3 Wofuŋ mumbiaŋkeniŋ, Wofuŋ e uruc jauŋhec. Ʒâŋe‐ticne gae hecneniŋ, e miriŋ biaŋhec.
4 Wofuŋ e Jakobo sakarewec hâcne, Israezi ere eocte bâwosâewec.
5 No manakopac, Wofuŋ e kâcɋene; Wofuŋ‐nâŋeczi nemu sasawa siric‐jopakac.
6 Wofuŋ e wiac maname sâckeme sâc eekac, sambâŋko â mâreŋko, hâwecko â ʒâkâŋ ʒorao.
7 Eki hâcne mâreŋ qaŋeŋnaonec karorac ejareme fahareeŋgopieŋ, erâ hoere ɋuŋ bâbâric bâfuaekac, â rowaŋ‐ticnaonec mâŋâŋ soreme wareekac.
8 Eki hâcne Aigita ŋic mârâc fufuafâc‐jeŋic jopawec, ŋic mecne, qowi mecne.
9 E Aigita mâreŋ gorao mâsi qâreŋ bâfuahuc Farao â ŋicfâcne imac‐jopawec.
10 E ŋicguru bocjaha qâtâtiec‐jopawec, â ŋicwofuŋ tâpirihec qâhâmoc‐jopawec:
11 Sihoŋ, Amori ŋic jaŋere ŋicwofuŋ, Ogo, Basaŋ mâreŋte ŋicwofuŋ, â Kanaaŋ mâreŋte ŋicne ŋicne.
12 Erâ mâreŋ‐jeŋic merâfâc muhuc Israe ŋicfâcne jarewec.
13 O Wofuŋ, gore ʒâŋe tofamâc foraʒiocmu, Wofuŋ, go ʒâŋe biŋege mimiŋzi ɋâric foocmu.
14 Wofuŋ e ŋicfâcne jaŋere dâŋ dopeckeocmu, â kiŋaŋ qaqafâcne busâqoc mana‐jareocmu.
15 Ŋicne ŋicne jaŋere nemuɋâŋ i siliwa â gol, ŋicmezi ba akic ekicne.
16 Mic fojareha dâŋ mi mueŋgopieŋ; ʒâŋe fojareha wiac moc mi honeeŋgopieŋ.
17 Hazec fojareha sifu dâŋ mi manaeŋgopieŋ; erâ micjeŋicko nokafe moc mi fokac.
18 Ɋâŋ bâfuaeŋgopieŋ jaŋe ɋâŋ iŋucne enʒepieŋ! Erâ ɋâŋte‐mamanac jueŋgopieŋ jaŋe wâc iŋuc jaha.
19 Israe kikefuŋ, ŋoŋe Wofuŋ muteŋkeniŋ! Aroŋte kikefuŋ, ŋoŋe Wofuŋ muteŋkeniŋ!
20 Lewi kikefuŋ, ŋoŋe Wofuŋ muteŋkeniŋ! Wofuŋ araŋ bacneeŋgopieŋ, ŋoŋe Wofuŋ muteŋkeniŋ!
