1 Dutun te migkampu is menge Israilihanen diyà te Shitim, is menge maama kandan mibpuun mebpekidhilavet te menge vahi he Moabitanhen.
2 Heini is menge vahi mid-iniyat kandan te kedtampu te kebpemuhata zan te menge ed-ezapen dan, ne migkaan haazà is menge maama te impemuhat ne mid-azap dan haazà is menge ed-ezapen.
3 Umbe, neketampu is menge Israilihanen te ked-azap ki Baal ziyà te Peor. Ne utew sikandan nepeuki te Nengazen.
4 Ne migkeǥiyan te Nengazen si Moises te, “Kuwaa nu is langun he pengulu kayi he menge etew, ne penhimetayi niw ziyà te etuvangan ku wey etuvangan te menge etew, su para mevehew is utew ku kegkepeuki te menge Israilihanen.”
5 Umbe, migkeǥiyan ni Moises is menge zatù te Israel te, “Kinahanglan he edhimetayan te kada sevaha keniyu is menge etew niw he midtampu te ked-azapa ki Baal ziyà te Peor.”
6 Duen sevaha he Israilihanen he miduma zin is bahi he Midianhen diyà te pemilya zin. Naahà heini ni Moises wey te tivuuk he keet-etawan te Israel dutun te edsineǥew sikandan diyà te gemawan te Tulda he Edtelevukaayan.
7 Ne hein naahà haazà ni Finehas he anak ni Eleazar wey apù ni Aaron he memumuhat, mid-awà sikandin diyà te ketiǥuman ne migkuwa te vangkew.
8 Ne midtundug din haazà is etew pehendiyà te kedseled din te tulda zin ne impedlembasè din te edtiyuk duen te vangkew zin haazà is maama wey vahi. Ne neengked is limas diyà te menge Israilihanen,
9 piru 24,000 is neǥerà tenged te limas.
10 Migkaǥi is Nengazen diyà te ki Moises te,
11 “In-awà ni Finehas he anak ni Eleazar wey apù ni Aaron he memumuhat is kegkepeuki ku te menge Israilihanen, su pinaaǥi te mibeelan din impeehè din is kegkepeuki ku te menge Israilihanen, umbe wazè ku sikandan emina te ebpenhimatey he iyan pezem ebeelan ku tenged te kegkepauk ku.
12 Umbe, keǥiyi nu sikandin he ebpekid-uyun a kandin he edtuvazan ku is kebpekesavuk din.
13 Ne uyun heini he ebpedayun is kegkememumuhat din su pehendiyè en te kegkelapislapis te menge kevuwazan din taman te taman, su impeehè din is utew zin kegkepauk tenged te salà ne mibelukasan din is menge Israilihanen te menge salè dan.”
14 Is Israilihanen he minatey zuma zuen te vahi he Midianhen iyan si Zimri he anak ni Salu, he pengulu te sevaha he pemilya te kevuwazan ni Simeon.
15 Ne sikan is bahi he Midianhen ne iyan si Cozbi he anak ni Zur he sevaha he pengulu te sevaha he pemilya he Midianhen.
