16 Moses ude yäŋirän Yawetä ŋode iwetkuk; Eruk, Isrel ämawebe täŋo äma ekäni 70 ude yabäŋ ahä yäk. Äma uwä intäjukun äma wäpi nikek irirä yabäk täyan upäŋ yäŋ-yäkŋat yäpmäŋ näkŋa käbeyä eŋiken äbä gäkŋakät bok kaŋ irut.
17 Täŋiri näkä äpakaŋ gäkkät man yäŋpäŋ-nadäk api täde. Ude täŋpäŋ Munapik gäkä terak itak unitäŋo moräki yäpmäŋpäŋ Munapik äma unita imaka, api yämet. Täŋpäkaŋ äma unitä gäk täŋkentäwäkaŋ Isrel ämawebe täŋo bäräpi gäkkät bok kaŋ kotawut. Ude täŋirä gäkŋagän nämo api kotawen.
18 Eruk, ämawebe ŋo yäwet; Kwepta yäŋpäŋ iŋamnaken siwoŋi itta baga mantä yäyak ude täŋtuŋum täkot. Kwep uwä tom api näneŋ yäk. Inä ŋode yäŋkaŋ konäm kähän yäŋkubit-kubit yäŋkuŋo u Yawetä nadäŋ tamiŋkuk; Tom depäŋ näne? Isip itkumäŋo u tägagän itkumäŋonik yäŋ yäŋirä Yawetä nadäŋ tamiŋpäŋ tom u tamänkaŋ api näneŋ!
19 Tom uwä kepma kubä ba yarä ba 5 ba 10 ba 20 udeta nämo api näneŋ.
20 Nämo, tomgän naŋ yäpmäŋ kuŋkä gaŋani pähap nadäŋpäŋ taräki yäŋ api yäneŋ. Imata, komepak kubäta tomgänpäŋ naŋ yäpmäŋ kunayäŋ täkaŋ unita ude api yäneŋ. Inä Yawe, bämopjinken it täyak u mäde ut imiŋpäŋ ŋode yäŋpäŋ-kaŋiwat täŋkuŋ; Imata Isip kome kakätäŋpeŋ äbumäŋonik? yäk. Kädet ude täŋkuŋo unita kowata ude api ahäŋ tamek.
21 Yawetä Moses ude iweränä Mosestä kowata ŋode iwetkuk; Yawe nadätan? Ämawebe äbot pähap 600 tausen udepäŋ watäni it täyat ŋonita tom depäŋ komepak kubäta täga api yäpmäŋ towiwen yäŋ näwetan?
22 Bulimakau sipsip päke u kudup däpmäŋpäŋ naŋpäŋ nadäwä täganeŋ? Ba gwägu tom gwägu pähap gänaŋ it täkaŋ päke u kudup naŋpäŋ täga nadäneŋ? Nämo!
23 Ude yäwänä Yawetä Moses kowata ŋode iwetkuk; Näkŋo kehärominata nadäŋiri äpani täyak? Ude täga nämo täŋpek yäŋ nadätan? Ude nadätan u täŋpäwä ätu nanak itkaŋ kehäromina itak ba nämo yäŋ bureni kaŋpäŋ nadäwayäŋ.
24 Mosestä man u nadäŋkaŋ yäman äpmoŋpäŋ Yawetä iwetkuko u ämawebe yäwetkuk. Yäwetpäŋ äma ekäni 70 u yäŋpäbä kubäkengän yepmaŋpäŋ yäwerän käbeyä eŋi u it gwäjiŋkuŋ.
25 Ude irirä Yawetä gubam gänaŋ äpä Moseskät yäŋpäŋ-nadäk täŋpäŋ Munapik Moses terak itkuko unitäŋo moräki yäpmäŋpäŋ Munapik äma ekäni 70 uterak peŋ yämiŋkuk. Täŋpäkaŋ Munapiktä magärirän kadäni keräpigän man inipärik kubä, Anutu täŋo meni jinom yäpmäŋpäŋ yäwanitä-yäŋ yäŋkuŋ.
26 Täŋpäkaŋ äma yarä wäpi Eldat kenta Medattä eŋi bägupken ugän itkumän. Yarä uwä äma 70 yäpmäŋ daniŋkuko ukät nanik upäŋkaŋ bok nämo kuŋkuŋ. Nämo kuŋkumäno upäŋkaŋ Munapiktä uterak imaka, magärirän ini eŋi bägupken ugän itkaŋ Anutu täŋo meni jinomken nanik man yäpmäŋpäŋ yäŋahäŋkumän.
27 Ude yäŋirän nadäŋpäŋ äma gubaŋi kubätä bäräŋeŋ päŋku Moses ŋode iwetkuk; Eldat kenta Medat eŋi bägupken itkaŋ Anutu täŋo meni jinom yäpmäŋpäŋ yäŋahäkamän yäk.
28 Ude iwerirän Josua, Nun täŋo nanaki, Moseskät itkumäno u imaka, nadäŋkuk. Josua uwä Moses täŋkentäŋ imikta gubaŋiken umunitä bok kuŋatkumäno u. Eruk nadäŋpäŋ Josuatä Moses iwetkuk; Ekänina, äma yarä u yäniŋ bitnä! yäk.
