16 Geia tangada e mee di longono nia helekai a God, gei e mee di kae di manawa kabemee dela e hanimoi mai Tangada Aamua Muginua. Ogu golomada gu aala, au guu mmada gi di haga modongoohia mai baahi o God Koia e Aamua.
17 Au e mmada gi lodo di madagoaa dela e hanimoi, gei au e mmada gi teenua go Israel. Di king dela e hai gadoo be di heduu maahina ga gila aga i lodo tenua deelaa. Mee e hanimoi i Israel e hai gadoo be di heduu dingidingia. Mee ga daaligi nia dagi o Moab, ga daaligi nia daangada o Seth huogodoo.
18 Mee ga haga magedaa ono hagadaumee i lodo Edom, ga hai mee gi tenua digaula. Israel ga noho hua beelaa i dono maaloo.
19 Teenua go Israel la gaa beehi digaula gi lala, ga haga mmaa gi daha digau huogodoo ala e mouli i golo.”
20 I lodo dana moe deelaa, gei Balaam guu mmada labelaa gi digau Amalek, geia ga helekai aga labelaa nnelekai kokohp aanei: “Teenua go Amalek la nogo kaedahi maaloo i mehanga nnenua huogodoo, malaa, di hagaodi gi muli digaula ga hagahuaidu gaa hana hua beelaa.”
21 I lodo dana moe deelaa, gei Balaam guu mmada labelaa gi digau Kenite, geia ga helekai aga nnelekai kokohp aanei: “Di gowaa dela e noho ai goodou le e mau dangihi ge humalia, gadoo be di waehongo manu mamaangi i hongo tadugalaa nnoonua.
22 Goodou digau Kenite, goodou ga hagahuaidu i di madagoaa digau Assyria ma ga haga magedaa goodou.”
23 Balaam ga helekai aga labelaa nnelekai kokohp aanei: “Goodou koai ala e dagabuli i bahi i ngeia?
24 Di buini gau dauwa ga lloomoi mai Cyprus, ga haga magedaa Assyria mo Eber, nomuli gei digaula hogi ga hagahuaidu, gaa hana hua beelaa.”
25 Balaam ga du gi nua, gaa hana gi dono hale. Gei Balak gaa hana gi daha mo di gowaa deelaa.
