35 Sâcmutâc dâŋgere hatao jowacnuzemec; no irec aŋac‐nane fokac.
36 Maŋnane fâretec moneŋ huhurere andac râpeckehuc, mumutaniŋ dâŋgao qohotazejec.
37 Ʒâŋe‐nane bâtikietec wiac sisirowenao mi fizepac; ehuc hatagao juju bâfua‐narec.
38 Araŋ bagareeŋgopieŋ jaŋe wiac jarezo mupaŋkemeŋ, wiac irec fârine kiŋaŋŋicge norao bâfuazemec.
39 Mimihec jujure hâwicnukacte manahaŋ nowaruzejec; gore mumutâc dâŋ ine biaŋne.
40 Jâmbomac, no mumutâc dâŋgere maŋhâhâŋ enarekac, irec tiŋnegezi juju bâfua‐narec.
41 O Wofuŋ, aki anonocgere fârine norao fuazejec, â mumupaŋgere sâcko baficnuzemec.
42 Eme mu ruruc enareeŋgopieŋ jaŋe dâŋ sâcne bâtikie‐jarepemu, no gore dâŋko hâcne roweckeekopac.
43 No dameŋ sâc dâŋfâri mupemurâ tâpiri mi nowac rozemec, no mumutiŋ dâŋgere mamanac jukopac hâcne.
44 No sâcmutâc dâŋge ʒuʒuhuc bajupemu, ehuc moc mi behepemu.
45 No mumutâc dâŋgere mu wioc epo, irec rambaŋko sâcne rac warec jupemu.
46 Erâ no mimi gaŋgaŋ tâmiric ŋicwofuŋ maio, mumutaniŋ dâŋgere mu binaŋ epemu.
47 No sâcmutâc dâŋgere aŋacnuekacte, irec dâŋ muhuc mana ʒiziweekopac.
48 Erâ sâcmutâc dâŋgere manape fejâmbâŋkeekac, ehuc dâŋsanaŋgere manatâc qâtâc eekopac.
49 Kiŋaŋŋicge no dâŋ nazameŋ irec fârine bâfuac, go enaretec irec woŋec juekopac hâcne.
50 Mumupaŋ dâŋgezi bâgunucnuwec, izi ʒârâ hâriŋko bâmiriŋnuekac.
51 Ŋic sindaŋne jaŋe mâretec mu ruruc enareeŋgopieŋ, eme no ine sâcmutâc dâŋge mi râpeckeekopac.
52 O Wofuŋ, go mumutâc dâŋge esecne mufuameŋ, no irec manasupe bâmiriŋnuekac.
53 Ŋic sindaŋne jaŋe sâcmutâc dâŋge râpeckeeŋgopieŋ, irec mâretec aaricnuekac.
54 Jaba mâreŋ‐naneo ʒi jukopacko, dâŋsanaŋgezi ʒeri gae‐nane eekac.
55 O Wofuŋ, no ŋafeo ʒâŋegere manasuhuc foekopac, ehuc sâcmutâc dâŋge basanaŋkeekopac.
56 Mumutâc dâŋge bajukuhape, wiac fâri biaŋ i fua‐narewec.
57 Wofuŋ, go kâdoc biaŋ‐nane; irec no dâŋge bajuzo mupaŋkekopac.
58 No maŋ hâcbuc jaha numu‐garekopac: “Mumupaŋgere sâcko aki anonoc enarec.”
59 Go wiac eekic no irec manasurâ, mumutaniŋ dâŋge mana maŋ ezo enarekac.
60 No ŋeŋec ʒeʒepec mi ehuc fâro barâ sâcmutâc dâŋge reŋkeekopac.
61 Ŋic sindaŋne jaŋere uficzi orâŋnume, sifu sâcmutâc dâŋgere mi nikecnuekac.
