Mbouŋ to Yes Israela 89:6-30 in Mutu

⁶ Yoova, sei to irau ghom? Yes to tineep izi sambam, yom ulib padi tisob. Aŋela eta irau ghom maau.

⁷ Sawa to yes daba to aŋela patabuaŋa tilup di pa savsaveeŋ izi ndug sambam, yes tiyoon luvutin ghom, ve timatughez ve tapait ghom. Pasa, tapirim tiina, ve ulib padi kat.

⁸ Yoova, yom Maaron ariaŋam kat, ve uŋgin mbeb tisob. Sei tapiri tiina kat inimale yom? Eta maau. Ve yom utortoor ŋgar tiom maau. Moghon moghon, utataghon saveeŋ mbuaaŋ tiom.

⁹ Yom to uŋgin te. Ighaze yaghur tiina imundig, ve ipei dibom tintina, yom irau ugham dibom imaat, ve taun izi.

¹⁰ Muuŋ kat, yom urab balagin Rahab daba ve imaat. Nimam pataŋani. Tauto urab matin koiamŋa, ve ureu mbirisan di tighau.

¹¹ Sambam ve taan, nene tiom. Pasa, yom to ughur di toman mbeb tisob to tineep ila.

¹² Yom ughur taan to ineep ila pa rag, ve ila imuul yavaar pughu. Lolooz Tabor ve lolooz Hermon lolodi poia, ve timboumbou ve tipait izam.

¹³ Yom ariaŋam ve tapirim tiina. Nimam waan, nene ariaŋa ve ŋguruba kat. Tauto urab koiamŋa ve ulib padi.

¹⁴ Ŋgar deŋia toman ŋgar to gabizooŋ tamtoghon itaghon ŋgar deŋia, tauto inim pughu pa pooz tiom. Ve ŋgar tisob to ughamgham di, nene tipatooŋ ghom tighaze: Lolom ineep tuŋia ila to tamtoghon tiom ve uluul di, ve utataghon saveeŋ mbuaaŋ tiom.

¹⁵ Yes to tilup di pa suŋuuŋ, ve tilolool ve tipait izam, tilaghlaagh ila ghazooŋa tiom, ve poia tiom izaza todi.

¹⁶ Yes tiwatag ghom toman ŋgar tiom. Tovenen ndag to naol ne, mboŋmaagh ila le rabrab izi, lolodi poia kat, ve tipapait izam pa ŋgar tiom deŋia.

¹⁷ Yei nigham tapirimai ilat tiom, tauto tinimai iza, ve izamai ivot inim tiina. Poia tiom, tauto igham tapirimai ivot le nilib pa koiamai.

¹⁸ Yoova, yom usia ŋgeu to inim sigeu payei. Ye to iponpoon koiamai. Maaron patabuaŋ to yei Israela, yom ughur lemai kinik pa igham pooz payei.

¹⁹ Yes to lolodi ineep tuŋia ilat tiom ve titaghon ataam tiom, muuŋ kat, yom upaghazoŋan di pa ŋgar to ughaze ughami. Yom usaav padi ila tandagiiŋ ughaze: “Ndaaba ariaŋa eez inepneep ila lolomim. You taug nasia ve naghuri inim kinik. Tauto nauuli ve nagham iza ivot inim tiina.

²⁰ You naghita mbesooŋa tiou David, ye iraua. Tauto naliŋ ŋgoreeŋ tiou patabuaŋ izala daba, ve naghuri pa uraat.

²¹ Ye pale inepneep ila nimag, ve napaloti irau sawa isob.

²² Tovenen koiŋa irau tilib pani maau, ve ndiran samsamia irau titatani maau.

²³ Pasa, you taug pale namuuŋ pani, ve natatan koia le tapiridi isob. Yes to tighur koi pani, you pale narab di tisob timatmaat.

²⁴ You pale nataghon saveeŋ mbuaaŋ to nagham pani, ve lolog ineep tuŋia ila toni, ve naghur poia tiou izaza toni. Pale naneep tomani ve napaloti, leso tapiri ivot inim tiina, ve ilib pa koia. Tovenen iza pale inim tiina kat.

²⁵ You pale nagham ival tiina tineep ila samba. Yes to tineep izi naari to Te Mediterenian, ve ila imuul ya Euprates dige.

²⁶ Ye pale isaav payou ighaze: ‘You Tamaŋ yom. Yom to Maaron tiou, ve Volaaŋa tiou ariaŋa. Yom uponpoon ghou pa koiagŋa unumale yaam tiina.’

²⁷ Ve you pale naghami inim natug aidaba. Tovenen ye pale iza tiina kat, ve ilib pa kinik tisob.

²⁸ Pale lolog ineep tuŋia ila toni ve nauuli irau sawa isob. Ve saveeŋ to nambua pani, tovene paam. Pale ineep tuŋia tovene itaghoni taghoni gha ila.

²⁹ Siŋ toni irau isob maau. Pale naŋgin papaghu toni, ve tineep pooi itaghoni taghoni gha ila tinimale sambam paroŋania. Pale tineep ila David ina to ghamuuŋ pooz, ve tiŋgin yes Israela irau sawa isob.

³⁰ Eemoghon ighaze papaghu toni tipul muridi pa saveeŋ tiou, ve laghooŋ todi, tisosor pa tutuuŋ to naghuri,

⁶ Yoova, sei ta irau ghom? Yes tau tileep izi sambam na, yo uliiv zi tisov. Aŋela eta irau ghom mako.

