Mbouŋ to Yes Israela 96:5-13 in Mutu

⁵ Pasa, ndimaronŋa tisob to ndug ndug timbesmbees padi, nene maaron kaaromŋa moghon. Ve Yoova, ye Maaron tau to ighur sambam toman mbeb tisob to tineep ila.

⁶ Ye iza tiina kat, ve ŋguruba iluvuti. Tapiri ve poia toni ipavonin rumai toni lolo, ve ipambooda le paghuna kat.

⁷ Tovenen yam tamtoghon to ndug ndug, ŋgar tiam ivot, ve aghilaal Yoova! Ŋgar tiam pakia ve apaiti. Pasa, ye le iza, ve tapiri tiina.

⁸ Iza tiina le tiina kat. Tovenen yam apaiti, ghoro deŋia. Anim toman paitooŋ tiam, ve alooŋ ala sirsiir to rumai toni lolo.

⁹ Yoova ipambood tau pa ŋgar toni patabuaŋ. Tovenen aput aghemim pani ve apaiti. Yam tamtoghon to taan, asob amatughez pani, ve atatan taumim ila mata.

¹⁰ Asaav pa ndug tisob aghaze: “Yoova, ye kinik tiina to iŋgin mbeb tisob! Muuŋ, ye ighur taan le pughu tuŋia. Tauto mbeb eta irau induura maau. Pale iŋgabiiz ndug ndug, ve ighur atia padi. Ve gabizooŋ toni, nene deŋia moghon.”

¹¹ Yam mbeb to sambam ve taan, lolomim poia ve tinimim iza. Ve te toman mbeb tisob to tineep ila lolo ne paam, aliŋamim iza tiina ve apait Yoova.

¹² Ve uum to naol ne, toman mbeb tisob to titub ila lolodi, lolomim poia ve tinimim iza. Ve ai toman mbeb tisob to su lolo paam, aliŋamim iza, ve alool ve apaiti Yoova iza.

¹³ Pasa, ye ighaze inim. Leso iŋgabiiz tamtoghon tisob to taan, ve ighur atia padi. Ye pale iŋgin tamtoghon tisob to taan, ve iŋgabiiz di. Ve gabizooŋ toni, nene deŋia ve onoon moghon.

⁵ Pasaa, zimaronŋa tisov tau nugh nugh tibesbees pazi na, ene maaron karomŋa mon. Ve Yoova, i Maaron tauu ta ighur sambam tomania gabua naol isov.

⁶ I eeza tiina kat ve mbonari ilivuti. Tapiri ve poia tooni ipavon rumei tooni loolo, ve ipaboode le paghuuna kat.

⁷ Tauvene yam tamtamon to nughmariŋ, ŋgar tsiam ivot ve aghilaal Yoova! Ŋgar tsiam pakia ve apakuru. Pa i le eeza, ve tapiri tiina kat.

⁸ I eeza tiina le tiina kat. Tauvene yam apaiti, o iduduuŋ. Alam tomania paitooŋ tsiam, ve aloŋ ala sirsiir to rumei tooni loolo.

⁹ Yoova ipabood tauu pa ŋgar tooni patabuyaaŋ. Tauvene aput aghemim pani ve apaiti. Yam tamtamon to taan, asov aroi pani, ve atatan taumim ila naagho.

¹⁰ Asaav pa nughmariŋ aghe: “Yoova, i kinik tiina tau iŋgin gabua naol isov! Muuŋ, i ighur taan le puughu iyaryaaŋ kat. Tauta gabua eta irau izuure mako. I pale igabiiz nughmariŋ, ve ighur atuya pazi. Ve gabizooŋ tooni, ene iduduuŋ mon.”

¹¹ Yam gabua to sambam ve taan, lolomim poia ve tintinmim. Ve te tomania gabua naol isov tau tileep ila loolo na paam, aliŋamim izaa tiina ve apait Yoova.

¹² Ve uum tomania gabua naol isov tau titum ila loolo na, lolomim poia ve tintinmim. Ve ai tomania gabua naol isov to su loolo paam, aliŋamim izaa, ve ayoor Yoova eeza.

¹³ Pasaa, i ighe ilam. Leso igabiiz tamtamon tisov to taan ve ighur atuya pazi. I pale iŋgin tamtamon tisov to taan, ve igabiiz zi. Ve gabizooŋ tooni, ene iduduuŋ ve onoon mon.