1 No maŋnanezi ʒiŋuc manapo: “No bubiaŋ faio jujuhâmo irec fuŋne manazepac.” Iŋuc muhuc ʒiŋuc mana tarapo: I wiac fâri tâmiric jaha.
2 Erâ ʒiŋuc wâc mana tarapo: Mu gâgâwi ee i wiac mutucne, â bubiaŋ faio juju izi wâc mi bafic‐nâpoekac.
3 Eme maŋɋârâŋhec jujure boc enareme ʒiŋuc mupaŋkepo: No waiŋ opâ nârâ sahac‐nane afeckeme bubiaŋ faio juzepac. No ʒiŋuc hâcne manasupo: Ŋic nâŋâc mâreŋko dameŋ bembeŋne sawa juhuc iŋuc mecne epene biaŋkeocmu.
4 No gie sâko bape fârinehec efârewec. Ehuc fic wiac‐nane barâ waiŋ gie he sarac epo.
5 Erâ monʒaŋ gie â jufu gie‐nane bahuc jâc fuŋne fuŋne sarapo wâc.
6 No opâ nombâŋ ropo, eme irecnec opâzi rahuc jâc wiac i bâgunucke‐fârewec.
7 No kiŋaŋ qaqa ŋic ŋokac furi bacjopapo, â no nahacne ficko kiŋaŋ qaqa fuambiŋ wâc. No lama bulimakao bacjopa jupo i juwicnao Jerusalem haeo guriŋ bapa ŋic jaŋe bacjopa jumbiŋ jaŋere sâc sirickewec.
8 Erâ no mâreŋ sâc ŋicwofuŋ soŋaŋ‐jopahuc jupo jaŋere kânoŋkonec siliwa â gol ro qâzuc epo. Ehuc gae hehe ŋic ŋokac rocjopape gae henarehuc jumbiŋ; ehame hone aŋac ejarepemurâ ŋokacfâc‐nane bocjaha junarembiŋ wâc.
9 No iŋuc ehuc ʒâŋe biŋehec erâ juwicnao Jerusalem haeo jumbiŋ jaŋe siric‐jopa‐fârerâ maŋɋârâŋ‐nanehec jaha jupo.
10 No wiac i me i rorâ bajuzo enareme rorâ bajupo, ehuc wiac bubiaŋnehec moc mi bâsuepo. No gie sasawa bafârepo izi bubiaŋ bâfua‐narewec, erâ bubiaŋ izi gie furi‐nane ewec.
11 Eme ʒâhec ine wiac ebac efârepo â gie sâko bahuc jupo irec manasurâ ʒiŋuc mana tarapo: I wiac fâri tâmiric sasawa, erâ mezi mâŋâŋ rorâ basanaŋkezo eipieeŋgopeneŋ irec sâc; erâ wâc ʒiŋuc mana tarapo: Mâreŋko juhuc wiac fârine moc bâbâfuane mi fokac.
12 Ine hâcne, ŋicwofuŋ moc e wiac furune moc mi ehuc, ere juwicnao ŋicwofuŋ juwefumbiŋ jaŋe wiac ebac embiŋ i sawa sâcne ebac eocmu. No iŋuc mana tararâ maŋɋârâŋhec juju â mamana tâmiric mutuc matacne juju irec fuŋne manapemurâ mamanasu gie bapo:
