23 Namaanan now isab to nadeygan ni Jesus su kibali indata sikandin iyu to Diyus, su tahan din man planu sikan. Na, sikiyu to migdata manda kandin diya to mgo otow no wada Diyus agun iyansang duon to krus. Pigpahimatajan now,
24 di pigbanhaw sikandin to Diyus. Pigyuwas din si Jesus to gahom to kamatajon su kona ogkahimu no tagonan sikandin to sikan.
25 Su meyduon intag-an ni Hari David to diya una bahin kandin no pig-iling, ‘Kanunoy ku pigkita to Diyus kani to dani ku to pagpanalipod kanay. Kaling kona ogkaamonu to ginhawa ku.
26 Tongod to sikan, ogtukhow a hilabi. Kona ku ogkapogongan to pagsaja kandin, Su inggad mamatoy to yawa ku, meyduon da ogkaiman ku.
27 Su namaan a no kona nu puli og-ojowan to umagad ku diya to banwa to mgo umagad, aw kona nu igtugut no madunut to yawa ku no pinadajag nu.
28 Pighinduan a nu to dayan pailing diya to matuud no kinabuhi, aw oglipajon a nu hilabi su madani ka man kanay.’ ”
29 Migpadajun si Pedro, “Mgo suun ku, hintawa man sikan ognangonon ni David? Sikandin buwa ko yain? Kona ogkahimu no sikandin. Bantugan iyan si Hari David no minuna, di nayugoy da kamatoy. Hangtod kuntoon ogkitaon ta pad sikan pigyobongan kandin, aw wada duwa-duwa no nadunut on to yawa din.
