1 O Wofuŋ, go dâŋnanere hazec râec, huhuse‐nane mi mana takirec.
2 Manahaŋ owa‐nanezi hazecgao qaqazuoc, Wofuŋ Sâko â Anutu‐nane, nunumu‐nane gorao hâcne hefakac.
3 O Wofuŋ, go furickoa marac fânâŋ‐nane manaekic, uupictea taha bâmocke‐garerâ gore ʒâŋe fiekopac.
4 Eebapa repicne hohonebâc i Anutu gorao mi fokac, sâqocnezi gore maŋfuŋko jufofo i arictac.
5 Penaroŋ eeŋgopieŋ jaŋe gore maio mi domaniŋmu, sâqocne bapa sasawa jaŋere takicguekac.
6 Burecdâŋ eeŋgopieŋ jaŋe bâsirowec‐jopaekic, sochâro â eeatuc ŋic jaŋere takicguekac.
7 No ine miriŋge sâc tâmiric fokacte, ufuŋgao raʒizo mukopac. No tiri ufuŋge maickehuctecne, araŋ bagarehuc dape‐garepemu.
8 O Wofuŋ, go râsifâc‐nane jaŋere erâ, gahacne tiŋne hatao jowacnuzemec; hatage mai‐naneo bâwâneŋkezemec.
9 Jaŋere micko jâmbomac dâŋ moc mi fuaekac, sisipiric ine maŋkerâ jueŋgopieŋ; marac‐jeŋic i hâmoc qâŋɋâŋ bâbâfua, nameŋ‐jeŋic i wokemaŋ rurua.
10 Anutu, go mutec kiŋjeŋiczi kimuŋ‐jopazejec, ehame jaŋacne bitiŋko kinʒepieŋ. Sindaŋ boc eeŋgopieŋte tuŋjopazemec, go hâcne fegarembiŋ i.
11 Dapeŋgao soŋkeeŋgopieŋ jaŋe ine ʒeri efârenʒepieŋ, jaŋe bubiaŋ gae hehuc jaha domanʒepieŋ. Â goki ine sacfozic ejarezemec, eme ʒâŋegere aŋac‐jopaekac jaŋe kiwae‐garenʒepieŋ.
