14 Evus, Balaam viteni min Balak vit, “Kosa, inau niha ris ven meatin onak keil. Ka hekatau niha, inau nisan selkatien minuk usil asa koa me-Isrel keil umoni min meatin keil onom en avong koa veite veah.”
15 Evus, kei vit mesein ren Ahi enek mini vit: “Koanik vi selusien onen Balaam natin Beor, selusien onen meatin koa lei kilea en tounah.
16 Koanik selusien onen kei koa mul long kilea selusien onen Ahi, ka mul kur ileilien ka ven Ahi ten out nesa. Selusien enek ka ven kei koa les matil vovoien keil ka romatiltei, koa kur leisanien ka ven Ahi ten Keihoen:
17 Inau nalele soutin, en avong keil koa hemai veah, ka nales kantri ten out Isrel. Nales asuv houlu tai koa hekistal ien koa hesuval hitu koa vihil tahos imok, kei hekistal hehina nesa helosil kat me-Isrel keil. Hou vasin hetetamen keil ten out Moab, ka hou lin vasi meatin keil ten out Set.
18 Kei hou vini me-Edom keil ka hesakin me-Seir keil itovuol emun. Houmon atan ese hemai hehi onen, ka keihoen onen me-Isrel keil hel lises.
19 Kei koa heka ran me-Isrel keil hehitan en koakeil avi vativieh eni, ka u vasin meatin sav emun keil ten taon ten out Ir koa amoul amules.”
