Mbouŋ to Yes Israela 9:6-16 in Mutu

⁶ Koiagŋa tisami wa. Pale tineep tovene itaghoni taghoni gha ila. Ve ndug todi paam, yom ureu mbirisan di le tisob tilaledi. Tovenen tamtoghon pale lolodi imaagh padi kat.

⁷ Yoova ineep ila ina to ghamuuŋ pooz, ve iŋgin mbeb irau sawa isob. Ye ighur ina tonowen, ve inamnaam pa iŋgabiiz tamtoghon.

⁸ Ye iŋgagabiiz tamtoghon tisob to taan, ve ighagharaat pataŋani todi itaghon ŋgar deŋia. Ve igham pooz pa ndug ndug itaghon ŋgar raraate moghon.

⁹ Yoova inim ruum ariaŋa pa yes to koiadi tighur pataŋani padi. Ighaze pataŋani ivot, ye inim ledi ndug to yoŋgaaŋ.

¹⁰ Yoova, yes to tiwatag katin ghom, tinumeer ghom. Pasa, ndiran to tizuaria di payom, yom irau upul murim padi maau.

¹¹ Ambou ve apait Yoova. Ye ineep izi ndug Zion, ve ighamgham pooz. Uraat tintina to ye ighamgham di, avotia varudi le irau ndug ndug.

¹² Yes to tirab tamtoghon le naghodi siŋ, Yoova ighurghur di maau. Pale iyat ŋgar todi tonowen. Ve tamtoghon to tinumeera ve timbadbaad pataŋani, ye irau lolo imaagh pa taŋiiz todi maau. Pale iuul di.

¹³ O Yoova, ughita pataŋani to koiagŋa tigham payou ne! Yes tiwaghamun ghou kat, ve rismoghon tone namaat. Lolom isamin ghou, ve upas ghou navot pa pataŋani tonene.

¹⁴ Leso nayoon ila ataam to ndug Zion, ve nasavia uraat tintina tisob to yom ughamgham di payou. Ve napait ghom toman tinig iza. Pasa, yom to ugham mulin ghou.

¹⁵ Ndug ndug to tiwatag ghom maau, titai saambu leso tikis tamtoghon. Eemoghon taudi titap tizila. Malum to tiraara pa tisavag tamtoghon, nene taudi tiŋgudi muul.

¹⁶ Yoova iŋgagabiiz tamtoghon, ve ighurghur atia padi itaghon ŋgar deŋia moghon. Leso ipatooŋ tau padi ve tiwatagi. Liis to ndiran samsamia tighuri, nene iliis taudi.

⁶ Koiagŋa tisaghat wa. Pale tileep tauvene taghon taghon gha ila. Ve nugh toozi paam, yo ureu mbirisai zi le tisov tilalez. Tauvene tamtamon pale lolozi iveghai zi kat.

⁷ Yoova ileep ila niia to ghamuuŋ pooz ve iŋginŋgin gabua irau saawe. I igharaat niia tawe ve isasaŋan pa gabizooŋ tamtamon.

⁸ I igagabiiz tamtamon tisov to taan, ve ighagharaat pataŋani toozi itaghon ŋgar duduuŋa. Ve igham pooz pa nughmariŋ itaghon ŋgar raraate mon.

⁹ Yoova imin ruum ariaaŋa to ipoon yes tau koiazŋa tighur pataŋani pazi na. Ighe pataŋani ivot, mako i imin lezi nugh to yoŋgaaŋ.

¹⁰ Yoova, yes tau tiwatagh katin ghom na, tinumeer ghom. Pasaa, zeran tau tizuari zi payo, yo irau ughur murim pazi mako.

¹¹ Ambou mbouŋ to apakur Yoova. I ileep izi nugh Zion, ve ighamgham pooz. Uraat tintiina tau i ighamgham zi na, avotia varuzi le irau nughmariŋ.

¹² Yes tau tiliŋ siŋ pa tamtamon na, Yoova irau ighurghur zi mako. Pale iyat ŋgar toozi tawe. Ve tamtamon tau tinumeera ve tibadbaad pataŋani na, i irau loolo iveghai taŋiiz toozi mako. I pale iuul zi.

¹³ O Yoova, ughita pataŋani tau koiagŋa tigham payau ne! Yes tivaghamun ghau kat le naghe namaat. Lolom isaghatin ghau, ve upas ghau navot pa pataŋani tane.

¹⁴ Leso nayooz ila ataman to nugh Zion, ve nasavia uraat tintiina tisov tau yo ughamgham zi payau. Ve napait ghom toman tintinig. Pasaa, yo ta ugham mulin ghau.

¹⁵ Nugh nugh tau tiwatagh ghom mako na, titai puura leso tikis tamtamon. Eemon tauzi titap tizila. Puugh tau tiraaro pa saghavuuŋ tamtamon na, ene tauzi tighoon ila.

¹⁶ Yoova igabiiz tamtamon ve ighur atuya pazi itaghon ŋgar duduuŋa. Leso itotoi tauu pa tamtamon ve tiwataghi. Liis tau zeran sasaghati tighuru na, iliis tauzi.