62 No ŋafe ʒâʒâŋiŋko faharerâ, mumutâc dâŋge tiŋne irec mumbiaŋguekopac.
63 Araŋ bagarehuc mumutâc dâŋge reŋkeeŋgopieŋ jaŋe âgo ejare‐fâreekopac.
64 O Wofuŋ, aki anonocgezi mâreŋ fusucmawec; irec go dâŋsanaŋge qazu‐narezemec.
65 O Wofuŋ, go mumupaŋ dâŋgere sâcko kiŋaŋŋicge no ehâmo‐naremeŋ.
66 No sâcmutâc dâŋge mana ʒakiekopacte maŋɋârâŋ â mamana tara qazu‐narezemec.
67 Go mi bawahacnuhaŋ qac qâsoric ehuc jupo; ʒiŋuczia ine dâŋge bâjâpekopac.
68 Go uruc jauŋgeheczi eehâmo gie baekic, irec dâŋsanaŋge qazu‐narezemec.
69 Pepec‐jeŋicheczi micko âkec enarembiŋ, no ine mumutâc dâŋge maŋ hâcbuc jaha honehuc juekopac.
70 Maŋjeŋic râŋgeŋkerâ mumuŋ jâc sahac iŋucne ewec; no ine sâcmutâc dâŋgere bubiaŋ fonarekac.
71 Goki sowine bawahacnumeŋ; iŋuc etecne dâŋsanaŋgere fuŋne manapo.
72 Gol â siliwa guru sâkore manape wahaha micgere sâcmutâc dâŋte manape fekac.
73 Megezi sahac‐nane bâfuarâ ba akic emeŋ; ʒi ine mamana tahacnutec sâcmutâc dâŋge manazepac.
74 Araŋ bagareeŋgopieŋzi honecnurâ aŋac‐jopaocmu, noni dâŋge worickehuc jupo hâcne.
75 O Wofuŋ, no manakopac, okac babazuge tiŋne, go jauŋ fârigere erâ bawahacnumeŋ.
76 Aki anonocgezi bâmiriŋnuzejec, kiŋaŋŋicge no mupaŋke‐naremeŋ irec sâcko.
77 Buurucgezi fisi iqicnume juzepac; sâcmutâc dâŋge mana ʒiziweekopac i.
78 Pepecnehec jaŋe maŋgâŋ ro waha âte enarembiŋte, goki mimi qaqa ejarezemec; no ine mumutâc dâŋge manasuhuc jupemu.
79 Araŋ bagareeŋgopieŋ â mumutaniŋ dâŋge maŋkeeŋgopieŋ, jaŋe ejaretec norao ʒuhuckenʒepieŋ.
80 Maŋnanezi dâŋsanaŋgao paŋʒâic qohotazejec, eme moc mi qurutuazepac.
81 Maŋ qâqâtâc‐nanezi bâbâpiaŋgere hâmohuc jukac, dâŋgezi fâri fideteŋ eocte woŋec juekopac.
82 Ʒâŋe‐nanezi mumupaŋgere fârine honeocte fiipieku betaŋkekac, ehuc wiokac: “Mo dameŋko bâmiriŋnuocmu?”
83 No ʒopo ʒuo foku hahaŋkeekac iŋucne epo, erâ sifu dâŋsanaŋgere mi nikecnuwec.
84 Kiŋaŋŋicge nore ŋafe ʒoaŋ wezimuc fokac? Fific guguriŋ enareeŋgopieŋ jaŋere dâŋ mo dameŋko mutaracmu?
85 Ŋic pepecne jaŋe wiwitic râe‐narembieŋ, sâcmutâcgere sâcko mi jueŋgopieŋ jaŋe hâcne.
86 Sâcmutâc dâŋge i dâŋ fârine sasawa; jaŋe ine bureczi nu jâpec eeŋgopieŋte baficnuc!
87 Jaŋe mâreŋko juju‐nane hetâcnezo embieŋ, eme sifu mumutâc dâŋge mi behekopac.
88 Go aki anonocgere erâ juju‐nane akickec; eme no micgere mumutaniŋ dâŋ reŋkezepac.
89 O Wofuŋ, gore dâŋ i sambâŋko sanaŋne keteŋkekicne fokac.
90 Jauŋ fârige mimiŋzi ɋâric fosanaŋkekac; â mâreŋ ine hobeteŋne râemeŋte ŋesanaŋkekac.
91 Gore micdâŋte miŋecgac ŋekac jaha â wiac sasawa jaŋe go kiŋaŋ qagareŋgopieŋ.
92 Sâcmutâc dâŋgezi bubiaŋ mi qanarezacko ine maŋʒâiczi sipiricnume omaezapo.
93 Mumutâc dâŋgere moc mi nikecnuzokac, izi hâcne bâgunucnutec juekopac.
94 Go runane jukomecte baficnuc, no mumutâc dâŋgere wiohuc juekopac.
95 Ŋic sindaŋne jaŋe nuniŋte somâ barâ foeŋgopieŋ, no ine mumutaniŋ dâŋge maŋkehuc juekopac.
