Mbouŋ to Yes Israela 9:1-11 in Mutu

¹ O Yoova, you napait ghom pa poia tiom toman lolog. Ve naghaze navotia uraat gharatooŋadi to yom ughamgham di. Uraat tonanan, ite kat. Tamtoghon tighita di le ŋgar todi isob.

² You lolog poia kat ve tinig iza payom. Yom Maaron tiina to ulib pa ndimaronŋa tisob. Tovenen you pale nambou, ve napait izam.

³ Sawa to koiagŋa tighita katin tapirim, yes titoor di, ve tighaze tighau. Eemoghon titaptap tizi le tisob timatmaat.

⁴ Yom uneep ila inam to ghamuuŋ pooz, ve uŋgagabiiz tamtoghon. Ve gabizooŋ tiom, nene deŋia moghon. Yom ughita ghou ughaze ŋgar tiou deŋia. Tauto uul ghou pa saveeŋ tiou.

⁵ Yom uyaan ndug ndug to tiwatag ghom maau, ve ureu tamtoghon samsamiadi tilaledi. Yom umus izadi tilaledi wa. Irau tamtoghon matadi iŋgal di muul maau.

⁶ Koiagŋa tisami wa. Pale tineep tovene itaghoni taghoni gha ila. Ve ndug todi paam, yom ureu mbirisan di le tisob tilaledi. Tovenen tamtoghon pale lolodi imaagh padi kat.

⁷ Yoova ineep ila ina to ghamuuŋ pooz, ve iŋgin mbeb irau sawa isob. Ye ighur ina tonowen, ve inamnaam pa iŋgabiiz tamtoghon.

⁸ Ye iŋgagabiiz tamtoghon tisob to taan, ve ighagharaat pataŋani todi itaghon ŋgar deŋia. Ve igham pooz pa ndug ndug itaghon ŋgar raraate moghon.

⁹ Yoova inim ruum ariaŋa pa yes to koiadi tighur pataŋani padi. Ighaze pataŋani ivot, ye inim ledi ndug to yoŋgaaŋ.

¹⁰ Yoova, yes to tiwatag katin ghom, tinumeer ghom. Pasa, ndiran to tizuaria di payom, yom irau upul murim padi maau.

¹¹ Ambou ve apait Yoova. Ye ineep izi ndug Zion, ve ighamgham pooz. Uraat tintina to ye ighamgham di, avotia varudi le irau ndug ndug.

¹ Mbouŋ to David. Paesiiŋ ila pa ŋeer tau imuŋmuuŋ pa mbouŋ na tauvene: Mbouŋ tane aliiŋa ‘Almut Laben’ (o ‘Mateegh to naatu.’) O Yoova, yau napait ghom pa poia tsio toman lolog isov. Ve naghe navotia uraat ŋgeretazi tau yo ughamgham zi na. Uraat tana, maata ite. Tamtamon tighita le ŋgar toozi imbool.

² Yau lolog poia kat ve tintinig payo. Yo Maaron tiina tau uliiv zimaronŋa tisov. Tauvene yau aat nambou ve napait yo ezam.

³ Saawe tau koiagŋa tighit katin tapirim, yes titoor zi ve tighe tighau. Eemon titaptap tizi le tisov timataar.

⁴ Yo uleep ila niam to ghamuuŋ pooz, ve ugagabiiz tamtamon. Ve gabizooŋ tsio, ene iduduuŋ mon. Yo ughit ghau ughe ŋgar tsiau ene iduduuŋ. Tauta uul ghau pa saveeŋ tsiau.

⁵ Yo uyaon nugh nugh tau tiwatagh ghom mako na, ve ureu tamtamon sasaghatizi gha tilalez. Yo umus ezazi ilale wa. Irau tamtamon matazi iŋgal zi muul ne mako.

⁶ Koiagŋa tisaghat wa. Pale tileep tauvene taghon taghon gha ila. Ve nugh toozi paam, yo ureu mbirisai zi le tisov tilalez. Tauvene tamtamon pale lolozi iveghai zi kat.

⁷ Yoova ileep ila niia to ghamuuŋ pooz ve iŋginŋgin gabua irau saawe. I igharaat niia tawe ve isasaŋan pa gabizooŋ tamtamon.

⁸ I igagabiiz tamtamon tisov to taan, ve ighagharaat pataŋani toozi itaghon ŋgar duduuŋa. Ve igham pooz pa nughmariŋ itaghon ŋgar raraate mon.

⁹ Yoova imin ruum ariaaŋa to ipoon yes tau koiazŋa tighur pataŋani pazi na. Ighe pataŋani ivot, mako i imin lezi nugh to yoŋgaaŋ.

¹⁰ Yoova, yes tau tiwatagh katin ghom na, tinumeer ghom. Pasaa, zeran tau tizuari zi payo, yo irau ughur murim pazi mako.

¹¹ Ambou mbouŋ to apakur Yoova. I ileep izi nugh Zion, ve ighamgham pooz. Uraat tintiina tau i ighamgham zi na, avotia varuzi le irau nughmariŋ.