Mbouŋ to Yes Israela 92:1-11 in Mutu

¹ Yoova, yom Maaron To Ulib pa Ndimaronŋa Tisob. Ighaze you napait ghom pa poia tiom, ve nambou pa napait izam, nene igham lolog poia.

² Mboŋmaagh to naol ne, navovotia ŋgar tiom to lolom ineep tuŋia ila to tamtoghon tiom ve uluul di. Ve mboŋ, you navovotia gabuam to utataghon saveeŋ mbuaaŋ tiom. Ŋgar tovene igham lolog poia kat.

³ You narabrab gita ve kulele, ve namboumbou pa napait ghom.

⁴ Pasa, Yoova, uraat tiom igham lolog poia kat. Matag ilala pa mbeb naol to nimam igharaat di, ve nambou toman tinig iza.

⁵ Yoova, uraat to yom ughamgham di, nene tintina kat. Ve ŋgar tiom paam, pughu ariaŋa. Ila le ila kat. Tovenen nagham ŋgar pani, eemoghon naraua maau.

⁶ Eemoghon yes kankanooŋa tighilaal maau. Ŋgar todi inimale borouŋa. Tauto pataŋani to pale ivot pa ndiran samsamia, yes tigham ŋgar pani maau.

⁷ Onoon, aazne ndiran samsamia tivot tinim naol tinimale kikiliiŋ samsamia to tisaas le tirau ndug. Ve yes to tinoknok ghamuuŋ sosor, taghita taghaze nepooŋadi, poia kat. Eemoghon muri, yom pale upasob di, le tisob kat.

⁸ O Yoova, yom uneep sala, ve ughamgham pooz irau sawa isob.

⁹ Onoon kat, koiamŋa to tighamgham ŋgar samia, yom pale ureu mbirisan di, ve tisob tilaledi.

¹⁰ Eemoghon you, yom upakur ghou, ve ugham tapirig ivot tiina inimale makau sagsag. Ve poia tiom izaza tiou, inimale tiliŋ ŋgoreeŋ poia izala poghog.

¹¹ Yom utatan koiagŋa, ve tisami ila matag. Yom uwaghamun ndiran samsamia tonowen, ve nalooŋ katin taŋiiz todi.

¹ Mbouŋ to umbom patabuyaaŋ Yoova, yo Maaron Tau Uliiv Zimaronŋa Tisov. Isaav ighe yau napakur ghom pa poia tsio, ve nambou to napait ezam, ene igham lolog poia.

² Mboŋoozo ta naol ne, navovotia ŋgar tsio tau lolom isaghav tamtamon tsio ariaaŋ ve uluul zi. Ve mboŋ, yau navovotia gabuam tau utataghon saveeŋ mbuaaŋ tsio. Ŋgar tauvene igham lolog poia kat.

³ Yau naravrav gita ve kulele, ve namboumbou to napakur ghom.

⁴ Pasaa, Yoova, uraat tsio igham lolog poia kat. Matag ilala pa gabua naol tau nimam igharaat zi na, ve nambou toman tintinig.

⁵ Yoova, uraat tau yo ughamgham zi, ene tintiina kat. Ve ŋgar tsio paam, puughu ariaaŋa. Ila le ila kat. Tauvene nagham ŋgar pani, eemon narao mako.

⁶ Eemon yes kankanooŋa tighilaal mako. Ŋgar toozi imin borauŋa. Tauta pataŋani tau pale ivot pa zeran sasaghati na, yes tigham ŋgar pani mako.

⁷ Onoon, aazne, zeran sasaghati tivot timin naol imin oot sasaghati tau isaas le itav taan. Ve yes tau tinoknok ghamuuŋ sosor na, taghita taghe lepoogh toozi, ene poia kat. Eemon murei, yo pale upasov zi, le tisov kat.

⁸ O Yoova, yo uleep saaŋa, ve ughamgham pooz irau saawe.

⁹ Onoon kat, koiamŋa tau tighamgham ŋgar saghati na, yo pale ureu mbirisai zi gha tisov tilalez.

¹⁰ Eemon yau, yo upakur ghau, ve ugham tapirig ivot tiina imin makau sagsag. Ve poia tsio izazaa tsiau, imin tiliŋ ŋgoreeŋ poia izala pavog.

¹¹ Yo utatan koiagŋa ve naghit katin saghatiiŋ toozi. Yo uvaghamunia zeran sasaghatizi tawe, ve nalooŋ katin taŋiiz toozi.