalo lawiyama꞉, iyo, a epetapi Kuliti opo epola ega꞉walo epetapi Ala꞉biya opo epola, ebema꞉ me epate Godokono kawokawo osiyodilole tanaloma꞉ degelita, ale aimano iyaiya tabonomamo beda꞉ma꞉ kolowiutama꞉?”

¹² Ebe mabuma꞉ ibi bilibilinomate anoanolo woki bilibilima꞉ eba eda꞉olo, idite iditamo genaki, idite iditamo genaki, eba kunu wagelitiya, “Eiye! Me tanalono magumu keba kunula꞉ka꞉?”

¹³ Wiyasiya epetapiate Ya꞉sukono alibolepi dubu eba kalakalatelelo negeliya, “Me dubate elawo da꞉imi obo niote da꞉ugulamole, ebema꞉ daedaleuta!”

¹⁴ Ebene Pitate 11 alibolepi dubu epetapiago maigate ebeno tabo madodo unamo eba adipatelo epo bilibilinomatamo ma kunu kiyawaiya, “Naimano Yu namutupiala꞉, ega꞉walo la꞉ epetapi Yelusalemamo da꞉pelamola꞉ima la꞉ bilibilinomo atumu, nale me tanalono magumu la꞉tamo kawokalimamo, ebema꞉ modobola la꞉ naimano tabo wadenomamo nolowiala꞉.

¹⁵ Me dubu la꞉le elawo da꞉imi obo nioma꞉ degelawitama, ebe tabo nanitaboa꞉. Iba꞉te elawo da꞉imi obo ka꞉niaka꞉, mabu nanitabola, dubate elawo da꞉imi obo duiyalo ka꞉nionakoa꞉. Numa꞉la꞉, egela ka꞉ma꞉ podoluta!

¹⁶ Wiyasiya me tanalo ebe Godokono woki awokalimidawa Yowelate dopamo da꞉kiyawaiya, ebe tabola.

¹⁷ Iyo, Godote Yowelado tabo ma kunu giya, ‘Me opono uwomu tetelo na Godote naimano Uliyana epo bilibilinomono unamo kadipanamamo. Ebe tetelo la꞉imano koikoila buwelemelela, iba꞉te naimano woki nanitabolo kawokalima꞉na꞉, ega꞉walo la꞉imano oli ape dubuno balidite iyama꞉ eda꞉olamete kawokawo tanalo kulamolema꞉na꞉, ega꞉walo la꞉imano kadelekadela꞉te atumu iyolo naimano iyaiya tanalo kiyatawaoma꞉na꞉.

¹⁸ Iyo, nanitabola, ebe egelalo naimano wiya꞉ wokopi dubula kamiyalela, nale ibi unamo naimano Uliyana dadipanamo, iba꞉te naimano woki nanitabonomolo ebo kawokalilaema꞉na꞉.

¹⁹ Ebene nale tobolo unulo kawokawo anoano tanalo kosiyodilolemamo, ega꞉walo me opolo nale atumu weweda꞉ tanalo eba posiyodilolelo, epate kalima ka꞉ka꞉liya tanalo ega꞉walo ela ega꞉walo ela tema kulaema꞉na꞉.

²⁰ Ebe tetelo egelate kidokomene, ega꞉walo saganate kalimakalimanomoma꞉ keda꞉mene, ebene Kawodawano Kawo Egelate kawo alonomago ka꞉pemaigamene.

²¹ Ebema꞉ nanitabola, piyate Kawodawano mailo deka꞉ima꞉na꞉ Godote ibino igilo ebo ka꞉mula꞉lelaemene.’”

²² Ebene Pitate tabo moga꞉melo walo na꞉kegiya, “La꞉ Isalaela epala꞉, la꞉ me tabo wadenomamo nolowiala꞉. La꞉ iyatawanomolata, me Nasalete duliyomolodawa Ya꞉suko Godote me opamo palibiya, mabu Godote ebedo kawokawo anoano tanalo ega꞉walo weweda꞉ tanalo la꞉godolo eba posiyodilolelo ebeno elawo apawokalimi.

²³ Nanitabola, me opo kawonomolo tanalo idite pemaiga꞉no Godote ebe tanalo dopamo kiyatawamene. Ebema꞉ ebeno mulo iyatawa tanalodo ebete nopo ma kunu iyatiya, ebete Ya꞉suko la꞉imano kotamo iyatite, ebene kuba osiyodilolepiate la꞉ eba walubililo la꞉le ebe lawa꞉wete kewa olotowamo tupuguima꞉wete ikoko ebo anagilamoleimata, iyo, la꞉le ebe me gabodo anakapuimata.

²⁴ Wiyasiya Godote Ya꞉sukono a꞉e temeteme palamilimite ebe a꞉e magumune ebo adipati, mabu a꞉ete ebe laema꞉ elawo puliyala.

²⁵ Ebe mabuma꞉ Da꞉ibidite Godokono elawamo Ya꞉sukono tanaloma꞉ tabo ma kunu akuloliya, ‘Na Kelisote naimano Kawodawa Godoko na niyakabonomolo uminamo, iyo, ebete naimano tumudi apulo utina nale alegaokapoma꞉.

²⁶ Ebema꞉ naimano tepo magumute eba maenalo, nale kawo kalakalago kiyawaonakomo, iyo, nale Godoko nanitabokobi midi magumulo eba okolinalo, naimano apeno a꞉e tanaloma꞉ nale woki bilibilima꞉ a꞉keda꞉mo.

²⁷ Mabu, Godo, a꞉ma꞉le naimano ape a꞉elaopino opolo akatepaemene, iyo, a꞉imano Talena Gudute da꞉emene, a꞉ma꞉le ebeno abale tanalo odiyobawete ebe igilamo walo kakadipatema꞉ta.

²⁸ Nanitabola, a꞉ma꞉le na igilo gabo iyalo iyatunamiyata, ebene nale a꞉imano ololo apuamo da꞉pemaigamo, a꞉ma꞉le natamo kawo kalakala kikanaema꞉ta.’”

²⁹ Ebene Pitate tabo moga꞉melo walo na꞉kegiya, “Ekakiala꞉, na ilipoa꞉no aimano ewono Da꞉ibidikono tanalo awokalima꞉ la꞉tamo ka꞉kiyawaomamo. Ebete me tabo Godokono Bukamo dakuloliya ebeno tanaloma꞉ kakuloliya꞉, mabu numa꞉la꞉, ebete da꞉iya iba꞉te ebe bobamo iyatiya, ebene ka꞉lo ebeno bobote agodolo bitamena.