4 Mozi moc sambâŋko ferâ mocwâc risie wahawec? Me mozi mâŋâŋ moc basanaŋkewec? Me mozi qoruc‐ticne rorâ opâ moc foŋkewec? Me mozi mâreŋ qaŋeŋne râe basanaŋ efârewec? Go ŋic e jahacne me ŋokâ‐ticnere ʒâŋe moc manakicko muc!
5 “Anutu e mumupaŋ dâŋticne sasawa irec fârine bâfua‐fâreekac, â ere dapeŋko soŋkeeŋgopieŋ jaŋe ŋezic‐jopa‐fâreekac.
6 Anutu e tutuc qagarehuc burecŋic mugarezacte eki dâŋ muwec ira gahacne maŋte dâŋ moc mi ʒuhuckezemec.”
7 O Anutu, no hâmoc dameŋ‐nane mi maickeha wiac jajahec jahere numu‐garepe mana‐narezemec:
8 Burec â waburac ezipore baficnuzemec, ehuc tâpiri‐nanere sâc moneŋ mafa nare tahac ezemec, â nânâ wiac i hobu‐nanere sâc sawa narezemec.
9 No nânâ mafa sâkohec erâ, “Go tâmiric sâcne jupemu,” iŋuc muhuc behecguzipore me hapetac juhuc fiuc rorâ Anutu gore ʒâŋe wâwânâŋ ecnezipore iŋuc hâcne enarezemec.
10 Go kiŋaŋ qaqa mocte fuŋne bomboŋ‐ticnerao mi musâqorezemec, go iŋuc etec sâwecgume ʒâic busâqoc manazicte.
11 Ŋic gâcne jaŋe mamacfâc‐jeŋic sâwec‐jopaeŋgopieŋ, ehuc neŋgocfâc‐jeŋic jaŋere manapie fefene wâc mi eekac.
12 Ŋic gâcne jaŋe sohoŋhec juipiehuc jaŋacnere manapie ɋaɋacne juŋgopeneŋ tinac eekac.
13 Ŋic gâcne jaŋe jaŋacnere manapie fefene eha ŋic âgofâc‐jeŋic jaŋere ine manapie wawahane eekac.
14 Ŋic gâcne jaŋe hapetac â qarâ suriŋne kisuec‐jopahuc wiac‐jeŋic jowac roeŋgopieŋ, jaŋe iŋuc ehuc jaŋacne juju dopeckeeŋgopieŋ.
15 Hurameŋ e otâ jahec‐ticne jajahec jukopirec jahere ʒâŋe mocjaha ʒiŋuc fokac: “Narec, Narec.” Wiac jahec â jahec kecʒiŋuc jaŋe nâ gapec moc mi eeŋgopieŋ:
16 Hâmoc hae, ŋokac hufiŋne, mâreŋ kereŋne â ʒocbâruŋ.
17 Ŋic moc e neŋgoc mamac jahec‐ticne jahe ŋic ŋokac qizec ehapire gâwie‐jactehuc qaisoc‐jofaocmu e kâec kâec wipezi ʒâŋe‐ticne ripozejec â tucwipezi sahac biuc‐ticne nâzejec.
18 Wiac jahec â jahec kecʒiŋuc jaŋere fuŋne qame hukicne fokacte mi mana taraekopac:
19 Moc i tucwipezi sawao rac warec eekac, â moc i homazi haroŋaŋ faio foforâ raekac, â moc i wokezi hata‐ticne bâfuarâ hâwec fotâcneekac, erâ moc ine ŋic ŋokac jajahec jahe maŋ rârâec eekopirec.
20 Boe sau ŋokaczi wiac ʒiŋuc eekac: E sasec gie barâ opâ ruahuc ʒiŋuc muekac: “No bahac moc mi bâfuapac i.”
21 Wiac jahec â jahec kecʒiŋuc jaŋere manapene mi eene eekac:
22 Kiŋaŋ qaqazi ŋicwofuŋ erâ juju, ŋic sindaŋnezi nânâ mâriri sâkohec juju;
23 ŋokac qaisockekicnezi ŋic roro, erâ kiŋaŋ naruzi ŋokac bomboŋ‐ticne ââkehocke.
24 Qowi jahec â jahec kecʒiŋuc juŋgopieŋ jaŋe piticne jâmbâŋ erâ sifu mamana tarahec:
25 Qoʒazaŋ jaŋe tâpiri tâmiric erâ sifu ʒoaŋ dameŋko nânâ wiac‐jeŋic ro qâzuc efâreeŋgopieŋ.
26 Mandaŋ jaŋe tâpiri tâmiric jaha erâ sifu mâreŋ gufurâ fic hae eeŋgopieŋ.
27 Hâpic jaŋe ŋicwofuŋ tâmiric juhuc sifu birihec raeŋgopieŋ.
28 Ʒereac jaŋe mezi roroc‐jopane, erâ sifu ŋicwofuŋte ficko jueŋgopieŋ.
29 Wiac jahec â jahec kecʒiŋuc jaŋe hata rahapie honec‐jopahuc aŋac‐nâpoekac:
30 Moc i laioŋ; e tâpiri‐ticnezi qowi gâcne jaŋere tâpiri sirickeha wiac irec me irec moc mi hâwickeekac.
31 Â moc i noniŋ â qâqâc ŋicne, erâ moc i ŋicwofuŋ jaŋe momorifâc‐jeŋic micne bajareeŋgopieŋ.
