16 Meketelo heman iyan keinang diyà kandin iling kenyan, aw penga niyan neengat se bekas doton te langit. Meneng wedad kinaen din.
17 Mig-aneng-aneng si Pedro aw eden se kedegdagan te kinità din. Na, dalem niyan, mig-insà se menge otaw insogò i Cornelio aw kenan se balay i Simon. Telobo pa mig-aneng-aneng si Pedro, dimateng dan doton te lelebangan te balay inogpaan din. Kenà dan Judiyo.
