Mbouŋ to Yes Israela 89:40-52 in Mutu

⁴⁰ Didiiŋ ariaŋa to iluvut ndug toni, yom ureu mbirisani izi. Ve uwaghamun ruum toni ariaŋadi paam, le tisob timbiriis.

⁴¹ Tovenen tamtoghon tisob to tilala tinimnim, tiyubyub mbeb toni. Ve yes ndug ndug to tineep tigharaui, tivelegi ve tighamgham ŋalalaŋ pani.

⁴² Yoova, yom taum upalot kinik tiei koia, ve tiparab ariaŋa le tilib pani. Tauto tisob lolodi poia, ve tipakur taudi.

⁴³ Sawa to kinik tiei igham malmal, yom upaloti maau, ve upamuul buza toni mata imuul pa tau.

⁴⁴ Tovenen mbeb toni popoia to ye iza tiina pani, yom uŋguaaz di pani, ve ureu ina to ghamuuŋ pooz izi taan.

⁴⁵ Ye ŋgeu paghu. Eemoghon ugham koia tilib pani, tauto igharaat tau maau, ve ipul tau. Taghita inim olman waat.

⁴⁶ O Yoova, pale ŋeez o matam inim payei muul? Vena, pale uŋgooz matam payei, ve mbalmbali tiom izaza tiei itaghoni taghoni gha ila?

⁴⁷ Yoova, matam iŋgal: Yei tamtoghon to taan nineep mala maau. Onoon, yom taum ughur ghei. Eemoghon, pale nisob nimatmaat ninim mbeb sorok.

⁴⁸ Sei irau imaat maau, ve ineep mata iyaryaar itaghoni taghoni gha ila? Ma sei irau ipaghau tau pa mateeŋ? Eta maau.

⁴⁹ Yoova, muuŋ yom umbua saveeŋ toman David, ve upariaaŋa le iyaryaaŋ kat ughaze pale lolom ineep tuŋia ila toni, ve uuli irau sawa isob. Eemoghon aazne, poia tiom tonanan ineep sine? Vena to utaghon saveeŋ mbuaaŋ tiom muul maau?

⁵⁰ O Yoova, you mbesooŋa tiom. Matam iŋgal ghou ve uul ghou lak! Pasa aazne, ndug ndug tipamayaŋin ghou, ve tiveleg ghou le lolog isami kat.

⁵¹ Yoova, yom taum usia ghou, ve ughur ghou nanim kinik. Ughita. Ndug sine to nala pani, nene koiamŋa tiwamogheran di payou, ve tipiyaav saveeŋ velegiiŋ payou.

⁵² Tapait Yoova pa poia toni irau sawa isob. Onoon le onoon kat!

⁴⁰ Didiiŋ ariaaŋa tau ilivutin nugh tooni na, yo ureu mbirisaini izi. Ve uvaghamunia ruum tooni ariaŋazi paam, le tisov timbiriis.

⁴¹ Tauvene tamtamon tisov tau tilala tilamlam na, tiyumyum gabua tooni. Ve yes nugh nugh tau tileep tigharauu na, tiveveleghi ve tighamgham ŋalalaŋ pani.

⁴² Yoova, yo taum upalot kinik tsiei koiŋa ve tiparav ariaaŋ le tiliivo. Tauta tisov lolozi poia ve tipakur zi.

⁴³ Saawe tau kinik tsiei igham malmal, yo upaloti mako, ve upamuul mbuzaagh tooni maata imuul pa tauu.

⁴⁴ Tauvene gabua tooni popoia tau i eeza tiina pani na, yo uwalaav zi pani, ve ureu niia to ghamuuŋ pooz izi taan.

⁴⁵ I ŋeer paaghu. Eemon yo ugham koiŋa tiliivo, tauta igharaat tauu mako ve ipul tauu. Taghita imin kooŋ.

⁴⁶ O Yoova, pale ŋeez o matam ilam payei muul? Mindai, pale uŋgooz naghom payei, ve aatyavyav tsio izazaa tsiei taghon taghon gha ila?

⁴⁷ Yoova, matam iŋgal: Yei tamtamon to taan nileep malau mako. Onoon, yo taum ughur ghei. Eemon, pale nisov nimataar nimin kaut sorok.

⁴⁸ Sei irau imaat mako, ve ileep maata yaryaare taghon taghon gha ila? Ma sei irau ipasalia tauu pa mateegh? Eta mako.

⁴⁹ Yoova, muuŋ yo umbu saveeŋ pa David ve upariaaŋa le iyaryaaŋ kat ughe yo pale lolom isaghavu ve uule irau saawe. Eemon aazne, poia tsio tana igheen sindei? Mindai ta utaghon saveeŋ mbuaaŋ tsio muul mako?

⁵⁰ O Yoova, yau besooŋa tsio. Matam iŋgal ghau ve uul ghau lak! Pa aazne, nugh nugh tipamayaŋin ghau, ve tivevelegh ghau le lolog isaghat kat.

⁵¹ Yoova, yo taum usiigh ghau ve ughur ghau namin kinik. Ughita. Nugh sindei tau nala pani, ene koiamŋa tipaŋiŋizai ghau, ve tisiksik saveeŋ veleghiiŋ payau.

⁵² Tapait Yoova pa poia tooni irau saawe. Onoon le onoon kat!