1 Anutu‐nane, Anutu‐nane, wemocte behecnukomec? Wemocte mi babaficnu â ki owa‐nane mi mamana taic jukic?
2 O Anutu‐nane, no ʒoaŋko ki owa epe dâŋ mi bârisiekic, erâ ŋafeo wâc epe bâbâmiriŋ mi fua‐narekac.
3 Erâ sifu manakopac, go tiri jukomec, â Israe ŋic jaŋere mumuteŋzi gore eri ŋeŋe ekac.
4 Mimiŋnefâc‐nâŋec jaŋe gorao roweckembiŋ, roweckepie goki batarac‐jopameŋ.
5 Wira wâwâsic egarepie asao rocjopameŋ; gorao roweckembiŋte mi qurutuambiŋ.
6 No ine ɋâsu, no ŋic mâcne; ŋiczi nifepupu enareŋgopieŋ, ŋic ŋokac jaŋe mana wahacnuŋgopieŋ.
7 Honecnueŋgopieŋ jaŋe mururuc enare‐fâreeŋgopieŋ, mecpiroc enarehuc qizec fofotaric enarerâ mueŋgopieŋ:
8 “E mamanasiŋ‐ticne Wofuŋtao râeme fowecte eki bataraoc, â ere ecnekacte asa feferaŋko rooc me!”
9 Goki hâcne neŋgoc bumaŋkonec enaretec fuapo, goki moŋ nâhuc fohape ŋezicnumeŋ.
10 Fuapoonecteaŋ gorao fosiŋnerâ foekopac, neŋgoczi rocnuweckonecteaŋ Anutu‐nane erâ juekic.
11 Irec ʒi ʒârâ ʒâpâzi bâmbeŋnukacko, â babafic‐nane moc mi jume honekopacko, goki taicko mi mac junarec.
12 Râsi bocjahazi bulimakao iŋucne somâcnuŋgopieŋ, Basaŋkonec bulimakao momori jaŋe orâŋnuŋgopieŋ;
13 no maicnuhuc micjeŋic aŋkeŋgopieŋ, laioŋ wânʒâŋ iŋucnezi owacke‐nareŋgopieŋ.
14 Opâ iŋucne hoŋnupie ŋeratierâ fokopac, me kike bibiric‐nane ŋetara‐fârejec; buhândâŋ‐nane sâfâ iŋucne ejec, bumaŋ‐naneo oopâne fuahuctecne.
