18 Dutun te ebmelig-en is Israel, edsekupen din is Edom he kuntada zin, he egngezanan daan te Seir.
19 Edumala is sevaha he pengulu te Israel ne edezeetan din is egkesamà he menge uuyag diyà te inged he Moab.”
20 Naahà ni Balaam diyà te kebpekelawas din is menge etew ni Amalek ne migkaǥi sikandin te, “Dengan iyan lavew he nasyun is Amalek, piru te huziyan he timpu egkezeetan heini.”
21 Ne naahà daan ni Balaam diyà te kebpekelawas din is menge Kinhanen, ne migkaǥi sikandin te, “Melig-en is ubpeey niw su ziyà heini te vatu he vuvungan.
22 Piru egkezeetan kew emun ebihaǥen kew en te Asiria.”
23 Migkaǥi pa ni Balaam heini he menge lalag: “Hentei vuwa is egkesamà he uuyag emun ebeelan en heini te Megbevayà?
24 Ebpekeuma is menge varku he ebpuun diyà te Kitim ne edsekupen dan is menge etew ziyà te Asiria wey Eber. Piru egkezeetan daan is Kitim.”
