1 Ʒâŋe biŋehec juju izi wokemaŋ âsu biaŋ irec sâc sirickekac, â hâmoc dameŋ‐nâŋeczi fufua dameŋ‐nâŋec wâc sirickekac.
2 Hâmoczi woŋec‐nâŋec fokac i ɋâricne jueŋgopeneŋ nâŋâc manasuhuc junʒepeneŋ, irec nâŋâc gae wohuc ʒeri sâko eeŋgopieŋ hae mâreŋ ira mâcne, makuc baeŋgopieŋ ira rapene biaŋkeocmu.
3 Ʒâic fâro faio juju izi mu gâgâwi faio juju sirickeme biaŋkekac, i ŋifec busâqoc bâfua‐nâreekac â ŋifec ine mamanasiŋ‐nâŋec basanaŋkeekac.
4 Ŋic mutuc matacne e dameŋ sâc jujuhâmore sawa manasuekac, â ŋic maŋɋârâŋhec eki ine hâmocte mâmâc manasuekac.
5 Ŋic maŋɋârâŋheczi mu tutuc enâreme manapene fefene ezejec, â ŋic mutuc matacne jaŋe mumbiaŋ‐nâpopie manapene wawahane ezejec.
6 Ŋic mutucne moczi gâwieme qiŋambu ʒârâ ʒocko râepene ʒahuc parac heekac irec sâc eekac, erâ izi wiac fâri tâmiric jaha ekac wâc.
7 Ŋic maŋɋârâŋhec moczi ŋic moc eatuckeocmu e ŋic mutucnere sâc bâfuaocmu, â moc e bâbâmiriŋ moneŋ roocmuzi maŋ mamanasu‐ticne sipirickeocmu.
8 Gie fuŋkehuc mâcne, baku batararâ manapene biaŋkezejec. Sahac fefe juju i wiac wawahane â bumâteŋ faio juju izi ine wiac fefene.
9 Go kimbeŋ aaric biac mi bâfuazemec, aaric i ŋic mutucne jaŋere maŋko fic hae eekac.
10 Go ʒiŋuc mu wioc moc mi ezemec: “Dameŋ raŋɋanao wemocte wiac sasawa biaŋne fofârewec?” Wiwio iŋucne i maŋɋârâŋ dâŋ aricne.
11 Mâreŋko ŋic jueŋgopeneŋ sasawa nâŋâc maŋɋârâŋhec efârenʒepeneŋ; maŋɋârâŋhec juju i merâfâc wiac babaju irec sâc jaha ekac.
12 Moneŋzi ŋezic‐nâpoekac irec sâc jaha maŋɋârâŋzi ŋezic‐nâpoocmu; maŋɋârâŋte fuŋne manaeŋgopieŋ ŋic i jaŋere juju i maŋɋârâŋzi basanaŋkeekac hâcne.
13 Go Anutuzi wiac ebac ewec irec manasuhuc juzemec; eki wiac i me i moc bame sâqorewecko ine ŋic moczi moc sâcne bâtiŋneocmu me?
14 Go gie wiacge batec hatacke‐hâmome ʒeri bubiaŋ faio juzemec, me sâqore‐gareme ine ʒiŋuc manazemec: Anutu e jujuhâmo â ʒârâ ʒâpânehec juju i mâmâc mume fua‐nâreekac, irec nâŋâc wemo ʒuhuckerâ maic‐nâpoocmu i mi manaeŋgopeneŋ.
15 Juju‐nane i fâri tâmiric ewec, ehame sifu wiac ʒiŋuc fuaekac i hone‐fârepo: Ŋic tiŋne jaŋe tiŋne jaha juhuc hâmo sipiric eeŋgopieŋ, â ŋic sindaŋne jaŋe ine sindaŋne jaha juhuc dameŋ ʒora jufeeŋgopieŋ.
16 Irec go jujuge biac sipirickezicte tiŋne â maŋɋârâŋhec boc mi juzemec.
