2 Zioŋ, hawari biaŋte fâri wâmbuŋ, irecnec Anutuzi tamaehuc fua tâcnekac.
3 Anutu‐nâŋec e fisikac, erâ dâŋemâc mi jukac, ʒocbâruŋzi ʒa ʒâtâc ehuc bâniecnekac, mâŋâŋ ɋicwânʒâŋneheczi râreckehuc bâjâpekac.
4 E wirame faic sambâŋko fekac â mâreŋko wahakac, ŋicfâcne dâŋjeŋic mutaraocte:
5 “Fuŋfuŋfâc‐nane hetumaŋ‐jopa‐nareniŋ, taha banarehuc nohec ʒâʒâfic embiŋ jaŋe hâcne.”
6 Eme sambâŋzi mumutiŋ‐ticnere fuŋne bataniŋkekac, Anutu e jahac mumutara gie bakacte hâcne.
7 “Kikefuŋ‐nane go manahaŋ noni dâŋ gazape, o Israe, noni mutaniŋgupe, no hâcne Anutu, gore Anutu.
8 No taha bapagere erâ mi hanecgukopac, â bâzi ririkege i honehuc jukopac.
9 No fic haegaonec bulimakao ŋicne, me sapagaonec noniŋ ŋicne moc mi ropemu.
10 Kâteo qowi juŋgopieŋ i nore sasawa, â tiki sâc wiac jujune jurakac i iŋuc jaha.
11 No sawao wipe juŋgopieŋ i manac‐jopa‐fârekopac, â sopâcko wiac qiriŋ qahuc fokac i nore jaha.
12 “No nânâre hâmorâ muzac go mi gazazapo, mâreŋ sâko mâreŋ â irec faio wiac fokac i rucke‐fârekopac i!
13 No bulimakao biucne moc nâekopac? Me noniŋ socne moc nâekopac?
14 Go Anutu daŋge âzâcnetec izi taha bâzige ezejec, ehuc Femicne sâko dâŋ mupaŋkecnemeŋ irec fârine bâfuazemec.
15 Erâ ʒârâ hâriŋ dameŋko wâsicnuzemec, eme bataracgupe muafecnuzemec.”
16 Â ŋic sindaŋne e ine Anutuzi ʒiŋuc âzâcnekac: “Go mozi mana‐gareha sâcmutâc dâŋnane woseekic, me micgezi ʒâʒâfic‐nanere dâŋ bâuaekic?
17 Go bâbâtiŋ qaisockeekomec i! Â dâŋnane râpeckeekic i!
18 Go fiuc roro ŋic moc honerâ âgo baekic, â boe sau ŋic jaŋehec ŋec domac eekic.
