8 Aaric geŋkezemec, kimbeŋ bâec bacnezemec! Maŋge mi fârorockezejec, izi sâqocne bâfuacmu.
9 Sâqocne bapa jaŋe hâcne juju‐jeŋic hetâcnezo, Wofuŋte woŋec juniŋmu jaŋe ine mâreŋ rauckeniŋmu.
10 Sindaŋŋic e piticne sawa juferâ omaeocmu, go ŋeŋe hae‐ticnao fisi ʒâŋe firâ e basacmu.
11 Ʒâic mana‐bipiehuc jueŋgopieŋ jaŋe ine mâreŋ rauckeniŋmu, ehuc mazuc mâriri bâfuarâ aŋac faio juniŋmu.
12 Ŋic repicnezi ŋic tiŋne dâŋ qacneekac, ehuc mic kikiaric kicneekac;
13 Wofuŋzi ine ŋic repicne gâwiecneekac, dameŋ‐ticne bembeŋkeme honeekacte.
14 Sindaŋŋic jaŋe sâqe unuckeeŋgopieŋ â tepe âpâreeŋgopieŋ, ŋic hapetac â qarâ suriŋne jopaniŋte, â tiŋne juju sipiric‐jopaniŋte;
15 sâqe‐jeŋiczi jaŋacne bu âke mârâŋkeocmu, â tepe‐jeŋic bazuzo.
16 Ŋic tiŋne juekac e wiac afecne rauckeocmu izi fekac, â sindaŋŋic bocjaha mazuc mâriri fojareocmu izi wahakac.
17 Wemocte? Sindaŋŋic e mene qazuzo; â ŋic tiŋne juekac e ine Wofuŋzi dope hutuŋ ecneocmu.
18 Wofuŋ e bahacmâc jaŋere dameŋ mana‐fârekac, â wiac rauckembiŋ i fosanaŋkerâ foocmu.
19 Jaŋe dameŋ sâqocnao mimi qaqa mi fua‐jareocmu, â roroc dameŋko sifu nâ gapec ehuc juniŋmu.
20 Sindaŋŋic jaŋe ine sipirickeniŋmu; Wofuŋte râsifâc jaŋe ʒariŋ âri biaŋ iŋucne omaeniŋmu, hosâc iŋucne qaʒueniŋmu hâcne.
21 Sindaŋŋic e wiac jaba roku okacne sâcne mi bâtikieekac, ŋic tiŋne e ine bokifac ehuc ŋic wiac tahac‐jopaekac.
22 Wemocte? Wofuŋte jambuŋ rokicnezi mâreŋ rauckeniŋmu, â sâwec‐jopawec jaŋe ine arictac eniŋmu.
23 Ŋiczi hata âte sanaŋkerâ juju i Wofuŋtaonec fuaekac, ine ŋic moc eebapa‐ticnere mana biaŋkerâ iŋuc ecneekac.
24 Iŋucnezi rândiŋkehuc sifu mâreŋko mi qaekac, i Wofuŋzi menao rorâ basanaŋkeekacte.
25 No socɋâri jupozi juku ŋicqizec ekopac, ehuc honehape ŋic tiŋnezi qarâ suriŋne moc mi ewec, â ɋiefâcne jaŋe nânâre mu huacbuc ee i wâc arictac.
26 E dameŋ sâc bokifac juekac â wiac buafec beheekac, â ɋâricfâcne jaŋe mâririre rowaŋ wâc eeŋgopieŋ.
27 Go sâqocne geŋkecnehuc eehâmo gie bazemec, iŋuc erâ sâcne juraʒihuc jucmu.
28 Wofuŋ e tiŋne jujure mana aŋac eekac, e mitiŋicfâc‐ticne mi behec‐jopaekac. Tiŋne jaŋe hone maiŋ ejareme juraʒihuc juniŋmu, sindaŋne jaŋere ɋâricfâc ine bâsirowec‐jopaocmu.
29 Ŋic tiŋne jaŋe mâreŋ rune eniŋmu, ehuc mâreŋ fainao hati jurahuc juniŋmu.
30 Ŋic tiŋne ere mickonec dâŋ fâri biaŋ wahaocmu, nameŋ‐ticnezi gie bame bâbâtiŋ fuaocmu.
31 Anutu‐ticnere sâcmutâc dâŋ maŋticnao fokac, irec hata‐ticne biric boroc mi âteekac.
32 Ŋic sindaŋnezi tiŋne ruc bacneekac, â juju‐ticne sipirickeocte maŋkehuc juekac.
33 Meticnao feocte ine Wofuŋzi mi manaekac, dâŋgieo dâŋticne sâqorezacte aka wâc heekac.
34 Wofuŋte woŋec juhuc ere hatao ninipezemec, eki bafaharecgume mâreŋ rune ezokic, â sindaŋne jaŋe sirowepie hone aŋac ejarezokic.
35 Ŋic sindaŋne moc pepec sâko eme honehuc jupo, e ʒamana jâc iŋucne mâreŋ sâockerâ domawec.
36 Dameŋ mocko fotâcnehuc dodoma tacne honepo, fârinere ʒâŋe fipo, erâ basa‐bipiepo.
37 Ŋic bahacmâc e ʒâŋitazemec, â siocmâc e hone tarazemec; wamare gie baekac e hâcne ɋâric fuacne raniŋmu.
38 Sâcmutâc dâŋ qâqâsua ine sisipiriczi qanʒaŋ‐jopaocmu, â sindaŋne jaŋere ɋâricfâc ʒikazi omaec‐jopaocmu.
