17 Huan Balaam mocuepqui huan quiitac Balac ijcatoc nechca nopa tlacajcahualistli tlatlatili, huan ihuaya itztoyaj nopa tlayacanani tlen tlali Moab. Huan Tlanahuatijquetl Balac quitlajtlani: ―¿Tlaque mitzilhuijtoc DIOS?
18 Huajca Balaam sampa pejqui camati huan quiijto ni tlajtoli: “¡Tlanahuatijquetl Balac, ta tlen tiicone Zipor, cuali xinechtlacaquili!
19 Toteco ax itztoc queja titlacame. Yajaya ax istlacati. Niyon ax moyolpatla queja se tlacatl. Tlen yajaya quiijtohua para oncas, ya nopa oncas. Tlen yajaya quitencahua, ya nopa quichihua.
