Mbouŋ to Yes Israela 98:1-9 in Mutu

¹ Ambou mbouŋ paghu pa Yoova! Pasa, mbeb gharatooŋadi to ye ighamgham di, nene ite kat. Nima waan iparab ariaŋa le ilib pa koia wa. Ye ipatooŋ tapiri patabuaŋ, ve igham mulin tamtoghon toni.

² Yoova ivotia ulaaŋ tiina to ye igham pa tamtoghon toni. Ye ipatooŋ ŋgar toni deŋia ila ndug ndug matadi, ve tighita katini wa.

³ Saveeŋ to ye imbua toman yes Israela, mata iŋgalŋgali, ve itataghoni. Tauto lolo ineep tuŋia ila todi ve iuluul di. Maaron toit iparab ariaŋa, ve igham mulin ghiit ila ndug tisob to taan matadi, ve tighita wa.

⁴ Yam taan to naol ne, asob lolomim poia pa Yoova, ve alool ve apait iza. Tinimim iza pani, ve ait mbouŋ pa apaiti.

⁵ Apambar ambam ve arab gita, ve ambou pa apait Yoova! Apambar ambam ve arab gita le titaŋ poia, ve apakuri.

⁶ Yoova, ye kinik tiina. Tinimim iza pani, ve avib tavuur toman trampet ila nagho, ve alool ve apaiti.

⁷ Te toman mbeb naol to anepneep ila te lolo, yam alool ve apait Yoova! Ve taan toman tamtoghon ve mbeb naol to anepneep ila taan, yam paam, alool ve apaiti!

⁸ Ve ya to naol ne paam, asob apambar nimamim pani, ve apaiti. Ve yam lolooz, asob alup avomim, ve ambou toman lolomim poia izi Yoova nagho, ve alool ve apait iza.

⁹ Pasa, ye ighaze inim. Leso iŋgabiiz tamtoghon tisob to taan, ve ighur atia padi. Pale iŋgabiiz ndug tisob to taan. Ve gabizooŋ toni, nene deŋia moghon.

¹ Ambou mbouŋ paaghu pa Yoova! Pa gabua ŋgeretazi tau i ighamgham zi na, maata ite kat. Niima tapir iparav ariaaŋ le iliiv koiŋa wa. I itotoi tapiri patabuyaaŋ, ve igham mulin tamtamon tooni.

² Yoova ivotia uleeŋ tiina tau i igham pa tamtamon tooni. I itotoi ŋgar tooni duduuŋa ila nughmariŋ matazi gha tighit katini wa.

³ Saveeŋ tau i imbua tomania yes Israela na, i maata iŋgalŋgali ve itataghoni. Tauta loolo isaghav zi ariaaŋ ve iuluul zi. Maaron toit iparav ariaaŋ gha igham mulin ghiit ila nughmariŋ matazi, ve tighita wa.

⁴ Yam nughmariŋ asov lolomim poia pa Yoova ve ayoor eeza. Tintinmim pani, ve ait mbouŋ to apakuru.

⁵ Arav ambam tomania gita, ve ambou to apait Yoova! Arav ambam tomania gita le luutu poia, ve apakuru.

⁶ Yoova, i kinik tiina. Aviv tavuur tomania trampet ila naagho, ve ayoor eeza toman tintinmim.

⁷ Te tomania gabua naol isov tau aleep ila loolo na, aliŋamim izaa ve apait Yoova! Ve taan tomania tamtamona ve gabua naol isov tau aleep ila na paam. Aliŋamim izaa ve apaiti!

⁸ Ve yaa paam, asov aposai nimamim pani ve apakuru. Ve yam loloz asov alup avomim, ve ambou toman lolomim poia izi Yoova naagho, ve ayoor eeza.

⁹ Pa i ighe ilam. Leso igabiiz tamtamon tisov to taan ve ighur atuya pazi. I pale igabiiz nughmariŋ to taan. Ve gabizooŋ tooni, ene iduduuŋ mon.