4 Bulimakao jaŋe bafic‐nâpohuc mâreŋ mi bâfâuckeniŋmuo ine padi jacgoŋ afecne sawa fua‐nâreocmu, jaŋe gie bafic‐nâpopie ine bocjaha fua‐nâreocmu.
5 Mumutaniŋ ŋic siocmâc eki dâŋ fârine sawa muekac, â siochec eki ine burecdâŋ sasawa muekac.
6 Ŋic âke sisicnezi maŋɋârâŋhec moc mi eocmu, ŋic mamanaheczi ine afeckerâ mamana tara bâfuaocmu.
7 Go ŋic mutuc matacne jaŋehec mi juzemec, jaŋe mamana biaŋne i me i moc sâcne mi qazu‐gareniŋmu.
8 Ŋic mamanahec jaŋe hata‐jeŋic fâretiŋ jaha rahuc maŋɋârâŋ‐jeŋic bataniŋkeeŋgopieŋ, â ŋic mutuc matacne jaŋe ine mamana mi fojareha mutuc erâ mueŋgopieŋ: Nâŋe mamanahec.
9 Ŋic mutuc matacne jaŋe manabâc mi ehuc sâqocne bâfuaeŋgopieŋ, â ŋic biaŋne jaŋe ine sâqocne‐jeŋic tâmireocte ejareekac.
10 Maŋnâŋecko bubiaŋ me busâqoc fuaekac i ŋic moczi honerâ babafic‐nâpone mi eekac.
11 Ŋic sindaŋnere ficzi tâtiehame ŋic tiŋnere fic i sanaŋkerâ ŋeocmu.
12 Ŋic nâŋâc hata moc honerâ biaŋne muhapene sifu hata izi raku hâmoc haeo mecne fisikac.
13 Ŋic moc e busâqocko juipiehuc sifu mu gâgâwizi busâqoc‐ticne tapa baocmu. Dameŋ gâcnao bubiaŋ tarame busâqoc fuaekac.
14 Ŋic sâqocne moc e eebapa‐ticnere sâcko okacne roocmu, â ŋic biaŋne moc e wâc iŋuc jaha eebapa‐ticnere sâcko furine roocmu.
15 Ŋic mutuc matacnezi dâŋ sasawa irec maname fârine eekac, â ŋic mamanaheczi ine hata‐ticne hone tarahuc raekac.
16 Ŋic mamanaheczi bahac wiac bâfuazacte aimuŋ jaha juekac, â ŋic mutuc matacnezi ine maŋne bâruŋkeme wiac manabâc tâmiric eekac.
17 Ŋic maŋʒoc‐ticneheczi wiac mutucne eekac, â ŋic maŋuruchec eki ine wama ruaine juekac.
18 Ŋic mamana tâmiric jaŋe mutuc‐jeŋicte fârine mutuc jaha roeŋgopieŋ, â ŋic mamana saric jaŋe ine mamana tara ro rauc eeŋgopieŋ.
19 Ŋic sâqocne jaŋe ŋic biaŋne jaŋere maio dapenʒepieŋ, â ŋic sindaŋne jaŋe ŋic tiŋne jaŋere motâcko rumerâ domanʒepieŋ.
20 Ŋic hapetac jaŋere takic‐nâpome âgo boc mi ejareeŋgopeneŋ, â ŋic moneŋ mafa sâkohec jaŋere ine boc aŋac‐nâpome âgo bacjopaeŋgopeneŋ.
21 Ŋic moc e ŋic âgofâc‐ticne qaisoc‐jopaocmuzi kiŋ hureocmu, â moc e ŋic hapetac ehâmo‐jareocmuzi ine ʒeri bubiaŋ bâfuaocmu.
22 Wiac sâqocne manasu biric eeŋgopieŋ jaŋe hehesic bâfuaeŋgopieŋ, â wiac biaŋnere gie baeŋgopieŋ jaŋe ine ŋic âgofâc‐jeŋic jaŋe mana‐jarepie fefene eha jaŋerao roweckeeŋgopieŋ.
23 Go gie ʒoɋachec bahuc jujugere ŋesiŋ sâcne bâfuacmu, ojoŋ juhuc dâŋgie sawa bahuc jucmuo ine ŋesiŋ basarâ ŋesawa ecmu.
24 Maŋɋârâŋhec juju izi ŋic mamana saric jaŋere eri hendiŋ ekac, â mutuczi ine ŋic mamana tâmiric jaŋere qâ ʒere ekac.
25 Ŋic moc e dâŋgieo dâŋ fâri qizecne mutaniŋkeocmuzi ŋic âgofâc‐ticne jaŋere juju ŋezickeocmu, â moc e ine burecdâŋ muocmuzi ŋic âgofâc‐ticne doc bacjopaocmu.
26 Ŋic moc e Wofuŋ araŋ bacneocmuzi erao rowecke sanaŋkeocmu, e iŋuc ehuc naru motecfâc‐ticne jaŋere qânâuŋ eocmu.
27 Wofuŋ araŋ babacne izi jujure opâ ʒâŋe ekac, moc e opâ i nâhuc hâmoc getâckeocmu.
28 Ŋicwofuŋ moc e kikefuŋfâc‐ticne guru sâko jucnepie ʒâŋe biŋe sâkohec eocmu, â kikefuŋfâc‐ticne jaŋe tâmiric ine ŋic omane tinac eocmu.
29 Ŋic moc e buuruchec juocmuzi mamana‐ticnere fuŋne bataniŋkeocmu, â moc e maŋʒoc‐ticnehec juocmuzi ine mutuc‐ticnere fuŋne bataniŋkeocmu.
30 Ŋic moc e wama ruaine juhuc sahac‐ticne gume jowac eocmu, â moc e maŋʒârâ‐ticnehec juocmuzi ine siec bibiricko wicsanaŋ fuaekac irec sâc eocmu.
31 Ŋic moc e hapetac jaŋe bâʒâic‐jopahuc bâbâfua‐ticne wâwânâŋ ecneocmu, â moc e qarâ suriŋne jaŋe ehâmo‐jarehuc bâbâfua‐ticne araŋ bacneocmu.
32 Ŋic sindaŋne e eebapa‐ticnezi bawahaekac, â ŋic biaŋne e ine siocmâc juju‐ticnezi ŋeŋezic‐ticne eekac.
33 Maŋɋârâŋzi ŋic mamanahec jaŋere maŋko ŋeŋe juju eekac, â ŋic mutuc matacne jaŋere maŋko ine maŋɋârâŋ basaeŋgopeneŋ.
34 Tiŋe jujuzi ŋic ʒâŋe biŋe‐jeŋic bafahareekac, â eebapa sâqocnezi ine mimi busâqoc bâfua‐jareekac.
