1 O Wofuŋ, go gufu koparic enareekic â mana jaŋgeŋnuekic.
2 No waha ŋeekopac me fahare domaekopac i manaekic, â mamanasu‐nane taicko juhuc hone taraekic.
3 Hata juju‐nane â fofomana‐nane ba esâic ecneekic, â wiac eenanere kâuc moc mi baekic.
4 Â dâŋ moc nameŋ‐naneo mi fua tâcneha, Wofuŋ, goki biac paŋʒâic jaha mana jaŋgeŋkeekic.
5 Go râpe‐naneo â mai‐naneo somâcnuekic, â mege nore faio râeekic.
6 Wiac irec fuŋne qame hukicne ehuc siricnukac, â fekicne jâmbâŋ ekacte manapemurâ qatataŋnekopac.
7 No Mâroge beherâ wena moc razapo? Me ʒâŋe maige wisecnehuc wena moc soŋkezapo?
8 Sambâŋko fezapoo go ira maicnunʒaŋ; hâmoc haeo hu fozapoo go bâfuacnunʒaŋ wâc.
9 Furic qânikiŋte fakec faio raku, hâwec qaŋeŋnao fisi ŋezapoo,
10 ine ira wâc gore mezia jowa qataŋ enarezac, â mefâregezi bâwâzâŋnuzac jaha.
11 No ʒiŋuc muzapo: “Duŋdapâczi bârârâŋnuoc, â tatamac forakac i ŋafe‐fâreoc,”
12 eme sifu dapâczi gore maio dapâc mi ezac, â ŋafe i honetec ʒoaŋ jaha ezac; dapâczi gorao tatamac hawari eekac hâcne.
13 Goki hâcne râpe hândâŋ‐nane ba akic emeŋ, neŋgoc bumaŋko go gahac fuŋkerâ qâhâcnumeŋ.
14 Go mâsi qâreŋge qeŋ bipinehecte daŋge gazakopac, wiac bapage qame hukicne! Maŋ qâqâtâc‐nane wâc hone jaŋgeŋkeekic.
15 Me kike‐nanere fuŋnere kâuc mi baekic; no soŋsoŋko bâfuacnukicne, neŋgocte bumaŋko basaricnukicne.
16 Ʒâŋegezi juju‐nanere bâpâŋ honemeŋ, â gore papiao mâreŋko juju‐nanere ʒoaŋ gie bapa dameŋ i qanaŋ birickekicne fowec.
17 O Anutu, mamanasugere manape furi sâko ekac! Ʒare‐ticne i qeŋ bipinehec!
18 Wemocko wosezapo, moŋgeŋ sirickekac! No mana ɋâɋârerâ gohec jaha jupemu.
19 O Anutu, go ŋic sindaŋne jopanʒaŋ me, â socnânâ jaŋe behecnu ranʒapiŋ me!
20 Jaŋe hâcne ʒaubac egareeŋgopieŋ, jaŋe sâqocne maŋkehuc pepec egareeŋgopieŋ.
21 O Wofuŋ, gore takic‐jopaekic i jaŋere mi takicnukac me? Â go musuacgueŋgopieŋ jaŋere mi mamakâcnukac me?
