2 Fufua â hâmoc dameŋ, hesarac â qa roro dameŋ.
3 Qaqac â bâbâsomie dameŋ, fic hae ima bapa â bâbâpiaŋ dameŋ.
4 Busâqoc â bubiaŋ dameŋ, ki mamakuc â gae wowo dameŋ.
5 Ŋowe ŋonâŋ juju â sowa juju dameŋ. eehâmo â qaqaisoc dameŋ.
6 Wiac basarâ bâbâfua â behepene sisifucke irec dameŋ, wiac qâqâzucke â bebehe irec dameŋ.
7 Wiac bâsucke behec â ɋâtâ bâpiaŋ ee irec dameŋ, dâŋemâc juju â dâŋehuc juju irec dameŋ.
8 Maŋjauŋhec juju â rârâsi dameŋ, ʒika â wama dameŋ.
9 Ŋic nâŋâc gie‐nâŋec bahuc fârine wemo wiac bâfuaeŋgopeneŋ?
10 Anutuzi gie ŋemâcne fai‐nâŋecko râewec i hone tarakopac.
11 E wiac sasawa jaŋere dameŋ i fâretiŋ jaha râe‐fârewec. Erâ wâc ŋic nâŋâc wiac fua raocmu irec fuŋne mananaŋte woworic râe‐nârewec, ehuc ine sifu eebapa‐ticnere fuŋne mana taranʒipeŋte tâpiri mi qikiŋne‐nâreekac.
12 Irec no ʒiŋuc mana tarapo: Ŋic nâŋâc mâreŋko junaŋmu sâc wiac i me i mi ebac ee mâc ʒeri bubiaŋ sawa manahuc jupene sâckezejec.
13 Erâ ʒiŋuc mana tarapo wâc: Nâŋâc nânâ opâ nâeŋgopeneŋ â gie bapene fârine fuame ʒeri eeŋgopeneŋ izi Anuturaonec taha hâcne.
14 Erâ wâc ʒiŋuc manakopac: Anutuzi wiac sasawa ebac eekac i fofo sanaŋ, ŋic nâŋâc ira ʒuhuckerâ wiac moc bapa, me irecnec wiac moc ro behec ee i mi fokac. Anutu e ŋic nâŋâc araŋ bacnehuc junaŋte wiac iŋuc hâcne bâfua‐fârewec.
15 Wiac fuaekac me juku fuaocmu i mârâc jaha biac fua‐fârewec, Anutu e wiac izia fuarâ fua eocte giene baekac hâcne.
16 Erâ i sawa mâcne, no ʒuhuckerâ wiac kecʒiŋuc wâc honepo: Mâreŋko mumutiŋ gie â eebapa tiŋne foocte mukicne ira wiac hehesicne foekac.
17 Iŋuc honerâ maŋnanezi ʒiŋuc manasupo: Anutu e gie â wiac sasawa irec dameŋ bawecte ŋic tiŋne â hehesicne jaŋere dâŋ sâckoa mutaraocmu.
18 Erâ ʒiŋuc manasupo wâc: Anutu e ŋic nâŋâc ʒiŋuc nâzâ nâwotuc eocte ba esâic enâreekac: Ŋoŋe qowi jaŋere sâc sirickerâ biaŋne mi jueŋgopieŋ.
19 Irec qowi jaŋe wiac fua‐jareekac sâc ijaha nâŋâc fua‐nâreekac. Jaŋe hâmoeŋgopieŋ sâc ijaha nâŋâc hâmoeŋgopeneŋ, jaŋe nâŋâcne sâc jaha bâfuac‐jopakicne. Ŋic nâŋâc jaŋere sâc jâuruhuc biaŋne mi jueŋgopeneŋ. Jaŋere juju mecne â nâŋâcne juju mecne i wiac fâri tâmiric jaha.
