1 Gorere vada e doko murinai, Iehova ese Mose bona Eleasara Aaron, hahelaḡa tauna, e hereva henidia, eto,
2 Israel oreana taudia ibouboudiai ba duahidia, laḡani ruahui vada e hanai taudia iboudiai. Iduhu ta ta amo ba duahidia, tuari mai dibadia taudia iboudiai Israel ai.
3 Bena Mose bona hahelaḡa tauna Eleasara ese taunimanima e hamaorodia, Moab taorana ai, Ioridane sinavaina badibadinai, Ieriko ai, eto,
4 Laḡani ruahui vada e hanai taudia ba duahidia, Iehova ese Mose e haḡania heḡereḡerena. Israel taudia, Aigupto amo e raka lasi, ladadia bini.
5 Ruben na Israel natuna roboana. Ia natuna be Hanok, Hanok iduhuna e havaraia tauna; bona Palu, Palu iduhuna e havaraia tauna;
6 bona Hesron, Hesron iduhuna e havaraia tauna; bona Karami, Karami iduhuna e havaraia tauna.
7 Ruben ena iduhu idoinai bunai: edia numera be 43,730.
8 Palu natuna ta be Eliab.
9 Eliab natuna be Nemuele bona Datan bona Abiram. Hari Datan bona Abiram, be hebou ese e abidia.a hidi, bena idia raruosi bona Kora ese Mose bona Aaron e heai henidia, bona Iehova danu e heai henia,
10 ela bona tano ese e hadonodia, idia bona Kora bona Kora ena orea taudia, bena iboudiai e mase. Una negana ai danu lahi ese taunimanima sinahu-rua imahui e aladia mase, mata-hakani ḡauna ai ela.