⁷ Saawe tau yes daaba to aŋela patabuyaaŋa tilup zi pa savsaveeŋ izi nugh sambam, yes tiyooz livutin ghom toman roiŋ tiina, ve tipakur ghom. Pasaa, yo tapirim tiina ve uliiv zi kat.

⁸ Yoova, yo Maaron saksakim ve uŋgin gabua naol isov. Sei tapiri tiina kat imin yo? Eta mako. Ve yo utortoor ŋgar tsio mako. Saawe isov, utataghon saveeŋ mbuaaŋ tsio.

⁹ Yo ta uŋgin te. Isaav ighe yaghur tiina izaa ve ipei dibom tintiina, yo irau ugham dibom imaat, ve taun izi.

¹⁰ Muuŋ geeg, yo urav valaghin Rahab daaba gha imaat. Nimam pataŋani. Tauta urav matin koiamŋa, ve ureu mbirisai zi tighawaar.

¹¹ Sambam ve taan, ene yo tsio. Pasaa, yo ta ughur zi tomania gabua naol isov tau tileep ve tigheen ila.

¹² Yo ughur taan tau igheen ila pa ragh, ve ila imuul yavaar puughu. Loloz Tabor ve loloz Hermon timboumbou toman lolozi poia ve tipait ezam.

¹³ Yo saksakim ve tapirim tiina. Nimam tapir, ene saghati. Tauta urav koiamŋa ve uliiv zi.

¹⁴ Ŋgar duduuŋa tomania ŋgar to gabizooŋ tamtamon itaghon ŋgar duduuŋa, tauta imin puughu pa pooz tsio. Ve ŋgar isov tau ughamgham zi na, itotoi ighe: Yo lolom isaghav tamtamon tsio ariaaŋ ve uluul zi, ve utataghon saveeŋ mbuaaŋ tsio.

¹⁵ Yes tau tilup zi pa suŋuuŋ toman lolozi poia ve tiyoryoor ezam na, tilaghlaagh ila ghazooŋa tsio, ve poia tsio izazaa toozi.

¹⁶ Yes tiwatagh ghom tomania ŋgar tsio. Tauvene saawe isov, ta mboŋoozo ila le ravrav izi, lolozi poia kat, ve tipapait ezam pa ŋgar tsio duduuŋa.

¹⁷ Yei nigham tapirimai ilat tsio, tauta tinimai izaa ve ezamai imin tiina. Poia tsio, tauta igham tapirimai ivot le niliiv koiamaiŋa.

¹⁸ Yoova, yo usiigh ŋeer tau imin sigheu payei. I ta iponpoon koiamaiŋa. Maaron patabuyaaŋ to yei Israela, yo ughur lemai kinik to igham pooz payei.

¹⁹ Yes tau lolozi isaghav ghom ariaaŋ ve titaghon eez tsio na, muuŋ geeg, yo upaghazoŋai zi pa ŋgar tau ughe ughamu. Yo usaav pazi ila tandaghiiŋ ughe: “Zaaba ariaaŋa ee ilepleep ila sosomim. Yau taug nasiigho ve naghuru imin kinik. Tauta nauule ve nagham eeza ivot imin tiina.

²⁰ Yau naghita besooŋa tsiau David, i irao. Tauta naliŋ ŋgoreeŋ tsiau patabuyaaŋ izala daaba, ve naghuru pa uraat.

²¹ I pale ileep ila yau nimag, ve napaloti irau saawe.

²² Tauvene koiŋa irau tiliivo mako, ve zeran sasaghati irau titatani mako.

²³ Pasaa, yau taug pale namuuŋ pani, ve natatan koiŋa le tapirizi isov. Yes tau tighur koi pani na, yau aat narav zi tisov timataar.

²⁴ Yau aat nataghon saveeŋ mbuaaŋ tau nagham pani na, ve lolog isaghavu ariaaŋ, ve naghur poia tsiau izazaa tooni. Pale naleep tomania ve napaloti, leso tapiri ivot imin tiina ve iliiv koiŋa. Tauvene eeza pale imin tiina kat.

²⁵ Yau aat nagham eval tiina tileep ila i saamba. Yes tau tileep izi nari to Te Mediterenian, ve ila imuul yaa Euprates ziige.

²⁶ I pale isaav payau ighe: ‘Yau Tamaŋ yo. Yo ta Maaron tsiau, ve Uleeŋa tsiau ariaaŋa. Yo uponpoon ghau pa koiagŋa imin maet tiina.’

²⁷ Ve yau pale naghamu imin natug aidaaba. Tauvene i pale eeza tiina kat le iliiv kinik tisov.

²⁸ Pale lolog isaghavu ariaaŋ ve nauule irau saawe. Ve saveeŋ tau nambua pani na, tauvene paam. Pale igheen ariaaŋ tauvene taghon taghon gha ila.

²⁹ Ziiri waaro tooni irau isov mako. Pale naŋgin paaghu tooni, ve tileep poi taghon taghon gha ila imin sambam saamba. Pale tileep ila David niia to ghamuuŋ pooz, ve tiŋgin yes Israela irau saawe.

³⁰ Eemon isaav ighe paaghu tooni tighur murizi pa saveeŋ tsiau, ve laghooŋ toozi isapir pa tutuuŋ tau naghuru na,