7 Huan ipan nopa tonali quema quinpojque catli itztoyaj ipan nochi nopa familias tlen iteipan ixhuihua Rubén, quinpojque 43 mil 730 tlahuilanca tlacame.
8 Huan Falú quipixqui itelpoca catli itoca Eliab.
9 Huan itelpocahua Eliab elque Nemuel, Datán huan Abiram. Huan Datán huan Abiram elque nopa tlacame catli mosansejcotilijtoyaj huejcajya ihuaya Coré huan quichijque catli fiero iixpa TOTECO, huan ica Moisés huan Aarón.
10 Huan motlapo tlali huan quintolo ni ome tlacame ihuaya Coré. Nojquiya ipan san se tonal TOTECO quinmicti ica tlitl 250 masehualme catli quintoquiliyayaj. Nochi ya ni elqui se hueyi tlamachtili para nochi nopa israelitame catli mocajque.
11 Pero ipan nopa tonali itelpocahua Coré amo itztoyaj ihuaya inintata huan amo mijque.
12 Simeón, iompa telpoca Israel, huejcajya quinpixqui macuilti itelpocahua: Nemuel, Jamín, Jaquín, Zera huan Saúl. Huan ininteipan ixhuihua sesen ni tlacame mochijque familias huejhueyi. Iteipan ixhuihua Nemuel mochijque nopa nemuelitame. Iteipan ixhuihua Jamín mochijque nopa jaminitame. Iteipan ixhuihua Jaquín mochijque nopa jaquinitame.
13 Iteipan ixhuihua Zera mochijque nopa zeraitame. Iteipan ixhuihua Saúl mochijque nopa saulitame.
14 Huan ipan nopa tonali quema quinpojque catli itztoyaj ipan nochi familias tlen iteipan ixhuihua Simeón, quinpojque 22 mil 200 tlahuilanca tlacame.
15 Gad, itelpoca Israel, huejcajya quinpixqui chicome itelpocahua: Zefón, Hague, Suni, Ozni, Eri, Arod huan Areli. Huan ininteipan ixhuihua sesen ni tlacame mochijque familias huejhueyi. Iteipan ixhuihua Zefón mochijque nopa zefonitame. Iteipan ixhuihua Hagui mochijque nopa haguitame. Iteipan ixhuihua Suni mochijque nopa sunitame.
16 Iteipan ixhuihua Ozni mochijque nopa oznitame. Iteipan ixhuihua Eri mochijque nopa eritame. Iteipan ixhuihua Arod mochijque nopa aroditame.
17 Iteipan ixhuihua Areli mochijque nopa arelitame.
18 Huan ipan nopa tonali quema quinpojque catli itztoyaj ipan nopa familias tlen iteipan ixhuihua Gad, quinpojque 40 mil 500 tlahuilanca tlacame.
19 Judá, itelpoca Israel, huejcajya quinpixqui ome itelpocahua catli inintoca Er huan Onán. Inijuanti mijque nimantzi ipan nopa tlali Canaán.
20 Pero teipa Judá nojquiya quinpixqui sequinoc eyi itelpocahua: Sela, Fares huan Zera. Huan ininteipan ixhuihua sesen ni tlacame mochijque familias huejhueyi. Iteipan ixhuihua Sela mochijque nopa selaitame.
21 Iteipan ixhuihua Fares mochijque nopa faresitame. Iteipan ixhuihua Zera mochijque nopa zeraitame. Huan Judá itelpoca catli itoca Fares quinpixqui ome itelpocahua, Hezrón huan Hamul catli mochijque nopa hezronitame huan nopa hamulitame.
