1 Wofuŋ, no maŋ hâcbuc jaha daŋge gazape, nemu jaŋere maio mumumbiaŋ gae hegarepe.
2 Tiri ufuŋgaopec dunduŋ hupe, ehuc aki anonoc â jauŋ fârigere erâ, ʒâŋege mumbiaŋkepe. Go ʒâŋege â mumupaŋ dâŋge bafaharetec, wiac sasawa qâhuckerâ fewec.
3 No wira‐garepo dameŋ ira micnaneo romeŋ, â maŋte tâpiri bâsoka‐naremeŋ.
4 Mâreŋte ŋicwofuŋ sasawa jaŋe micdâŋge manambiŋte, Wofuŋ, go mumbiaŋgunʒepieŋ.
5 Jaŋe Wofuŋ wiac bapa‐ticnere gae henʒepieŋ; Wofuŋte eri tatamac i fekicne sâko hâcne.
6 Wofuŋ e fekicnezi wahakicne hone maiŋ ejareekac, maŋfefe ine taicko hone tarac‐jopaekac.
7 No ʒârâ hâriŋ maŋko juhape, go juju‐nane hone kitaŋ eekic; râsifâc‐nane imaŋ gomaŋ‐jeŋicte, mege sicnehuc aka hejareekic; mefâregezi baficnuekac.
