12 Piru migkaǥi is Nengazen diyà te ki Moises wey ki Aaron te, “Tenged te wazè kew medsarig kedì pinaaǥi te kebpaahà te kegkewaǥas ku ziyà te etuvangan te menge Israilihanen, kenè kew iyan ebpekepengulu te keduma kayi te menge etew pehendiyà te tanà he ibeǥey ku kandan.”
13 Haazà he lugar migngezanan te serebseb te Meriba su mibpekidlalis is menge Israilihanen te Nengazen kayi he lugar, wey kayi zaan ipaahà te Nengazen kandan is kegkewaǥas din.
14 Hein diyè pa te Kadesh is menge Israilihanen, impehendiyà ni Moises is menge menunudtulè din te hadì diyà te Edom. Iyan heini impetudtul ni Moises kandan, “Heini he lalag ebpuun diyà te menge kezuzumahi nu he menge etew te Israel: Netuenan nu is langun he kemeresayan he neeǥiyan dey.
15 Is menge kepuun dey midhendiyà te Ehipto, ne neuǥet is ked-ubpè dey ziyà. Impaantus key wey is menge kepuun dey te menge Ehiptohanen,
16 piru mibuyù key te tavang diyà te Nengazen ne mibpemineg key zin, ne midsuǥù sikandin te velinsuǥuen he mibpeǥawas kenami ziyà te Ehipto. “Guntaan kayi key te Kadesh he inged he uvey te tanè nu.
17 Emun egkehimu ne ituǥut nu kenami is kebayà diyà te tanè nu. Kenè key ebayà diyà te menge bevesukè nu etawa pemuleey nu te paras wey kenè key ed-inum diyà te teheb. Diyè key zà ed-ikul te zekelà he beyeey ne kenè key en ebpenuweysuwey taman te ebpekeǥawas key puun te tanè nu.”
18 Piru iyan heini tavak te hadì te Edom: “Kenà egkehimu ke ebayè kew kayi te kenami. Emun ebayè kew, edsurungen dey sikiyu ne ebpenhimetayan.”
