Mga Awit 119:50-75 in Tagalog

⁵⁰ Ito'y aking kaaliwan sa aking pagkapighati: sapagka't binuhay ako ng iyong salita.

⁵¹ Ang palalo ay dumuwahaging mainam sa akin: gayon ma'y hindi ako hihiwalay sa iyong kautusan.

⁵² Aking inalaala ang mga kahatulan mo ng una, Oh Panginoon, at ako'y nagaliw sa sarili.

⁵³ Maalab na galit ang humawak sa akin, dahil sa masama na nagpabaya ng iyong kautusan.

⁵⁴ Ang iyong mga palatuntunan ay naging aking mga awit sa bahay ng aking pangingibang bayan.

⁵⁵ Aking inalaala sa gabi ang pangalan mo, Oh Panginoon, at sinunod ko ang iyong kautusan.

⁵⁶ Ito ang tinamo ko, sapagka't aking iningatan ang mga tuntunin mo.

⁵⁷ Ang Panginoon ay aking bahagi: aking sinabi na aking tutuparin ang iyong mga salita.

⁵⁸ Aking hiniling ang iyong biyaya ng aking buong puso: magmahabagin ka sa akin ayon sa iyong salita.

⁵⁹ Ako'y nagiisip sa aking mga lakad, at ibinalik ko ang aking mga paa sa iyong mga patotoo.

⁶⁰ Ako'y nagmadali, at hindi ako nagmakupad, na sundin ang iyong mga utos.

⁶¹ Pinuluputan ako ng mga panali ng masama; nguni't hindi ko nilimot ang iyong kautusan.

⁶² Sa hating gabi ay babangon ako upang magpasalamat sa iyo, dahil sa iyong mga matuwid na kahatulan.

⁶³ Ako'y kasama ng lahat na nangatatakot sa iyo, at ng nagsisitupad ng iyong mga tuntunin.

⁶⁴ Ang lupa, Oh Panginoon, ay puno ng iyong kagandahang-loob: ituro mo sa akin ang iyong mga palatuntunan.

⁶⁵ Ginawan mo ng mabuti ang iyong lingkod, Oh Panginoon, ayon sa iyong salita.

⁶⁶ Turuan mo ako ng mabuting kahatulan at kaalaman; sapagka't ako'y sumampalataya sa iyong mga utos.

⁶⁷ Bago ako nagdalamhati ay naligaw ako; nguni't ngayo'y tinutupad ko ang iyong salita.

⁶⁸ Ikaw ay mabuti, at gumagawa ng mabuti; ituro mo sa akin ang iyong mga palatuntunan.

⁶⁹ Ang palalo ay kumatha ng kabulaanan laban sa akin: aking tutuparin ang iyong mga tuntunin ng buong puso ko.

⁷⁰ Ang puso nila ay matabang gaya ng sebo; nguni't ako'y naaaliw sa iyong kautusan.

⁷¹ Mabuti sa akin na ako'y napighati; upang aking matutuhan ang mga palatuntunan mo.

⁷² Ang kautusan ng iyong bibig ay lalong mabuti sa akin kay sa libong ginto at pilak.

⁷³ Ginawa ako at inanyuan ako ng iyong mga kamay: bigyan mo ako ng unawa, upang matutuhan ko ang iyong mga utos.

⁷⁴ Silang nangatatakot sa iyo ay makikita ako, at matutuwa; sapagka't ako'y umasa sa iyong salita;

⁷⁵ Talastas ko, Oh Panginoon na ang mga kahatulan mo ay matuwid, at sa pagtatapat, iyo akong dinalamhati.

⁵⁰ Ito ang kaaliwan ko sa aking paghihirap: na pinapanatili akong buhay ng pangako mo.

⁵¹ Hinahamak ako ng mga mapagmalaki, pero hindi ako tumalikod sa iyong batas.

⁵² Inisip ko ang tungkol sa mga matuwid mong utos noong unang panahon, Yahweh, at inaaliw ko ang aking sarili.

⁵³ Napuno ako ng matinding galit dahil sa mga masasama na hindi sumusunod sa iyong batas.

⁵⁴ Ang mga alituntunin mo ang naging mga awit ko sa bahay na pansamantala kong tinitirhan.

⁵⁵ Iniisip ko ang pangalan mo sa gabi, Yahweh, at iniingatan ang iyong batas.

⁵⁶ Ito ang naging gawain ko dahil sinunod ko ang mga tagubilin mo. HETH.

⁵⁷ Si Yahweh ang kabahagi ko; napagpasiyahan kong sundin ang kaniyang mga salita.

⁵⁸ Buong puso kong hinihiling ang iyong kagandahang-loob; maging mahabagin ka sa akin gaya ng pinangako ng iyong salita.

⁵⁹ Siniyasat ko ang aking mga pamumuhay at binaling ko ang aking mga paa sa iyong mga utos.

⁶⁰ Nagmamamadali ako at hindi ipinagpaliban ang pagsunod sa iyong mga kautusan.

⁶¹ Nabitag ako ng lubid ng masasama; hindi ko kinalimutan ang iyong batas.

⁶² Bumabangon ako nang hatinggabi para magpasalamat sa iyo dahil sa matuwid mong mga utos.

⁶³ Kasamahan ako ng lahat ng mga nagpaparangal sa iyo, ng lahat ng mga sumusunod sa mga tagubilin mo.

⁶⁴ Ang mundo, Yahweh, ay puno ng katapatan mo sa tipan; ituro mo sa akin ang iyong mga alituntunin. TETH

⁶⁵ Gumawa ka ng kabutihan sa iyong lingkod, Yahweh, sa pamamagitan ng iyong salita.

⁶⁶ Turuan mo ako ng tamang pagpapasya at pang-unawa, dahil naniniwala ako sa mga kautusan mo.

⁶⁷ Bago ako nasaktan, naligaw ako, pero ngayon, sumusunod ako sa salita mo.

⁶⁸ Mabuti ka at ikaw lang ang siyang gumagawa ng kabutihan; ituro mo sa akin ang iyong alituntunin.

⁶⁹ Siniraan ako sa mga kasinungalingan ng mayayabang, pero buong puso kong pinapanatili ang mga tagubilin mo.

⁷⁰ Tumigas ang kanilang mga puso, pero nasisiyahan ako sa batas mo.

⁷¹ Nakabubuti para sa akin na naghirap ako para matutunan ko ang mga alituntunin mo.

⁷² Mas mahalaga ang mga tagubilin mula sa iyong bibig kaysa sa libo-libong piraso ng ginto at pilak. YOD

⁷³ Ang mga kamay mo ang gumawa at humubog sa akin; bigyan mo ako ng pang-unawa para matutunan ko ang mga kautusan mo.

⁷⁴ Matutuwa ang mga nagpaparangal sa iyo kapag nakikita nila ako dahil nakatagpo ako ng pag-asa sa iyong salita.

⁷⁵ Alam ko, Yahweh, na makatarungan ang mga utos mo, at sa katapatang ito, pinahirapan mo ako.