Mbouŋ to Yes Israela 97:6-11 in Mutu

⁶ Mbeb naol to tineep ila sambam paroŋania, tipatooŋ Yoova tighaze ŋgar toni deŋia moghon. Ndug tisob tighita mbeb tonowen, ve tighilaal Yoova tighaze ye iza tiina.

⁷ Tamtoghon tisob to timbesmbees pa maaron kaaromŋa anunudi, Yoova igham di mayadi. Pasa, maaron kaaromŋa todi tirau mbeb eta maau. Maaron todi tonowen pale tisob tiput aghedi pa Yoova, ve tipaiti.

⁸ Maaron, yes to ndug Zion tilooŋ varum pa uraat to yom ughamghami, le lolodi poia. Ve ndug ndug to Yuda paam, tisob tinidi iza. Pasa, yom uyondyood pa tamtoghon tiom, ve uluul di pa pataŋani todi.

⁹ Yoova, yom Maaron Tiina. Tamtoghon tisob to taan tineep ila sambam. Yom izam tiina le tiina kat. Ulib pa ndimaronŋa tisob.

¹⁰ Yoova lolo pa yes to tighurghur koi pa ŋgar samia. Tamtoghon toni to lolodi ineep tuŋia ila toni, ve titaghon ataam toni, ye inim sigeu padi, leso mbeb eta iwaghamun di sob. Ve ighamgham mulin di ila ndiran samsamia nimadi.

¹¹ Ye ighurghur ghazooŋa pa ndiran deŋiadi. Yes to ŋgar deŋia ineep tuŋia ila lolodi, ye igham di lolodi poia kat.

⁶ Gabua naol tau tighenaar ila sambam saamba na, tipaghazoŋai Yoova tighe ŋgar tooni iduduuŋ mon. Nughmariŋ tighita gabua tawe, ve tighilaal tighe Yoova, i eeza tiina.

⁷ Tamtamon tisov tau tibesbees pa maaron karomŋa anunuzi na, Yoova igham zi mayazi. Pasaa, maaron karomŋa toozi tirau gabua eta mako. Maaron toozi tawe pale tisov tiput aghezi pa Yoova ve tipakuru.

⁸ Maaron, yes to Zion tilooŋ varum pa uraat tau yo ughamghamu na, le lolozi poia. Ve nugh nugh to Yuda paam, tisov tintinizi. Pasaa, yo uyozyooz pa tamtamon tsio, ve uluul zi pa pataŋani toozi.

⁹ Yoova, yo Maaron Tiina. Tamtamon tisov to taan tileep ila yo sambam. Yo ezam tiina le tiina kat. Uliiv zimaronŋa tisov.

¹⁰ Yoova loolo pa yes tau tighurghur koi pa ŋgar saghati. Tamtamon tooni tau lolozi isaghavu ariaaŋ, ve titaghon eez tooni na, i imin sigheu pazi, leso gabua eta ivaghamun zi sov. Ve ighamgham mulin zi ila zeran sasaghati nimazi.

¹¹ I ighurghur ghazooŋa pa zeran duduŋazi. Yes tau ŋgar duduuŋa igheen ariaaŋ ila lolozi na, i igham zi lolozi poia kat.