7 Peg-ikagi din kenyan, migpedindilay se Parisiyo aw Sadusiyo. Yan migpeteniyay dan.
8 Egtoladà se Parisiyo te entayen te Timanem se otaw lekat te nematay, aw doen menge anghil, aw doen heman pedowan wedad temanan. Meneng egtoladà se Sadusiyo te wedad otaw meantay lekat te nematay, aw wedad anghil, aw wedad heman pedowan wedad temanan.
9 Yan dakel se samok dan. Penga niyan, doen menge menenoladà te punù ingkeliwat i Moises timindeg lenged te Parisiyo. Minikagi dan, “Aneng-aneng day, wedad salà din. Doen besi anghil minikagi diyà kandin.”
10 Ontò dan migsamok, aw nelemitan se kapitan aw mengimatay dan ki Pablo. Yan insogò din se menge sondalo amon engayen dan si Pablo aw ibingen dan sikandin doton te kotà.
11 Tengà te delem, migpekità se Pengolo diyà ki Pablo aw minikagi, “Ikà egkelemitan. Mig-indan ka den tepad kanak dini te Jerusalem. Meg-indan ka pa heman doton te Roma.”
12 Keeldawan niyan, doen menge Judiyo kenà egpemenal migsebad te pedowan mengimatay ki Pablo. Migpepekangay dan te eked dan kaen singed aw imetayan dan si Pablo.
13 Lampas te kepatan se otaw minakop kandan.
14 Penga niyan, dimoton dan te menge pengolo aw obanen te simbahan. Minikagi dan, “Migpepekangay kay te eked kay palos kaen singed aw imetayan day si Pablo.
15 Nayan, pemoyoi niyo diyà te kapitan te todà din ibingen si Pablo dini kenyo. Pegpelingo-lingo kaw te doen pa insaen niyo diyà kandin. Meneng benganan day sikandin amon imetayan day te eked pa dateng dini kenyo.”
16 Meneng dimineg se anak i Pablo te ibeg dan megbangan kandin. Yan dimoton te kotà amon meg-indan ki Pablo.
17 Penga niyan, tinawal i Pablo se sebad serhinto aw minikagi, “Ibingi se telaki seini doton te kapitan so doen iindan din.”
18 Yan inibing sikandin te serhinto doton te kapitan aw minikagi, “Nemoyò sìyan otaw kineleboso si Pablo te ibingen ko kamno se telaki seini, so doen iindan din kamno.”
19 Yan inibing te kapitan se telaki doton te keligbinan aw mig-insà, kagi din, “Atò, eden se iindan no kanak?”
20 Yan minikagi se telaki, “Miglalang den se menge Judiyo te memoyò dan kamno amon ibingen no si Tiyò doton te tiponanan te obanen te simbahan kealdaw. Megpelingo-lingo dan te doen pa insaen dan diyà kandin.
21 Meneng ikà egpemenal kandan, so lampas te kelowan se otaw megbangan kandin doton te dalan. Migpepekangay dan te eked dan kaen singed aw imetayan dan si Tiyò. Neketagad den dan aw tegadan dan olò se pegsogò nikaw.”
22 Minikagi se kapitan, “Ikà eg-indan diyà te doma te mig-indan ka den kanak.” Penga niyan, impekesayo din se telaki sìyan.
23 Penga niyan, impeangay te kapitan se dowa serhinto, aw minikagi diyà kandan, “Tiponi niyo se dowa gatos sondalo mipanaw, aw kepitowan sondalo somakay te kodà, aw dowa gatos mengibing te dilek amon meketagad dan, so mesayo kaw kwani alas nowibi te delem pesalo doton te Sesarya.
24 Pesekayi si Pablo diyà te kodà. Imendayi niyo se pegtonggò kandin amon wedad medaet domateng kandin lamig domateng doton te gobirnador si Felis.”
25 Doen heman solat impeibing te kapitan, kagi niyan,
26 “Siak si Claudio Lisias se simolat kamno Felis ontò melangkaw gobirnador day. Mebohay ka.
27 Se otaw impeibing ko kamno seini, dinakep sikandin te menge Judiyo, aw imetayan dan peden sikandin. Meneng dimoton a sipat menge sondalo amon ipelowà sikandin, so netegahan ko te sikandin se otaw sakop te Roma.
28 Pigtipon ko se kedita te obanen te simbahan, so ibeg ko ketegahan aw eden se ingkeopal te menge Judiyo kandin.