96 Wiac qarâ biaŋ sasawa i sifu babahacne fuame honeekopac, gore sâcmutâc dâŋzi ine roma roma bakicne.
97 Sâcmutâc dâŋgere aŋacnuekac i fuŋmoc jâmbâŋ! Ʒoaŋ ʒora mana utuckehuc juekopac.
98 Sâcmutâc dâŋgezi maŋɋârâŋ bâfua‐narekume, râsifâc‐nane siric‐jopaekopac; no tofamâc maŋke juekopac hâcne.
99 Mamanahec ehuc qaqazufâc‐nane qâhuc‐jopaekopac, mumutaniŋ dâŋge mana utuckeekopac irec hâcne.
100 Wiac mana wosâehuc ŋicraŋɋa siric‐jopaekopac, mumutâc dâŋge hone jaŋgeŋkekopac irec hâcne.
101 Kike‐nanezi hata sâqocne i me i âtezacte aka hecneekopac, i dâŋge reŋkepemurâ iŋuc eekopac.
102 Go mumutâc dâŋge qazu‐naremeŋte, no moc mi râpeckeekopac.
103 Dâŋge manape aŋac ʒizine eekac, izi baŋacte aŋac sirickekac i!
104 Gore mumutâc dâŋzi mamana tara bâfua‐nareekac; irec hata hehesicne geŋke‐fâreekopac.
105 Dâŋgezi kike‐nane lambe ecneekac, â hata‐naneo tatamac bâfuaekac.
106 No mumutâc dâŋge tiŋne i bâjâpepemurâ, Anutu gore maio mupaŋkehuc mujomirepo.
107 No ro waha âte enarekicne; o Wofuŋ, go dâŋgere sâcko bâgunucnuc.
108 O Wofuŋ, no afeckehuc miczi taha bagarepe manatec sâckezejec, eme mumutâc dâŋge qazu‐narezemec.
109 No dameŋ sâc hâmoczi maicnuekac, ehame sâcmutâc dâŋge mi nikecnuekac.
110 Ŋic sindaŋne jaŋe bitiŋ râe‐narembieŋ, no ine mumutâc dâŋge mi râpeckekopac.
111 Mumutaniŋ dâŋgezi merâfâc fofo sanaŋ‐nane ekac; ŋicbureŋ, i buhândâŋ‐nane ekac.
112 No dâŋsanaŋge reŋkepere maŋnane qafeŋkekopac, i dameŋ sâc eraku etarapemu.
113 Ŋic maŋ sosohoc jaŋere takicnuekac, sâcmutâc dâŋgere ine aŋacnuekac.
114 Go dapeŋ‐nane â maro‐nane, no dâŋge maŋzi worickekopac.
115 Sâqocne bapa, ŋoŋe behecnu raniŋ, eme Anutu‐nanere sâcmutâc dâŋ reŋkepe.
116 Mumupaŋgere sâcko dopecnutec juzepac, eme mamanac‐nanezi fârimâc eme mi qurutuazepac.
117 Basanaŋnutec bâbâpiaŋ bâfuazepac, erâ dâŋsanaŋge ʒuʒuhuc jaha bajuzepac.
118 Qâsoriehuc dâŋsanaŋge râpeckeeŋgopieŋ jaŋe behec‐jopaekic; jei, eeatuc gie‐jeŋic fârimâc eekac.
119 Mâreŋko ŋic sindaŋne sasawa jaŋere manatec jawa eekac; irec mumutaniŋ dâŋgere aŋacnuekac.
120 Go araŋ bagarehuc sahac‐nane gâgâmârâekac, â mumutara dâŋgere mezacnuekac.
121 Wiac tiŋne â biaŋne ewarehuc jupo; irec bawahacnueŋgopieŋ jaŋerao mi qikiŋnuc.
122 Kiŋaŋŋicge no sacfozic enarec, ehuc penaroŋhec jaŋe mana‐jaretec mi bawahacnunʒepieŋ.
123 Mumupaŋge tiŋne irec fârine fuaocte ʒâŋe‐nanezi fiipieku betaŋkekac.
124 Kiŋaŋŋicge no aki anonocgere sâcko wiac enarec, ehuc dâŋsanaŋge qazu‐narec.
125 No kiŋaŋŋicge jukopacte mamana tara tahacnuc, eme mumutaniŋ dâŋge mana jaŋgeŋkezepac.
126 Ŋic jaŋe sâcmutâc dâŋge huckembieŋ; irec Wofuŋ goki okacne bazu‐jarecmurâ dameŋne maickekac.
127 Irec no sâcmutâc dâŋgere fehuc aŋacnukac, gol â gol ematauckekicne irec aŋac‐nane wahakac.
128 Erâ no mumutâc dâŋgere sâcko hata tiŋne juekopac, burec hatane hatane irec takicnuekac.
129 Mumutaniŋ dâŋge i eri‐ticnehec; irec maŋnanezi ira qohotaekac.
130 Dâŋgere fuŋne ritupie tatamac fuaekac, eme ŋic maŋhumuc jaŋe wiac mana jaŋgeŋkeeŋgopieŋ.
131 No sâcmutâc dâŋgere boc enareekacte maŋhâhâŋ ehuc micaaŋ jukopac.
