11 “Egiptod̶eba ẽberãrãda cãbana mʌ̃ druad̶e jũẽsid̶aa. Mʌ̃ druara maʌ̃ ẽberãrãba ab̶ed̶a birasia. Maʌ̃ carea ãdjirã biẽ́ jara b̶ʌd̶e zedua. Mãwã mʌ̃a ãdjirãra poyaped̶a mʌ̃ druad̶ebemada poya ãyã jʌrecuaisicada.”–
12 Ãcõrẽba Balaaʌ̃a jarasia: –Naʌ̃ ẽberãrã ume wãrãdua. Ãdjia jara panʌ ẽberãrãra biẽ́ jara b̶ʌrãdua mʌ̃a ãdjirãra careba b̶ʌ bẽrã.–
13 Nurẽma Balaaʌ̃ra pirab̶ariped̶a Balába diabued̶a dji dromarãa nãwã jarasia: –Bãrã druad̶aa jẽda wãnadua. Ãcõrẽba mʌ̃ra bãrã ume idu wãbiẽ́a.–
14 Moab druad̶ebema dji dromarãra jẽda Balámaa wãnaped̶a jarasid̶aa: –Balaaʌ̃ra dairã ume ze quĩrĩãẽ́ basía.–
15 Maʌ̃ carea Balába wayacusa dewararãda Balaaʌ̃maa diabuesia. Maʌ̃gʌrãra dji naãrã wã panana cãyãbara dji dromaara b̶easia idjab̶a cãbanaara wãsid̶aa.
16 Ãdjirãra Balaaʌ̃ma jũẽnaped̶a jarasid̶aa: –Zipor warra Balába nãwã jarabisia: “Mʌ̃ quĩrã djuburia bʌra mʌ̃maa ze ama b̶arãdua.
17 Mʌ̃a bʌ́a paratada waib̶ʌa diaya. Idjab̶a jũma bʌa jarabʌrʌ quĩrãca mʌ̃a oya. Maʌ̃ bẽrã mʌ̃ quĩrã djuburia naʌ̃ ẽberãrãra biẽ́ jara b̶ʌd̶e zedua.”–
18 Baribʌrʌ Balaaʌ̃ba panusia: –Balába idji de parataba idjab̶a oroba bira cob̶ʌda diabʌrʌ sid̶a mʌ̃a ni cãrẽ sid̶a oẽ́a mʌ̃ Boro Ãcõrẽba mãwã obiẽ́bʌrʌ.
19 Mʌ̃ djuburia bãrã sid̶a id̶i nama cãĩnadua. Naʌ̃ diamasi Ãcõrẽba mʌ̃́a quĩrã awara jaraisicada.–
20 Maʌ̃ diamasi Ãcõrẽra Balaaʌ̃ma odjaped̶a nãwã jarasia: –Naʌ̃ ẽberãrãba bʌ jʌrʌd̶e ze panʌ bẽrã ãdjirã ume wãdua. Baribʌrʌ ab̶abe odua mʌ̃a bʌ́a jarabʌrʌ quĩrãca.–
21 Nurẽma Balaaʌ̃ra pirab̶ariped̶a idji burro ʌ̃rʌ̃ chũmebarira jʌ̃ped̶a Moab druad̶ebema dji dromarã ume wãsia.
22 Balaaʌ̃ nezocarãda umé idji ume wãsid̶aa. Idjira burro ʌ̃rʌ̃ nĩbasia. Baribʌrʌ idji wãbʌrʌ carea Ãcõrẽra bio quĩrũsia. Maʌ̃ bẽrã Ãcõrẽ nezoca bajãnebemada idji nocod̶aa wãrãmãrẽã o ẽsidra nũmesia.
23 Djõbada necoda idji jʌwad̶e erob̶asia. Balaaʌ̃ burroba idjira o ẽsidra nũmʌda unusid̶e o ãyã wãsia. Maʌ̃ carea Balaaʌ̃ba idji burrora ubadjia wayacusa od̶aa wãmãrẽã.
