3 Eme Juda guru jaŋe qomâfâc‐jeŋic Simeoŋte guru jazarâ mumbiŋ: “Nâŋere mâreŋko mâmâc fehuc Kanaaŋ ŋic jopanʒepeneŋ. Ehame nâŋe wâc iŋuc jaha ŋoŋere mâreŋko mâmâc ranaŋmu.” Eme Simeoŋte guru jaŋe bâjâpec‐jopapie rambiŋ.
4 Eme Juda guru jaŋe ʒikao rahapie Wofuŋzi Kanaaŋ â Periʒi ŋic mejeŋicko râec‐jopawec. Eme jaŋe ŋic 10 tauseŋ Beʒeki hae mendâŋko jopambiŋ.
5 Eme Beʒeki haeo Adoni‐Beʒec erao fisirâ ʒika qambiŋ. Ehuc Kanaaŋ â Periʒi ŋic bawahac‐jopambiŋ.
6 Â Adoni‐Beʒec e ine wisehame jâpe ra rorâ meneŋgoc jahecne â kike neŋgoc jahecne hetâcnembiŋ.
7 Eme Adoni‐Beʒeczi muwec: “Ŋicwofuŋ 70 meneŋgoc â kike neŋgoc‐jeŋic hetâcnekicnezi nore tebo rurumaŋko nânâ huŋgaŋ nuse nâc ejumbieŋ. No iŋuc epore Anutuzi okacne bazu‐narekac.” Eme jaŋe Jerusalem haeo barapie ira hâmowec.
8 Eme Judaŋic jaŋe Jerusalem haeo ʒika qambiŋ. Ehuc hae i ʒikazi imackehuc ʒoc turuŋkepie ʒawec.
9 Eme ʒâhec Judaŋic jaŋe Kanaaŋ ŋic tiki mâreŋko, Negebe mâreŋ â wâneŋko jumbiŋ jaŋe jopaniŋte rambiŋ.
10 Eme Juda guru jaŋe Heboroŋ haeo Kanaaŋ ŋic jumbiŋ jaŋe jopaniŋte rambiŋ. (Heboroŋte ʒâŋe mârâc Arabare hae mujumbieŋ.) Ehuc micnefâc‐jeŋic Sesai, Ahimaŋ â Talamai iŋuc jopambiŋ.
11 Eme irecnec ine Debiri haere ŋecjucfâc râsi fisi‐jareniŋte rambiŋ. Debiri haere ʒâŋe ine mârâc jaha Kiriati‐Sefe iŋuc fowec.
12 Eme Kalebezi muwec: “Moc e Kiriati‐Sefe hae imackerâ rome otâ‐nane Akisa râcnepe ŋonâŋ‐ticne eocmu.”
