7 Ŋic mutuc matacnezi muqâqiŋ dâŋ muocmu i ŋic moczi kike‐ticne demba qame hata raekac irec sâc eocmu.
8 Ŋic moczi ŋic mutucne mumbiaŋkeocmu e ine ŋic moczi mutuc erâ tacbaŋko qânâ basanaŋkeme mi raekac ere sâc eocmu.
9 Ŋic mutuc matacne moczi maŋɋârâŋ dâŋ muocmu e ŋic moc opâ sanaŋ nâku maŋne sifuckeme meticnaonec ʒârâ unuckeocte eipieocmu irec sâc eocmu.
10 Ŋic moczi ŋic mutucne moc rorâ kiŋaŋ qaqa‐ticne baocmu e ŋic hatapecne fotâcnehapie kosa muruc‐jopaekac ŋic ere sâc eocmu.
11 Ŋic mutuc matacne moczi wiac mutucne eha arec jajahec eocmu e qâtozi nânâ wiac maŋurâ mocwâc risierâ nâekac irec sâc eocmu.
12 Ŋic maŋɋârâŋ tâmiric moczi no maŋɋârâŋhec jukopac muhame ŋic mutucne jâmbâŋ moczi ere sâc sirickehuc biaŋne juocmu.
13 Ŋic ojoŋnezi dâŋ kecʒiŋuc muhuc ficko feekac: “Laioŋzi hae ʒoŋao jukac.”
14 Motâczi beŋgu hahasic‐ticnao domahuc rac warec eekac irec sâc jaha ŋic ojoŋnezi fofo‐ticnao fohuc foc forisic eekac.
15 Ŋic gâcne jaŋe qâoma sâko ehuc nânâ wiac micjeŋicko râeniŋte takic‐jopame mâc ŋeeŋgopieŋ.
16 Ŋic ojoŋnezi e jahacnere maname feha ŋic 7 jaŋe maŋ mamanasu‐jeŋicko dâŋ fokac i mufuapie maname wawahane ekac.
17 Ŋic moc e ŋic âgo‐ticnere dâŋ muocte mi manacnehapie sifu muocmu e ŋic moczi hatao rahuc qâto furune moc hazecnao roocmu ere sâc eocmu.
18 Ŋic moczi ŋic âgo‐ticne eatuckerâ ʒiŋuc muocmu: “No mâc ʒoraŋ sawa ekopac,” e ŋic mutuc matacne moczi ʒoc kosa turuŋkeme wiac ʒafâreekac me tepe motec kosa qâtâcneme raekac ere sâc eocmu.
20 Ʒoc mocwâc mi henusuckepene hâpoocmu, â gupe micko âkec behepene dâŋ mu qaqataraczi wâc omaeocmu.
21 Ʒoc râqâcnere kinezi ʒoc tucne qâhâsâekac â ʒoc henusuckepene ʒahuc foekac irec sâc jaha ŋic râŋgeŋnezi qaqatara bâfuaekac.
22 Ŋic nâŋâc gupe micko âkec ee irec manapene afeckeha boc bajueŋgopeneŋ.
