16 Mpʉ́sə isâ ínɨ, mə bá kwo zə lwɔ̧́ banda mə *Dávid. Mə bá sɛɛŋg íbúgʉ́lə yâ cínɔŋg nə́ ndɛɛ́ mə kwo tə̂l banda dɔɔŋg tʉ́təlî.
17 Ja jɔɔŋgʉ̂, buud bɛ̂sh bwə́ bá sɔ̧́ Cwámba. Haaw, buud ɔ ílwoŋ byɛ̂sh mə á jɔ̂w nə́ í bɛ̧́g jínə́ dâm yí. Ntɔ́ wə́ Cwámba nyə á cɨ yɛ́.
18 A mə́ sá íyuug byé sə́ mə́ bwey mpu wúlə yág yí.
19 «Sâ jɔɔŋg wə́ mɛ́ mə dʉ́g nə́, ilwoŋ í búúd í ŋgə́ cɛ́nd kuú njɔɔnd ŋgə yid wə́ Zɛmbî yí, sə́ ajə́láyɛ́ nə wá bwo məkwowʉla cʉgʉd.
20 Njɨ, sə́ cíləg bwo nə́ bwə́ sásʉ́lə́g məlwaagʉwo mə́ ózɛmbî ɔ́ áyadʉ́g, nə məlwaagʉwo mâ jaŋgálə múúd bɨná kú nə bâ, nə məlwaagʉwo mâ də́lə cúdú nyə ámə yə məcií kú shwɨy yɛ́, nə də́lə mə́cií.
21 Sə́ mə́ mpú nə́ tɛ́ɛ́d íkala i búúd í ayág óbwiiŋgyɛ ɔ lâŋ ɔ́ Moyîz bʉ́sə míŋgwə́la myɛ́shʉd. Mwɔ̂w mə Sábaad mɛ̂sh dɨ́, bwə́ lɔ̧́ mícilyá myɛ́ *mə́mpáánzə́ mə́ mínjɨ́ɨ́gʉ́lá mɛ̂shʉd.»
22 Ntɔ́, nə buud ɔ lwámá, nə ocúmbá buud, nə Dɔ̧ lʉ́ óbúgʉla dɛ̂sh bwə́ mú dʉ́g nə́ bwə́ jəlá nə fɛ́ɛ́sh bɔ́ɔ́l búúd bə́nɔ̂ŋ Pwôl nə Barnábas bwə́ kə́g Antyósh. Bwə́ músə kənd bɔ́ɔ́l fwámɛ́ búúd wâ Dɔ̧: nə Yûdə bwə́ á dʉ nə́mə́ jɔ̂w nə Barnábas yɛ́, nə Sílas.
23 Bwə́ mú kənd bwo nə kálaad ɛ́ga nə́: Sə́, buud ɔ lwámá nə ocúmbá buud nə bɔ́ɔ́l óbúgʉla bɛ̂sh, sə́ mə́ bə́da bɨ́ obúgʉla bɨ́ cúgɛ́ Oyúdɛn wá, bɨ́ bɔɔŋg bʉ́sə́ Antyósh nə Sirî nə Silisî wá.
