11 Wofuŋzi bubiaŋ biŋedâŋ mufuawec; ŋokac hâmbâŋ sâkozi kiŋaŋ rahuc dâŋ bârâwiŋkembiŋ:
12 “Ŋicwofuŋ jaŋe momorifâc‐jeŋic jaŋehec wiseŋgopieŋ.” Ŋokac haeo ŋeŋenezi mafa mateŋ kâdoc qaŋgopieŋ.
13 Jaŋe hapâ fakecne siliwazi ɋorockekicne iŋucne, â mâmâŋ‐jeŋic i gol sâsârekicne ârâŋ ɋâri irec sâc. Ehame wemocte lama sapaoa ŋezo muŋgopieŋ?
14 Bapafârezi ŋicwofuŋ qâtâtiec‐jopawecko, Zalimoŋ tikio sinou wahawec.
15 O tiki sâko mako, Basaŋ tiki, o tiki qoŋne qoŋne, Basaŋ tiki!
16 Tiki qoŋne qoŋne go wemocte Anuture tiki iiŋguuŋ ecnekomec? Tiki ira hâcne Wofuŋzi jusanaŋkeocte bâwosâewec.
17 Anuture ʒika keretac tauseŋne tauseŋne bocjaha, irec faio Wofuŋzi Sinai beherâ tirificko fisiwec.
18 Go faic hefâmeŋ, niŋgiŋ‐jopakicne jowac‐jopameŋ; ŋic jaŋere guruo taha fua‐garewec, râŋgeŋne jaŋerao mâmâc; ine go ira Wofuŋ Anutu jucmurâ iŋuc emeŋ.
19 Wofuŋ muteŋkezo, e ʒoaŋ sâc de âsic enâreekac, Anutu e bâbâpiaŋ‐nâŋec.
20 Anutu‐nâŋec e bâbâpiaŋ Anutu; Wofuŋ Anutu e hâmockonec babatarac‐nâpo irec hata focnekac.
21 Anutu e râsifâcne jaŋere qizec hefâuckeocmu, ŋic moc sindaŋ hata‐ticnao juocmu, ere utu mai hefâuckeocmu.
22 Wofuŋzi muwec, “No Basaŋkonec bârisiec‐jopapemu, no hâwec ʒâkâŋkonec bârisiec‐jopapemu;
23 eme kikege sâcne socko ʒurecmu, â qâtofâcge nameŋ‐jeŋic râsi jaŋeraonec suanʒeŋ fua‐jareocmu.”
24 O Anutu, ʒeri hombaŋgere ŋic biri ʒora tiri ufuŋgao honec‐jopakicne. Anutu Wofuŋ Sâko gore biri ʒora hâcne.
25 Gae hehe jaŋe micne bambiŋ, musi bapa jaŋe ʒâhec rambiŋ, ŋondeŋ‐jeŋicko naru ŋokaczi woŋgâŋ qambiŋ:
26 “Tutumaŋ sâkoo Anutu muteŋkezo, Wofuŋ e Israere opâ ʒâŋe.”
27 Benjamiŋ guru pitic jaŋe micne bajarehuc raŋgopieŋ, Juda guruonec ŋicbomboŋ, guru sâko raŋgopieŋ, erâ Sebuloŋte ŋicbomboŋ â Naftalire ŋicbomboŋ.
28 Tâpirigere fuŋne bataniŋkec, o Anutu; go ŋezic‐nâpohuc tâpiri bâfua‐nâremeŋ i fosanaŋkezejec.
29 Jerusalem taha ufuŋge ŋekac irec erâ ŋicwofuŋ jaŋe taha bagare fisinʒepieŋ.
30 Saparac uupicko qowi juŋgopieŋ jaŋe hanec‐jopazemec, kâte bulimakao guru kâcɋene â piticne mâmâc. Moneŋte harac eŋgopieŋ jaŋe âtenʒaŋ‐jopazemec, ʒikare aŋac‐jopakac ŋicguru i bâtâtiec‐jopazemec.
31 Aigita mâreŋkonec ŋic fekicnezi ʒocnehec fisiŋgopieŋ, Etiopia mâreŋkoneczi mejeŋic Anutu sicnecneŋgopieŋ.
