Mbouŋ to Yes Israela 86:2-17 in Mutu

² You mbesooŋa tiom, ve nanumeer ghom. Lolog ineep tuŋia ilat tiom, ve nataghon ataam tiom. Yom Maaron tiou. Tovenen uvool tiou, ve ugham mulin ghou. Pa vene, namaat.

³ Tiina tiou, lolom isamin ghou ve uul ghou! Pasa ndag to naol ne, mboŋmaagh ila le rabrab izi, taŋiiz tiou iŋaŋarua ghom.

⁴ Tiina, you mbesooŋa tiom. You nasuŋ payom toman lolog. Ugham lolog poia muul.

⁵ Tiina tiou, yom poiam kat, ve upulpul sosor to tamtoghon. Tamtoghon tisob to tisuŋsuŋ payom, lolom ineep tuŋia ila todi, ve uluul di.

⁶ Tiina, ughur taliŋam pa suŋuuŋ tiou. Ulooŋ taŋiiz tiou tonene, ve uul ghou. Pasa, you mbesooŋa tiom.

⁷ Sawa to naneep ila pataŋani lolo, you nataŋ roran ghom. Pasa, you nawatag: Yom pale ulooŋ suŋuuŋ tiou, ve uul ghou.

⁸ Tiina tiou, yom moghon to Maaron tau. Maaron ite paam raraate inimale yom maau. Eta irau igham uraat tintina inimale yom ne maau.

⁹ Yoova, yom ughur tamtoghon tisob tineep tirau ndug todi todi. Ndug naol pale tinim tiput aghedi payom, ve tipait izam pa tapirim ve poia tiom.

¹⁰ Pasa, yom izam tiina, ve ughamgham mbeb gharatooŋadi tintina. Tovenen yom moghon to Maaron tau.

¹¹ O Yoova, upatooŋ ataam tiom payou. Leso laghooŋ tiou deŋia itaghon saveeŋ tiom onoon. Ve ugham ghou naghur lolog payom kat. Leso namatughez payom, ve nataghon aliŋam.

¹² O Tiina, yom Maaron tiou. You lolog poia payom, ve napait ghom toman lolog. You pale napait izam pa tapirim ve poia tiom irau sawa isob.

¹³ Pasa, lolom ineep tuŋia inim tiou ve uluul ghou. Muuŋ, rismoghon tone nazila ndug to mateeŋa. Eemoghon ugham mulin ghou, tauto namaat maau.

¹⁴ O Maaron, ughita. Aazne, ndiran samsamia timundig tighaze tiwaghamun ghou. Ndiran to didiaaŋ tilup di, ve tighaze tirab ghou namaat. Lolodi isamin tamtoghon eta maau, ve matadi iŋgal ghom rita maau.

¹⁵ Tiina, yom Maaron to lolom isasamin ghei, ve ughamgham poian ghei. Atem yabyab rikrikia maau. Poia tiom, nene tiina kat. Lolom ineep tuŋia inim tiei, ve uluul ghei, ve utaghon saveeŋ tiom irau sawa isob.

¹⁶ Tovenen matam imuul inim payou, ve lolom isamin ghou. Upalot ghou. Pasa, you mbesooŋa tiom. You nambesmbees payom inimale tinaŋ imbesmbees payom. Tovenen ugham mulin ghou pa pataŋani tiou tonene.

¹⁷ O Yoova, ugham ŋgar eta, leso ipatooŋ ghou ighaze lolom poia payou. Ighaze uul ghou, ve ugham ghou ateg izi, nene pale koiagŋa tighita, ve tighilaal tighaze yom lolom payou. Ghoro mayadi ve neneeŋadi.

² Yau besooŋa tsio, ve nanumeer ghom. Lolog isaghav ghom, ve nataghon eez tsio. Yo Maaron tsiau. Tauvene uvool tsiau, ve ugham mulin ghau. Mako pale namaat.

³ Tiina tsiau, lolom isaghatin ghau ve uul ghau! Pa saawe isov, ta mboŋoozo ila le ravrav izi, taŋiiz tsiau iŋaŋarui ghom.

⁴ Yoova, yau besooŋa tsio. Yau nasuŋ payo toman lolog. Ugham lolog poia muul.

⁵ Tiina tsiau, yo poiam kat, ve upulpul sosor to tamtamon. Tamtamon tisov tau tisuŋsuŋ payo na, lolom isaghav zi ariaaŋ, ve uluul zi.

⁶ Tiina tsiau, ughur taliŋam pa suŋuuŋ tsiau. Ulooŋ taŋiiz tsiau tane ve uul ghau. Pa yau besooŋa tsio.

⁷ Saawe tau naleep ila pataŋani loolo, yau nataŋ rarai ghom. Pasaa, yau nawatagh: Yo aat ulooŋ suŋuuŋ tsiau ve uul ghau.

⁸ Tiina tsiau, yo mon ta Maaron tauu. Maaron ite paam raraate imin yo mako. Eta irau igham uraat tintiina imin yo ne mako.

⁹ Yoova, yo ughur tamtamon tisov tileep irau nugh toz toz. Nughmariŋ pale tilam tiput aghezi payo, ve tipait ezam pa tapirim ve poia tsio.

¹⁰ Pasaa, yo ezam tiina, ve ughamgham gabua ŋgeretazi tintiina. Tauvene yo mon ta Maaron tauu.

¹¹ O Yoova, utotoi eez tsio payau Leso laghooŋ tsiau iduduuŋ mon itaghon saveeŋ tsio onoon. Ve ugham ghau naghur lolog isov iŋarui ghom. Leso naroi payo, ve nataghon aliŋam.

¹² O Tiina, yo Maaron tsiau. Yau lolog poia payo, ve napakur ghom toman lolog isov. Yau aat napait ezam pa tapirim ve poia tsio irau saawe.

¹³ Pasaa, yo lolom isaghav ghau ariaaŋ ve uluul ghau. Muuŋ, rigmon kanaŋ nazila mateegha niazi. Eemon yo ugham mulin ghau, tauta namaat mako.

¹⁴ O Maaron, ughita. Aazne, zeran sasaghati tiburig tighe tivaghamun ghau. Yes to taliiŋzizi tilup zi, ve tighe tirav ghau namaat. Lolozi isaghatin tamtamon eta mako, ve matazi iŋgal ghom rigta mako.

¹⁵ Tiina, yo Maaron tau lolom isasaghatin ghei, ve ughamgham poghani ghei. Atem yavyav rekrekia mako. Poia tsio, ene tiina kat. Yo lolom isaghav ghei ariaaŋ ve uluul ghei, ve utaghon saveeŋ tsio irau saawe.

¹⁶ Tauvene matam imuul ilam payau, ve lolom isaghatin ghau. Upalot ghau. Pa yau besooŋa tsio. Yau nabesbees payo imin tinaŋ ibesbees payo. Tauvene ugham mulin ghau pa pataŋani tsiau tane.

¹⁷ O Yoova, ugham ŋgar eta leso itotoi ighe yo lolom poia payau. Pasaa, ighe yo uul ghau, ve ugham ghau ateg izi, ene pale koiagŋa tighita tighe onoon yo lolom payau. Mako mayazi ve tineneeŋ.