1 O Wofuŋ, no nombâŋ fâhâŋnao juhuc, go wira‐garekopac.
2 Wofuŋ, go marac fânâŋ‐nane manac, owackehuc wâsicgukopac irec hazec râec!
3 O Wofuŋ, go kiŋtofa bajunʒaŋ muzac, mozi moc sanaŋkerâ domazac?
4 Erâ gorao ine kiŋ bebehe fokac, i ŋic nâŋe go araŋ bagarenaŋte.
5 No Wofuŋ woŋeckekopac, maŋnanezi woŋeckekac, erâ mumupaŋ dâŋticne worickekopac.
6 Maŋnanezi Wofuŋ woŋeckekac, ine ŋafe soŋaŋ jaŋe ʒoaŋ hejâpeeŋgopieŋ i sirickehuc hejâpekopac, i sirickehuc hejâpekopac.
7 Israe kikefuŋ, go Wofuŋ worickec. Wofuŋtao hâcne aki anonoc fokac, erao kiwiric roro ɋârâŋnea fokac.
