8 Tiina tiou, yom moghon to Maaron tau. Maaron ite paam raraate inimale yom maau. Eta irau igham uraat tintina inimale yom ne maau.
9 Yoova, yom ughur tamtoghon tisob tineep tirau ndug todi todi. Ndug naol pale tinim tiput aghedi payom, ve tipait izam pa tapirim ve poia tiom.
10 Pasa, yom izam tiina, ve ughamgham mbeb gharatooŋadi tintina. Tovenen yom moghon to Maaron tau.
11 O Yoova, upatooŋ ataam tiom payou. Leso laghooŋ tiou deŋia itaghon saveeŋ tiom onoon. Ve ugham ghou naghur lolog payom kat. Leso namatughez payom, ve nataghon aliŋam.
12 O Tiina, yom Maaron tiou. You lolog poia payom, ve napait ghom toman lolog. You pale napait izam pa tapirim ve poia tiom irau sawa isob.
13 Pasa, lolom ineep tuŋia inim tiou ve uluul ghou. Muuŋ, rismoghon tone nazila ndug to mateeŋa. Eemoghon ugham mulin ghou, tauto namaat maau.
14 O Maaron, ughita. Aazne, ndiran samsamia timundig tighaze tiwaghamun ghou. Ndiran to didiaaŋ tilup di, ve tighaze tirab ghou namaat. Lolodi isamin tamtoghon eta maau, ve matadi iŋgal ghom rita maau.
15 Tiina, yom Maaron to lolom isasamin ghei, ve ughamgham poian ghei. Atem yabyab rikrikia maau. Poia tiom, nene tiina kat. Lolom ineep tuŋia inim tiei, ve uluul ghei, ve utaghon saveeŋ tiom irau sawa isob.
16 Tovenen matam imuul inim payou, ve lolom isamin ghou. Upalot ghou. Pasa, you mbesooŋa tiom. You nambesmbees payom inimale tinaŋ imbesmbees payom. Tovenen ugham mulin ghou pa pataŋani tiou tonene.