1 Wofuŋ muteŋkeniŋ! Anutu‐nâŋec gae hecnezo i aŋacne; mumuteŋ gae hezo i biaŋkekac â sâcke‐hâmokac.
2 Wofuŋ e Jerusalem hae sesuc heɋârekac, e Israe ŋic bâtâtiec‐jopakicne i qânusuc‐jopakac;
3 bu heheric ejarekicne jaŋe bâmunaŋ‐jopakac, ehuc wicjeŋic foŋke‐jarekac.
4 E bâpiŋ ʒare‐jeŋic musanaŋkeekac, ehuc ʒâŋe‐jeŋic mufâreekac.
5 Wofuŋ‐nâŋec e kâcɋene, â tâpiri sâko‐ticnehec, erâ mamana tara‐ticne sâc tâmiric.
6 Wofuŋ e bawahac‐jopakicne dope hutuŋ ejareekac; ŋic sindaŋne ine qâfiec‐jopame mâreŋko waha foeŋgopieŋ.
7 Wofuŋ daŋge gae bâfeŋnerâ hecneniŋ, Anutu‐nâŋec gitazi musi bacneniŋ!
8 E karoraczi sambâŋ bâsâockeekac, ehuc mâreŋte biŋe hoe bâfuaekac, â tikio qinʒiŋ mume wefuekac.
9 E qowi nânâ bâfua‐jareekac, kâec kâec motecne jaŋe wiracnepie iŋuc jaha ejareekac.
10 E becâsic tâpiri‐ticnere aŋac mi manaekac, â ŋicte tâpiri wânʒâŋ hone aŋac mi eekac;
11 e araŋ bacneeŋgopieŋ â aki anonoc‐ticnere mamanac jueŋgopieŋ, jaŋere ine aŋackeekac.
12 Jerusalem, go Wofuŋ mumbiaŋkec, Zioŋ, go Anutuge ʒeri gae hecnec!
13 E haesacgere motâc basanaŋkewec, â haemaŋgao ŋokâfâcge jambuŋ‐jopawec.
14 E mâreŋgere mao wama bâfuawec, â nânâ fâri hândâŋne gumeqiŋguekac.
15 E mumutâc dâŋticne mâreŋko soreekac, eme micdâŋ‐ticnezi ʒocnehec gasackeekac.
16 E sinou soreme kateŋ iŋucne wahaekac, erâ wâc aisi uucne ʒafe tinac tieekac.
17 E aisi hândâŋne qânâ hândâŋ tinac wickeekac, eme mâmâteŋ fuame mozi sanaŋkerâ domaocmu?
