1 Iwe, Miriam me Aaron ra esita Moses pokiten ewe fin Kuus Moses a pwülüeni.
2 Ra apasa, “Ifa usun, ewe Samol mi Lapalap a chök wesewesen fos ngeni Moses? Esap pwal fos ngenikich?” Iwe, ewe Samol mi Lapalap a rong ei fos.
3 Nge Moses eman mwän mi tipetekison, a fokun tipetekison seni aramasen fanüfan meinisin.
4 Iwe, ewe Samol mi Lapalap a müttir kapas ngeni Moses, Aaron me Miriam, “Oupwe towu ämi me ülüman o feila ren ewe imw mangaku ia aramas ra churiei ie.” Iwe, ir me ülüman ra feila.
5 Mürin, ewe Samol mi Lapalap a feitiu lon eu ürekuchu, a ütä leasamalapen ewe imwenfel seni mangaku o körato Aaron me Miriam. Iwe, ir me ruoman ra feito.
6 Iwe, a üreniir, “Oupwe aüseling ai kapas: Are mi wor eman soufos leimi, ngang ewe Samol mi Lapalap üpwe pwäri ngeni üsi lon künan, üpwe pwal kapas ngeni lon an tan.
7 Nge esap iei usun ren nei ei chon angang Moses. Pun üa lükü ngeni nei aramasen Israel meinisin.
8 Üa fos newenewen ngeni lon kapas mi fat, nge sap lon kapas monomon. Nge i a fen küna lapalapei. Pwota chök ousap niuokus le esita nei ei chon angang Moses?”
9 Iwe, ewe Samol mi Lapalap a song ngeniir. Mürin a feila seniir.
10 Nge lupwen ewe kuchu a wiitä seni ewe imw mangaku, nengeni, Miriam a üri rupun pwötür pwe inisin a pwechepwech usun snow. Iwe, Aaron a sap ngeni Miriam o küna pwe a üri rupun pwötür.
11 Mürin, Aaron a üreni Moses, “Ai samol, kose mochen kosap amwöchü äm tipis aia föri ngonuk lon äm miritingau.
12 Kosap mwütätä pwe Miriam epwe wewe ngeni eman mi mäla, lupwen a uputiu, mi pweila esop fitukan.”
13 Iwe, Moses a siö ngeni ewe Samol mi Lapalap, “Üa tüngor ngonuk ai Kot, kose mochen kopwe apöchöküla neminei.”
14 Nge ewe Samol mi Lapalap a üreni Moses, “Ifa usun, are saman a atufa mesan, neminewe esap säw lon ükükün fisu rän? Epwe kaimwüla lükün ewe ia oua nonom ie lon ükükün fisu rän, mürin a tongeni liwinsefäl.”
15 Iei mine Miriam a imwüla lükün ewe ia ra nonom ie lon ükükün fisu rän. Iwe, ekewe aramas resap sai tori Miriam a liwiniti lenier we.
